A la fin! Notr' tâche dans la campangne est à peu près finie
A la fin! Notr' tâche dans la campangne est à peu près finie, pour le moment. J'avons, entre mai et ma famille, clièrgi tout ch'qui y'avait d'mulots et de p'tites taupes hors de d'dans vingt-deux vrégies d'patates, dans chinq vrégies trente perques de froment, six et d'mi idem d'avaine, trais becquets d'panais déjà belles en freulles, et j'avais passé l'haugard chinq fais au cliai d'la lune, tout chonna dans les deux difféthentes fermes y'où qu'le Coumity d'la D'fense de l'Ile nos avait envyès faithe du travas d'ghèrre. Si y'a une famille en Jerry qui peut s'vanter d'aver bein fait san d'vair en l'annèe 1917, pour faithe en sorte que toute la nouorrituthe possible s'sait produite, ch'est bein la famille du Caouain.
J'en avons yeu des expériences! J'en avons ouï du cliai' et d'l'êpais! J'en avons veu des scènes, dans l'couothant d'notr' saison! Si Moussieu l'Doyen veurt avair une conférence hors du commun à sa Société Littéraire ou si Jock Luce r'organise des séthèes d'Jerriais, i' n'ont qu'là me d'mander d'lus raconter tchic chose de notr' travas chès s'maines ichin; nou dit que l'hibou est le symbole de la sagesse je lus prouv'thai qu'ch'est vrai et en même temps je baill'lai d'ma bec assez pour les abuser un p'tit d'temps, allèz!
Pus qu'chonna: si l'Sieur Englefield veurt rempl'yi le Cinéma West, qu'i' nos d'mande de lis r'présenter la bordèe tragique, Le fouangno' des Caouains êdghéthé dans une raniéthe de taupe.
Et j'pouorréthions offrir à Moussieu Franks, de l'Opera House, la farce de Marie Hibou pourchassèe par la belle-mèthe à Laïesse Ernon. Même les vielles filles sen êgouff'thaient à rithe.
* * * *
Nou s'en va avair un p'tit mio pus de temps à r'garder l'tou' d'sai. Déjà j'ai y'eu la chance de passer une demie-heuthe, une saithèe ou deux, ès êcoutes d'un bord et d'l'autre à tâchi d'ramasser tchic brin d'nouvelles pour la gazette. Naturellement, j'n'ai pon peu aller ailleurs que dans l'vaisiné, notr' accord ov le Coumity d'la D'fense de l'Ile, étant que nou restethait dans l's'envithons d'la plièche y'où qu'notr' travas se dounne. Ch'la fait que mes renseignements sont pus ou mains limités; mais qu'i' le s'saient tant qu'i' voudront, y'a tréjous tchic chose de pus ou mains intéressant.
Dimanche au sai, par exempl'ye, je m'trouvais souos une touffe de housse à la carre d'un gardin, quand j'ouï deux hoummes qui pronaient y'un d'chaque bord de la hèche en attendant que lus femmes ervinssent de la chapelle.
“Nou trouvait à r'dithe contre le Counnétabl'ye,” se faisait le pus maigre des deux” (un houmme avec des lunettes et un gris chapé) “parcequ'il avait attendu un p'tit d'temps depis qu'sa gestion était finie d'vant prendre de m'suthes pour une nouvelle êlection.”
“Eh bein, tch'est qu'en est?” d'mandi san parchounn'yi, - un gros, frais rasé, ov une casaque à carrieaux.
“Il en est,” erprint le maigre, “qu'à matin, en r'gardant un mio de vielle gazette qu'était à bouchi une fenêtre, j'ai veu qu'la date était du mais d'Janvi 1914 et que l'jour du vièr Noé de ch't'annèe-là, deux messieux avaient 'tè élus Protchuleurs du Bien Public, dans la même paraisse. Les v'là aller sur la quatrième annèe bein avanchie mais i' n'pathaît pon y'avair occouo de mouv'ment pour les ré-êlithe ou les remplièchi...”
L'autre l'interrompit en disant tchic chose entouor un trépi et un chaudron, mais le diton était trop grossi pour que nou l'imprime dans une gazette qui s'respecte. Ou savez bein...
* * * *
Dépis que j'sis par ichin, j'n'ai pus quâsi d'communicâtion avec les gens du bureau au bas du Vièr Marchi. Notr' bu d'gal'tas est bein barrè et notr' butin souos bouanne garde, chein qui fait que je n'nos dérangeons pas d'rein. Mais Jerry est si p'tit que n'ou n'peut pon s'empêchi d'savair ch'qui s'passe dans ses vièrs hants et toute la famille des Caouains a apprins le triste accident que la “Post” rapport Mêcredi, comment qu'le
ca' à Mess Bisson, le vièr ca' qui faisait sa ronde au Chimtchèthe touos les sièrs, a
tchulbuttè du haut d'la maison jusqu'à bas.
J'me d'mande coumment qu'il est v'nu à tchaie. Je counnais les lieux assez bein ach'teu et jamais n'yai veu l'moindre dangi, ni autchune chose qui me f'thai craithe que j'pouorrais tchaie d'même en plien jour, mais p't'être que nou n'vait pon l'dangi quand nou sait voler coumme i' faut.
En tout cas, chu ca' là et mai, je n'tions pas trop bouans amins. L'affaithe n'avait jamais 'tè coumme sus rouolettes entre nous dépis que j'nos counnaissions et pus d'une fais y'a yeu du hèrtchin là haut, au cliai d's'êtelles.
Eh! bein, criyiz-mai s'ou voulez, mais je n'peux pon m'empêchi d'avair du r'grèt pour la pouorre bête. Il est vrai qu'un ca' n'est qu'un ca' mais i' m'sembl'ye, mai, que les p'tites animosités d'la vie daiv'thaient dispathaithe devant les malheurs. S'ou voulez êcouter la morale d'un pouorre ouaisé coumme mai, j'vos dithai qui trop souvent les humains portent lus rantchumes trop loin et que quand la malchance et la minzèthe arrivent faudrait tâchi d'oublier nos hèrtchin'nies et nos haines. Opprès tout 'êche que la vie n'est pon trop courte pour être tréjous à s'cherchi chicane?
Si j'peux trouver une souothie tendre, grasse, et bein en chai, ches jours, j'm'en vais l' y' envier par la
bus (c/o Mess Bisson) pour montrer ma sympathie d'une maniéthe pratique.
Caouain
1917
Viyiz étout: