L'buanhomme est comme un satan et ch'est mé qui s'y obligie d'arrachir ieunne de mes plieumes pour vos écrithes d'pis que l'Sieur Caouain n'veur pon entendre pasler de gazette, de Procureur, ni d'boss !

Il alli en ville Samedi l'arlevée et s'mucchi dans l'Coummittee room à Carl, l'sien qui f'ra ver ès Moussieux des Etats qu'il a l'filet bein coupé. Quant y vint à la tombée d'la nièth, y s'fit : Marie, Jerri est f…ichu. Pas d'ber ès élections et pus d'vouaies pour seur ! J'criyais t'rapporter tout pliain d'galettes pour rempli ta tine et tchiques nices cigares pour mé. Et j'aurons rein en tout. Man pouorre Jerri !

J'li fy la r'merque que l'boss avait envièth dithe qu'il l'y fallait de tchi pour mettre sus sa gazette. Qu'il aille s'faithe quatorze qui m'réponnit. Pour seur que nennin, ch'nest pon mé qui va m'mettre en travers d'pis qu'Johnnie Walker est en strike.

Touote la nièth y ronnit comme un bourdon dans un potithon, avait l'trembliot et la brélue car y n'pasli que de Johnnie Walker, Mary Ann, Black et White, un tas de gens que j'connais pon.

Pour Johnnie Walker et l's'autres n'v'la qui n'me fait rein, mais j'voudrais bein counnaitre chutte Mary Ann de tchi qu'il paslait du grand plaisi d'l'y carressi l'co ! Y en a t'y tchiques ieuns d'vos qui pouorrait m'dire iou que chutte hardelle à sa niche ?