L'Editeur me dit comme cheunna, l'aut' sé, en m'dounnant man Noué - eune pouque à pétuthe pliennes de chataignes mucres (y sont toutes mucres, ch't'année) qu'il avait yeu en èschange d'un abon'ment à la gazette - y m'dit coumme cheuna, en s'renvértchant dans sans fauteuil. "J'té souhait' eunne Bouonne Année, man fiston, (si seulent y pâslait d'hauchi mes gages un p'tit mio). Bouonne santé (faudrait poué affôrdé pus viande que j'n'en mange, pour cheunna) et l'Paradis à la fin d'tes jours" (mes chances pour ch'la sont p't-ètre miyeuthes que les siennes). "As-tu tan crayon?"
J'lis montri l'petit but qui m'restait - y n'en fournit qu'yun par mais - et, après l'avé examiné un mio, et m'avé r'primandé viyant que je n'tais pas pus èconôme, et carlchullé que si touôs les crayons qu'j'ai ûsé d'pis que j'sis ichin 'taient mins but-à-but, yen éthait assez pour faithe treîs fais l'tou du Vier Marchi; y m'dit qu'y'en réstait assez pour èscrithe ch'qui voulait. "Tu t'en vas t'n'allé à haut, dans la mansarde ou-es qué j'gardons les viers r'chus et la cage au Caouain, prend hardi d'papi, et èscris nous un articlye sus la Nouvelle Année!"
M'y v'chin don, dans la mansarde assis sus eunne casse à savon - y'a du cliou - et un bathi à encre sus bu pour èscrithe dessus.
J'vos souhait' eunne Bouonne Année!
Et, comme d'amor, j'vos la souhait' du pain quand ous éthez faim; des sous dans l'titheux quand yétha des comptes à payi; et du sno quand l'envie d'snoffé vos prendra! J'vos souhait' touôs vos souhaits! Ch'est-à-dithe qu'y'étha un bieau mèli-mèlo si v'la tchi r'réalise! Tout l'monde s'ra riche; et n'y'étha pus d'pouôre gens pour faîthe le travas! Toutes les filles éthont des galants; et les siens qui r'vindront d'Terreneuve hall'ont à la courte-paille pour savé tchès qu'empruntra l'amouotheuse à san couôsin pour allé ès Distributions d'Prix. toutes les vaques ès fermiers éthont des g'niches; et toutes les siennes qu'ithont au Test gagn'ont la médalle. L's'Améthitchins vindront l's'accaté chi, et ne s'ont pon r'gardant sus les papiers du H.B.
J'vos souhait' eunne santé d'fé!
Ichin, je n'sais trop si j'fais bin! car, s'ou n'ètes pon malades, tchès qui s'en va dévenin des docteurs? Faudra pensé a lus trouvé eunne autre djob.
Tchi fonne, tout d'même, quand vint l'temps des Souhaits! Nou n'a qu'a les s'mé a la volée, partout, pour que tout l'monde piesse ramassé l'sien qui lis convint, et pis... rin! Rin n'se passe pus qu'd'amor! Et nou r'quémanche l'année d'après.
Mais j'n'ai pas aquo fini de smé! Je souhaite que nos Estats, l'Coumité d'Instruction, faiche eunne Loué pour forchi tout l'monde (sous peine de Cinq Louis d'amende ou travaillyi un an sur les routes) a liethe les gazettes! Tout l'monde pouôrrait y'affordé si man deuxième souhait - que tout l'monde (tout l'monde Jersiais j'veux dithe) sait riche, s'réalîse. J'avais quâsi pensé souhaité qu'la Loué s'ait pour les gazettes francaises seulement, mais j'marrête en temps. J'soummes a ch't'heu parchounniers avec le Morning News, et faut qui sait d'avec nous dans la bouonne chance. Ch'n'est pas des richesses que je d'mandons pour nous mêmes: ch'est du travas; tout plien d'travas!
Et je souhait qu'au pus tôt nou nos dounne le Juge qui nos manque pour faithe not'compte. J'avons drouèt a douze, n'y'en à qu'onze, et la puspart de yeux sont asmatiques; n'y'a pas d'pliaîsi a s'ent'faithe des procés souôs chès conditions la.
Et coumme y m'reste aquo quâsi eunne bindgié d'souhaits, et qu'men bu d'crayon n'merque pus; j'vos les flianque par la tête, à brachie!
Attrape! Et si y'un d'vous en attrape qui n'lis convennent pas "swoppez" le avec vot' vaîsin. V'la t'chi n'mé fait d'rin; et ma djob s'a pus vite finie! J'm'en vais bèthe-du-thé siez les Pain du Morning News! N'en v'là oquo eunne famille a tchi qu'nou pouôrrait souhaité jouée! Sans conté qu'lus célèbre Lonôre m'fait sué rin qu'à la vaie èsprouvé a chanté.
Samuel
La Chronique de Jersey 1/1/1913
Viyiz étout: