Les Pages Jèrriaises

Pour le Nouvel An


I' n'est jamais trop tard pour bain faithe et si chonnechin n'pathait pon dans la prumié gazette de 1908, il a ocou chance de pathaître le prumié Samedi d'l'année, ch'est pourtchi il est ocouo temps de souhaiter jouée et prospéthitè ès siens qui l'méthitent.

J'voudrais sou'aiter

A Moussieu l'Bailli:

Que les membres des Êtats sachent se condithe conv'nabliément dans toutes les circonstances et que les Avocats dans la Cour ne s'entêtent pon à distchutter contre l'Président, et qui n'trouvent jamais qu'les decisions d'la Cour ne sont pas s'lon Loué et Couotume. Que touos les discours du Bailli à touos les dînièrs et à toutes les distributions d'prix essaient êcoutés attentivement jusqu'au but et qu'tout l'monde les approuve, même les gens qu'êcrivent sus les gazettes. Que toutes ses bêtes essaient "highly," qu'ils aient les prix d'paraisse et l'rouoge riban au grand show.

A Messieux d'z'Etats.

Que tchiqu'un trouve un système de mettre en pratique chein qu'nou nos dit si souvent sus l's'affiches d'êlection: Tout plein d'rêformes, du progrès, des améliorations raisonnabl'yes et en même temps une diminution dans les taxes et l's'impôts; que chu système-là piesse être appl'yitchi en Jerri en l'année 1908 et à l'avenin.

Que les membres des Êtats qui sont en d'faut ne s'saient pon forchis à payi lus amende...

Que le r'vénu monte et qu'la dêpense ertchule.

Qui y'ait ocouo du run pour tous dans la salle malgré les quatre nouviaux Députés d'la Ville. Il est vrai que dans une balanche, i' pouorraient être tous souol'vés par yun ou deux d'lus collègues...

A MM. l'z'Avocats.

Que les clients n'lus manquent pon; que les siens qui veulent sé chaquenarder, sé chaquenardent; et que les bouannes causes ne manquent pon, ni les bouans clients in'tou.

A MM. les Fermièrs.

Que Mess Cooper ait besoin de bouannes bêtes - à autchun prix et qu'Larsen en ait tout aussi grand besoin, de toutes les sortes, au même compte. - Que j'n'ayons pon d'aubegelèe, ni d'maladie, mais huit cabots la pèrque à two-an' nine. - Que nou ouaie pâler d'lamentâtions à St.-Malo et à Ténériffe. Que pas une seule bête à corne ne touanne touothâtre. Qui n'y'ait pon d'pico dans une seule cotte et qu'les p'tits animaux passent à un louis, et l'lard à tchinze sous toute l'annèe. que les poules de Granville ne piessent pon pondre et qu'les nôtres nouos donnent, rédgulièthement, trais oeux dans 4 jours.

A Mess Le Rossigno.

Que l'Red H passe bain et s'sait payi comptant. Que hardi d'fermièrs téléphonent au No. 89, pour ertenir tchic sacs d'Basic Slag, et qu'nou s'sait bétôt obl'yigi d'craître les pus biaux stores de l'Esplanade.

A la paraisse de St.-Hélier.

Qu'une âme bain disposèe lis laisse chinq ou siex chents louis pour bâti un p'tit châlet (ou savez bain tchi) pus convenabl'ye dans Broad Street et yun ou deux autres ètou, d'vant la fin de 1908.

Es St.-Louothenchais.

Que lus route s'sait r'grée, ov pierre, gravi et steam roller. Que l'Carrefour ne mouolle pus les pis à Moussieu Davey. Que lus poteaux et lus téléphone essaient bétôt en position! Qu'ils aient bétôt assez d'sous à la banque pour n'aver pon besoin d'rât.

Es St.-Jeannais.

Que lus ch'vaux n's'effritent pon des sign-post des Trin'tais ou des St.-Louothenchais.

Es St.-Pierrais.

Que l'z'Etats lus paie les sous qui lus sont deus sus lus drain à Biaumont. Qu'i'n'oublient pon de profiter d'lus arlévèe dans l'Parish Hall, le prumié Mêcrédi du mais.

Es Trin'tais.

Que les Blus gagnent autant d'êlections qu'les Rouoges et qu'les Rouoges n'en perdent pas pus qu'les Blus.

Es autres paraissiens.

Qu'les râts s'saient bas, les routes bain gardées, les experts raisonnabl'yes. Que les siens qui l'méthitent essaient réêlus et les autres remplièchis.

Es Gazettes.

Que l'Press n'êtiboque pon la Post de trop près et qu'la Post ne faiche pon trop d'envie au Press. Que la "Vieille" ne trouve pon à r'dithe et qu'la "Nouvelle" ne renvie pon tréjous mes p'tits bus au préchain numétho.

 

Elie

Nouvelle Chronique de Jersey 4/1/1908
 

Viyiz étout:

 

Les Pages Jèrriaises