A la fin le pouore Caouain a ieu un holiday.
Mais ch'n'a pas 'té sans bain d'la dispute.
Quand j'en pâli au Chef i' me r'fusi net!
Mais je n'm'en allais pas être arrangi d'la sorte et je l'envyi s'faithe quatorze.
"V'là quatre ans que j'n'ai sorti l'île," j'li di dis, "et je m'en vais pour un trip! Fliantchi-mé à la porte si ch'est qu'ou voulez, mais je n'm'en vais pas mantchi ch'tte occasion ichin! J'ai 'té invité par le Connaîtablye de St. Martin et Jack Châteaubriand, d'aller passer deustrais jours ès Ecréhos, et ni vous ni personne ne m'en empêch'ont!"
Quand i' vit que j'tait dêterminé i' ne r'dit pas grand' chose, et ch'tait p't-être aussi bain, car si ch'est qu'i' m'avait êlourdé, j'aithais pitchi ma pliume sus l'conteux et je li aithais dit "Là, ch'est fini! Pôtchous, vous et vot'e gâzette!"
Quand la nouvelle se rêpandi que l'Caouain s'en allait ès Ecréhos, iun d'mes amins lecteurs offrit de v'nin m'porter à Gouôrey dans san môto, et j'arrivîmes sus l'tchai à huit heuthes du matin Jeudi passé huit jours.
Opprès aver entré à l'Elfine Hôtel pour châtchi d'main avec Audguste Lamathe, je nos embertchîmes à bord de la "Mayflower," à Jack Bliampid.
Ch'tait un parti distindgi, sapresti!
I'y avait l'Connaîtable de St.-Martin, Charles Billot, san Chantn'yi, Jack Châteaubriand, Jack Bliampid, Jack Bruyèthe, qu'avait 'té "Maire de la P'tite Paroisse," et pis l'Caouain. Pour ne pas oublier Bill Spears, qu'était le pus indispensable d'la djainque, car ch'tait li qu'était en cherge du baté.
Je sortîmes de la cauchie d'un temps superbe et au but d'une heuthe et d'mie j'étions au large des Ecréhos.
Pour un change, le Caouain n'fut pas malade quoiqu'il en fut bain près tout-d'même.
Deustrais des messieux, en voulant s'fichi du Caouain, li d'mandirent si ch'est qu'i' connaissait ches parages-là et si ch'est qu'i' savait par iou qu'nous entrait.
Je crai, mé, que j'dev'thais les connaître, mé qui fut naufragi dans l'senvithons i'y a neuf ou djaix ans!
"Oh oui," j'lus raiponni, "nou peut y entrer à travers de la "Braise-ès-Boeus," pour bain que nou connaîsse le passage, mais le miyeu c'mîn est d'cachi tout dret sus "La Bigorne," et pis dès qu'nous amène le "flag-staff" de "La Marmottchéthe" en lighe de la naithe chimenée nous touâne à biédawaie et nou file tout dret sus l'mouôrin en rasant la Maître-Ile aussi près qu'possiblye pour n'être pas entraînés par le couothant."
I'voulithent quémenchi à en rithe, mais quand Jack Bliampid lus dit que ch'tait parfaitement correct, i' réalisithent que l'Caouain était p't-être aussi bouan pilote comme il est journaliste, et opprès chenna i' li montrithent un p'tit pus d'respé.
Par la suite de circonstances sus lestchelles je n'avions autchun contrôle, le couothant nouos empêchi de faithe not'e mouôrin comme j'aithions voulu et je fûmes obligis de j'ter l'ancre en attendant qu'la mathée molîsse un mio. Je n'etions en autchun dangi et tout au râs d'la Marmottchéthe, nou pouvait même pâler à George Quoyard qui v'nait justement d'atterrer de dans un autre baté, mais Châteaubriand, qui prétend aver des connaissances maritimes de premier ordre, insisti que, souos d'patheilles circonstances, nous dait faithe des signaux d'dêtresse, et il amathi un rouoge mouochet sus l'but d'un avithon et l'mâti dans l'driéthe du baté.
Les hommes à Moussieu Robin, les sieurs Noel et Perchard vinrent nos cherchi avec lus "punt" et nos minrent à terre à l'Est du Taillu et tchique temps opprès Jack Bliampid et Bill Spears minrent la "Mayflower" sus san mouôrin. Opprè aver mangi une bouochie je nos en fûmes tendre des raies dans les rotchers et à la mé montante je ramontîmes siez nous à la Marmottchéthe.
Savons bain qu'ès Ecréhos i' n' font pas les choses à la maintchi. Dans la séthée un concert fut organisé et j'fûmes tous invités. Les artistes de talent ne mantchaient pas, i' y en avait our touos les goûts, mais malgré ch'la, savous-bain tch'est qu'i' firent? Eh bain, i' firent le Caouain chanter!
Et ch'tait chenna qui gâti tout!
Tout l'monde connaît le vilain cri d'un caouain, et ous admettrez qu'i' n'faut pas aver grand avis pour s'attendre qu'i's'en va chanter comme un rossigno' ou un canârien.
Mais j'n'y r'séthait pas happé!
Le lendemain, qu'était l'Vendredi, le Cap'taine Châteaubriand se décidi d'aller faithe un viage au large, ch'est-à-dithe, il organisi une expédition de la Marmottchéthe à la Maître-Ile, à la mé haute, une distance de deux chents verges.
Il inviti san Connaîtablye, le Chantn'yi Charles et l'Caouain.
Je r'fusi d'abord mé, car j'ai connu des navigants qui n'voulaient jamais mettre en mé au Vendredi, mais Châteaubriand me dit que toutes ches superstitions-là n'existent pas acheteu, ch'est pourtchi je m'embertchi dans l'canot.
Château etc. fut l'dernyi à v'nin à bord et j'nos aperchûmes qu'i' portait une cârrée bouaîte souos san bras.
Le Connaîtablye li d'mandi, "Tch'est chenna qu'tu as là?"
"Oh!" s'fit Château, "ch'est un compâs que j'ai emprunté de Joe Bétchèt."
"Et pourtchi faithe?"
"Ch'est par précaution," l'autre se fit, "nou n'sait jamais tch'est qui peut s'arriver. Si l'temps v'nait à changi j'pouorrethions aver d'l'embarras à r'trouver not'e quémin."
Le Connaîtablye resti à l'contemplier avec la pus profonde admithation.
Savous bain que ch'n'est pas touos les jours que nou rencontre un marinier de chu calibre-là!
Quand j'les ouï dithe qu'i' s'en allaient sus la Maître-Ile ramasser d's oeus d'mauve et d'pies-mathanes, je lus dis comme chenna, "Ous allex m'extchuser messieux, mais j'reste dans l'baté, mé! I' ne s'sa jamais dit que l'Caouain a 'té dêvaliser les nids d'ses couôsines!"
Et réelement ch'tait pitchablye d'entendre les cris dêchithants de ches pouores ouaisiaux en viyant la police de St. Martin faithe l'invasion de lus domaines.
Je resti don dans l'baté, à ligni pour du vra qui n'mordait pas, et à la fin v'là nos gens qui s'en r'vinrent. Ils avaient veu tout pliain d'oeus et de p'tits ouaisiaux mais lus conscienche ne lus permins pas d'y touchi.
Quand j'étions à peu près à mié-c'min en nos en r'venant, le Cap'taine Chateaubriand se mâti d'but dans l'baté.
"Tch'est qu'tu t'en vas faithe acheteu?" s'fit l'Connaîtablye.
"Je m'en vais prendre l'solé, afin d'nos asseuther d'not'e position!"
"Bah! arrête à à saîssé et pis tu pouorras happer la lune!" le Connaîtablye li dit.
Eh bain, j'arrivîmes sains et saufs à not'e destination sans l'aide du compâs, grâce à la connaissance phénoménale du Cap'taine Châteaubriand, un homme, décidément qui vos inspithe quand nou navigue avec li!
J'arrivîmes en Jèrri Samedi matin, chargi d'paisson.
J'en emporti un assez bouan lot siez-nous mais i' y en eut d'la maintchi d'perdu à cause de l'avarice de Marie Hibou.
Pensez don, qu'ou refusi de l'fricachi car, comme ou dit, "Chenna mange trop d'beurre au prix qu'il est."
Caouain
Les Chroniques de Jersey 13/8/1921
Viyiz étout: