Car pour li la religion
N'était pas un amas de fables,
Et ch'est seux qu'i' n's'en servait pon
Pour tromper aucun d'ses semblables.

I' disait tout ouvertement, -
"La foi sans les oeuvres est morte,
"Cheux dont la vi' lus foi dément,
"Seront , l'drain jour, mins à la porte."

I' n'était pon pour s'agrandi,
Ni pour faire un bel étalage,
Au dépens d'la bourse d'autrui, -
I' suivait un qu'min bain pus sage.

Dans tout ch'qu'i' disait ou faisait,
Il 'tait loyal à sa conscienche;
I' pratiquait chain qu'i' prêchait
Tant sus la s'maine que l'dimanche.

I' n'tait pon un tombé blianchi,
San coeur était pur et sincère;
Ch'n'eût pon 'té li qu'érait c'menchi
L'culte d'Mammon par la prière!

Pour à ch't'heu' tout est chain d'sus d'sous,
Ch'n'est pus comm' du temps d'nouos grand-pères;
P'tits et grands, i' s'efforchaient tous
De faire honneur à lus affaires.

Ils avaient bain quiques défauts,
Mais i' ne couoraient pon en dettes,
Et s'il' ordonnaient des fricots,
I' les payaient de lus pouchettes.

Ils avaient l'coeur trop haut pliéchi
Pour se dédir' de lus parole,
Ou pour s'avisé de r'nonchi
Tandis qu'ils avaient une obole.

Les gens d'not' temps sont pus malins,
I' suivent une autre pratique, -
I' paient tant à la livre sterlins,
Et pis, vite, i' rouvrent boutique!

Jérôme de l'Ile