Lé tchêne - tchi symbôle d'ordgi et dé forche! Ses fielles ont muchi, dans lus temps, un rouai, Ses réchinnes plieinnes d'pouvé, et même s'n êcorche Est faite sèrvi achteu ès pars à jouer. Lé louothi - n'en v'là-t-i' d'la politique! Ès gângnants, il offre eune fanmeuse couronne. Nos belles maîsons ont 'té meubliées en tique Et en méaguinné qu'les forêts donnent. L'êrabl'ye nos a offèrt san bouan sitho. Lé sapîn - ch'est un fanmeux arbre dé Noué. Tchi nobl'ye et êlégant bouais tch'est un fau! Mais l'chât'nyi à j'va, ch'est du fanne tch'i' fait: D'mandez ès dgaîngues dé mousses dans l'Vièr Marchi Tchi piquent des balles pouor faithe tchaie des “conqueurs”. Les bouais ont tréjous tchiquechose à offri: Au R'nouvé des fielles, en Êté des flieurs. Au S'tembre des nouaix et frits... mais en Hivé Y'en a tchi dorment, à maintchi morts et nus. Lus tigues et branques raptichent lé ciel gav'lé. I' mèrquent nos fraids c'mîns coumme des êmânues. Copés, pînchis et couvèrts dé dgèrrue, Des vièrs bouais, anciens coumme des dinosaures, Lèvent lus longs cos acouo par sus nos rues. Les vièrs ifs restent - même si les ormes sont hors. Et par lé Sud, j'avons nos palmes étout Tchi font d'nos grèves quâsi des d'sèrts tropiques. Mais par lé Nord, i' vente saûvage et dû Et nos bouais lus penchent d'eune faichon oblyique. Châque bouais nos donne dé tchi d'ênorme valeu. Lé saux dgéthit les fièvres et les maux d'tête. Dans lus saîson, les flieurs et frits du seu Font bouaîssons, g'lées et fricots pouor nos fêtes. Les êtchutheurs tchi couôrrent par les longues branques, Les carpéleûses tchi mangent les fielles si vèrtes; Pouor ches pétites bêtes-chîn n'y'a rein tchi manque. I' sont siez ieux - et l'aûmathe est ouvèrte. Lé bouais atchil'ye un tas dé criatuthes: L's ouaîsieaux tchi juquent et les însectes tchi piquent. Lé bouais! Man doue, tchi présent d'la natuthe - Si bé, si fort, si dû, si mangnifique!   Geraint Jennings Avri 2001