Quand je r'vins d'la campagne l'aut'e jour, je m'attendais, naturellement, que nos gens à l'office aithaient 'té touos contents de me r'vaie parmi ieux, et qu'i' s'en allaient me douner, comme nou dit, “une chaleureuse réception,” alors ou pouvez vos imaginer ma surprinse quand j'entri dans l'office et que j'dis “Bonjour, Messieux!” de vaie que personne ne mé raîponni. Je criyais, au mains, que Mess Bisson, au son d'ma vouaix aithait sorti tout en presse de driéthe san p'tit bureau pour venin me châtchi la patte et m'faithe la bainvenue comme i' fait à la pus grand'partie d'nos clients, mais au lieu d'chenna, il êpyi justement pas sus l'haut d'la s'partition pour se faithe seux ch'tait bain mé, et r'dispathue aussi vite sans dithe une pathole...
Je n'li viyais que l'haut d'la tête et i' m'sembliait qu'il avait les ch'veux oquo pus raides que d'habitude che qui m'fit craithe qu'il 'tait hardi mârri.
Je m'en allais d'mander des explications au sieur Amy, qu'était driéthe le conteux, mais i' m'fit un clyin et un signe de n'dithe pas rein pour le moment.
Je trouvais tout chenna bein drôle, mé, mais je me r'consolais un mio de penser qu'i' y en avait au mains iun que je r'gardais comme man pus grand anmin et que, j'étais bain seux, s'en allait être enchanté dé me r'vaie, alors, je d'mandi au Sieur Amy, “Elie est-i' ichin?”
Pour raîponse, i' pointi à la p'tite office qu'est dans la carre de la boutique et ouest que j'gardons l'téléphone.
Je m'y en fus tout dret, mais devant que j'eusse gagni jusqu'à la porte, je ouï la cliè touâner dans la sétheuse, et j'eus biau tapper et crier “Any one in?” personne ne vouli raîpondre.
Chute fais-là, dja, je vis bain qu'i y avait tchique mystèthe en allant, et je m'dêtermi de dêcouvri t'chest qui pouvait être la cause que je fusse soumins à une patheille humiliation.
Si i' avait oquo ieu personne-là, ch'n'aithait oquo pas 'té si piéthe, mais le Juge Vaudin, le bouonhomme Wakeham et Maît'e Ph'lippe Gallichan étaient assis sus l'banc, et furent têmoins de toute la scène, alors ou comprenez bain tchi mortification que ch'devait être pour mé.
Je m'en fus tout drèt en haut trouver Marie Hibou. “Tchi djâblye qu'i' y a ieu ichin tandis qu'j'ai 'té hors?” je li d'mandi, “je vains d'être traité justement comme un tchan par les gens en bas! Y connais-tu tchiquechose té?”
“Ergarde, Caouain,” qu'ou m'dit, “tu peux rester ichin si tu veurs, té, mais je m'en vais, mé, je n'peux pas vivre dans un patheil entourage, nous est véthitablyement piéthe qu'en enfé, avec ches gens-là! Je peux dithe que j'vains d'une bouanne famille, et qu'j'ai 'té bain êlevée, et je n'sis pas coumme les siens qui...
“En v'la assez de tout chu bargouaîchin-là! Raîponds-mé che que j'te d'mande! Tch'est qu'est la raison que Mess Bisson ne veur pas m'pâler, et qu'Elie me barre sa porte au nez?”
“Ah bain, quant à Mess Bisson,” qu'ou m'dit, “il en a contre té parce que tchiqu'uns ont 'té li mettre dans la tête que l'affaithe de san cat n'était pas un accident. I' pathaît que tu étais jaloux d'li, et qu'un jour quand i' dormait sus l'bord de la f'nêtre de la mansarde, ch'tait té qui l'poussi en d'hors pour tâchi de l'tuer.”
“Ah tchi saquétinnes ment'ies! Que Mess Bisson n'ait pas l'malheur de m'acchûser de ch'la, ou bain par exemplye je le f'thai en raîpondre d'vant la Cour! En v'là-t-i ettou!”
"Et pis Elie, tch'est qu'ch'est qui l'possède ettou li?”
“Elie n'a pas rain contre té, que j'sache. Ch'est mé et li qu'avons ieu du brit. Il a té en Dgernesi derniéthement pour une semaine, et d'vant s'en aller i' me d'mandi si ch'est qu'i' y avait tchiquechose qu'i' pouorrait m'rapporter coumme un p'tit souvenir. Je li dis que coumme tout était aussi chi ichin, et qu'nous avait d'la diffitchulté à se protchuther un malheutheux mio d'paisson dans l'marchi, pouorrait-i' si en cas me rapporter une grosse crabe. I' m'dit qu'i' n'y manquethait pas, alors je m'y attendais, mé, et pis l'aut'e jour quand i' r'vint, il avait roublié tout entouor la crabe, et je crai qu'i' m'prenait pour une imbécile, car i' m'dit qu'il avait cherchi partout, mais n'avait pas peu en trouver une. Là d'sus, je m'emporti, et je li dis qu'i' n'tait qu'un menteux et un rain-du-tout. I' s'mins à m'dithe des choses que je n'peux pas répéter, et enfin je finîmes par aver du brit.”
V'là don garçons, la position! Les choses en sont v'nues à chu point-là. Je n'sommes pon bain-veus ichin et j'ai grand peux que si Messieux les Directeurs veulent ertenin mes services, i' faudra d'vant longtemps qu'ils envient Elie et Mess Bisson à travailli dans les fermes, ou bain à faithe des munitions.
Car oquothe au but d'tout, tandis qu'j'ai 'té, mé, à m'dêchither la carcasse à du travas d'importance nationale, ch'est à dithe à aidgi à Cliément d'Caen à produithe des “foodstuffs”, ches deux panphêques-là étaient à lus enrichi driéthe les conteux sans auchune gêne et sans l'moindre êffort.
Ah, ça, criyous qu'ch'est juste, chenna?
Caouain
1917
Viyiz étout: