Un quâsi-octogénaithe -
- Jé m'sers dé gros mots quand jé m'y mets -
Ou trouv'rez ch't-y chin dans l'dictionnaithe,
Dans l'O, ou savez, dévant v'nin au P. -
Eh bein, un quâsi-octogénaithe
Avait tout près dé sa maison
Dé biaux chât'gniers - ah dame, vaithe
Ch'est qu'yls 'taient biaux! Dans lus saîson,
Yls 'taient tréjous chergis dé fruit,
Et châque côffin, pour né pas menti,
Etait quâsiment gros coumme un 'hérisson!
Pour les faithe craître, notre ancien
Avait trouvè lé vrai sécret,
Sécret bein simple, chose dé rein.
Yl' s'arroûsait lé long d'l'estè!...
Yl avait d'amain unn' célébre pompe -
Unn' machinne (et jé n'crait pon qué j'm'y trompe)
Qu'enviait un jêt d'iaûe
Pus dé trente pids en haût!
Ch'en était yieunn' dé sa fabricâtion,
Et Patentèe étout - mais sa belle invention
Y'i'avait fait despenser biaucoup pus dé louis
Qu'y n'erchut pour san pliân dé neuve caûchie!
Ov un pareil engin, y'l 'tait bein aîsi
D'arroûser rachinnes et branques dé chât'gni -
Don y né faut pon s'estounner sis ses biaux mârrons
Faisaient grand' envie ès gueux dé larrons
Tchi les vyiaient dé jour: y'ls en volirent unn' nièt,
Quand-y qué lé vieux en rêsvait au lièt...
Le jour vénu, l'octo, sé l'vit dé bouan matin
Pour ramâsser des châtaignes - ah, despièt et chagrin,
Y n'en restait presqué pus! Et la grand' chaûdronnèe
Qu'y pensait faithe bouillyi dans la saithèe
Pour rigaler dé la visite: des gens dé sa chapelle!
Perdue, perdue!... dans sa colèthe y'l'en fît d'unn' belle
Du vol y'l' atchûsit deux dé ses vaîsins,
S'en fut siez yieux lus dithe: “Ch'est vous qu'avèz prins
Mes châtaignes, garçons! J'y guett'rait chutte nièt,
Et tith'rait les voleurs ov' man vier pistolet!” -
Là d'sus y s'en r'fut - Les garçons marris
D'être atchusès à tort, eûthent bein vite envie
Dé jouer l'ancien - “Ah y s'en va y guetter,”
Sé fithent-y - “rira don bein tchi rira l'dergni!” -
Et unn' fais la côte claithe, s'en futhent amarrer
Un long but dé filain à unn' branque du chât'gni
(Yieunne chergie dé côffins d'un cabotté ou pus),
Laissant l'aut' but d'amain pour haller dessus...
Bon! lé sai y s'y'en r'vont déviers neuf heuthes et d'mie
Ouatchi pour lé vieux... Ma fai lé v'là tchi veint,
Marchant, en slippeurs, sûs lé but dé ses pids
Ergardant ichin et là... unn' lanterne à la main.
Un bouan coup au filain: - v'là unn' achie de côffins...
Un gros tappe sa lanterne et vos la desteint -
L'octo fît un brai: - “Descendez, mes coquins.
“A la fin, je vous tiens, ah oui, je vous tiens!”
Unn' autre coup au filain, et unn' autre achie:
- “Mais, descendez-donc, vous voilà bien pris!”
Et lé vétéran hurlait coumme un possédè,
Y' l'âmouôchélait les côffins à tâtons,
En faisait des loppins coumme s'y mertchait du vrai',
Et sé pitchait les daigts pour saûver ses mârrons!
Pensez-don si dé l'aut' bord les garçons en riaient...
L'y, vyiant qué persounne né d'valait du bouais
Cryit: - “Hé bein, restez la haût, je ramasse le butîn,
“Pour moi, je ne bouge pas d'ici avant le matin!”...
Et l'ancien s'accroûpie pour y pâsser sa nièt. -
Mais tout erfut trantchille... Longtemps ôprès minnièt,
Sé doutant dé tchiq'chose, la pâstienche l'y manque,
Et nos farceurs lé ouîrent de l'aut' bord dé la banque
S'en aller en s'disant d'un bein triste ton. -
- “Ceci n'est qu'une farce, et j'en suis le Dindon!” -
Côffin
1900
Viyiz étout: