Tôt, eune associâtion s'formit auve lé Syndicat National dé Jerri tchi v'nait d'être lanchi, et l'année pâssée, souaixante ans d'pis lus fondâtion, les deux sociêtés fêtitent lus Jubilé d'Diamant, et travaillent acouo ensembl'ye dé temps en temps.
Iun des preunmièrs projets entréprîns par les deux sociêtés 'tait a La Crouaix d'La Bataille, au haut du Mont d'Grouville, en Févri, 1938.
Les activités d'la branche locale des Gens d'La Bouaîs'sie fûtent suspendues duthant la deuxième dgèrre mondiale et l'Otchupâtion dé Jèrri par les Allemands.
La preunmié assembliée d'la société eut lieu en Févri, 1946, auvec pus d'septante membres; lé Lieut'nant Gouvèrneux et l'Bailli 'taient là. Lé principal discours concèrnait la dêvastâtion d'bouais abattus, pas seulement pas les Allemands, mais par la populâtion tchi 'taient au m'sespé pour d'la fouaille. Ch'est estînme qu'au mains trais chents mille bouais fûtent abattus duthant l's années d'la dgèrre. Lé Bailli racontit eune histouaithe d'un ancien campangnard tch'avait r'fusé ès Allemands d'abattre un bouais sus sa propriété. Plusieurs officièrs, accompangnis par lé Bailli, futent lé visiter explyitchant lus intention, mais lé vieillard dit 'Nannin-dgia,' ch'tait pas pôssibl'ye pa'ce qué chu bouais avait 'té plianté quand san péthe avait 'té né. Un autre fut chouaisi mais l'bouonhomme dit qué ch'ti-la avait 'te plianté quand li-même avait 'té né, et 'tait rêsèrvé pour la fabricâtion d'san côffre. À la fin et au m'sespe l's Allemands chouaîsîtent un autre bouais mais la rêponse fut 'Ou n'pouvez pas aver ch'ti-là n'tout i' fut plianté pour ramémouaither la naissance dé m'n oncl'ye Charles'.
Un don dé douze mille louis en 1964 aidgit à la branche dé plianter chent-vîngt bouais sus la c'meune dé Gouôrray.
Malheutheusement, lus chouaix dé rose et blianc chât'nièrs entrémêlés d'Cyprès, ne s'sait pas l'chouaix d'aujourd'aniet, sustout dans eune contrée comme la c'meune dé Gouôrray, étant un endrait bein connu pour la 'flore et la faune'. Graduellement ches bouais es'sont rempliaichis par eune espêce pus conv'nabl'ye pour la contrée.
Au jour d'aniet l' Associâtion des Gens d'La Bouaîs'sie consiste dé pus dé treize mille membres et l'învitâtion existe d'encouothagi d'autres gens d'joindre pour poursuivre la crututhe, souongnéthie, pliant'tie et consèrvâtion d'bouais et arbustes en Jèrri. Les bouaîs'sies d'Jèrri ont souffèrt à cause dé divèrses raisons avaû l's années l's êffets d'l'Otchupàtion et l'caltchul qué d'pis 1970, trais chents mille bouais ont crévé d'la maladie connue comme 'Dutch Elm Disease'. La mode modèrne dé fèrmage a contribué à la dêvastâtion d'fosses, et souvent lé developpement d'bâtithie a rêsulté en pèrte dé bouais.
D'habitude, et souos bouonnes conditions, un coup qu'un bouais est bein êtablyi, i' peut aver eune bein longue vie, mais ch'est nécessaithe dé continnuer la pliant'tie pour fourni eune existence pour les générâtions d'l'av'nin. Hardi d'bouais et d'bouaîs'sies ont 'té néglyigis dans l'pâssé et sont en grand bésoin d'soin. L'associâtion rêalise l'împortance d'encouothagi et d'înstruithe les gens envèrs lus responsabilités et ch'est împortant qué l' Associâtion des Gens d'la Bouaîs'sie d'Jerri pourchasse un programme pour au mains un autre souaixante ans.
Autcheune pèrsonne d'sithant d'joindre les Gens d'la Bouaîs'sie ou ayant bésoin d'înformâtion sont priés d'contacter Julia Clively - neunmétho d'téléphone 857611.
Julia Clively
Viyiz étout: