S'i fallait qu'un châtchun racontisse comment qu'i' passi les dernièthes heuthes de la vieille année et les prumièthe de la nouvelle, je vos asseuthe qu'i' y en aithait d'la variêté.
Les siens qu'ont l'pus d'avis vontlus couochi à djaix heuthes du sé le trente-yune de Decembre et lus rêvillent à sept ou huit heuthes du matin le prumi d'Janvi et r'quémenchent la Nouvelle Année comme si rain n's'était arrivé.
Mais i' m'semblye qu'i'sont dans la minorité, cheux-là.
Quant à mé ch'a tréjou 'tait là ma règlye pour les dernie chinquante ans, avec seulement deux exceptions.
La prumièthe était, i'y a tchiques année, que je fut induit à aller à un “Watch Night Service” dans iune de nos chapelles.
Ch'était iune des pus ludgubres cérémonies à tchi qu'j'aie jamais assisté.
Je n'm'en vais pas vos ennier avec les détails, mais je peux vos dithe que l'bouonhomme qu'était dans la tchaîthe, erpathi d'nos mettre tous dans un êtat d'esprit qu'i' sembliait que j'nos allions être touos pendus sus l'coup d'mînièt.
Je fus prins d'une mélancolie qui n'me tchitti pas pour une semaine ou deux et je m'promins bain de jamais ne r'aller à une patheille réunion.
Jusqu'à ch'tte année j'avais r'prins ma vieille couôtume de m'couochi à man lièt à m'n heuthe ordinaithe, mais, iun d's autres jours v'là-t-i' pasun moussieu qui vaint à la boutique avec une invitation toute spéciale pour que l'Caouain aille à une dans la dernié séthée de l'année.
Ah ça! le Caouain n'ayant jamais dansé et ayant tréjous 'té préjudicié contre toute chute frivolité-là, je r'fusi de la manièthe la pus catégorique, tous en le r'merciant pour sa bonté.
Mais il insisti si bain qu'à la fin je m'laissi persuader et je lis promins que j'îthais.
Marie Hibou vint comme un satan quand oulle en ouï pâler et aithait voulu y v'nin avec mé pour ergarder sus mé, mais je r'pathi d'la convaincre que ch' n'était pas une pliaiche pour lyi.
Mais ou m'fit li promettre que je n'm'en allais pas danser avec toutes sortes d'créatuthes que je n'connaissais pas.
Ou n'avait pas qu'faithe de s'gêner quant à chute partie-la. Je n'aithais pas seu comment m'y prendre.
Tch'est qu'a jamais veu un Caouain danser?
Eh bain, quand la séthée arrivi, un amin à mé, qu'avait promins dé m'porter au bal dans san moto, ne gardi pas sa pathole et je viaigi à pid, des milles de c'min, avec un compagnon que j'trouvi sus la route.
Il en d'lugait d'plyie et j'arrivi a ma destination trempé comme n cormothan.
Mais je fus bain erchu et dès que l'maître des cérémonies eula nouvelle que j'étais arrivé, i' fit l'signe ès musiciens, et l'bisnesse quemenchi.
I' voulaient m'faithe danser mais i' n'y avait pas moyen, et je m'jutchi sus une tchaîthe pour vaie tout ch'qu'i's'passait.
Mais ch'tait joli à vaie, par exemplye!
Les décorations étaient vraiment éblouissantes, et la musique était parfaite.
Ch'est d'tchi drôle que la danse, tout d'même.
Je n'peux pas vos en donner une description.
Les hommes prennent châtchun lus hardelle avec une main alentou d'la taille et avec l'autre main entrelachie dans ses daigts li allouogne le bas par en d'sus d'la tête et l'travaille “up and down” comme une brimballe de pompe, tout en tournaillant et dgéthottant en gardant l'temps avec la musique.
A la fin d'châque danse le maître d'cérémonies allait pendre une carte sus la muthaille pour annoncer la genre de la préchaine. I'y avait des “Two Step,” des “Boston” des Maxina” des Fox Trot” et je n'sais tchi mais je n'y viyais pas grand difféthence, mé.
Quant vint un temps je vouli changi de position et m'appréchi pus près d'la musique mais quand j'êprouvi à marchi sus l'plianchais pour crouaîsi la salle, il 'tait aussi êcriyant comme une pièche de glace, et j'failli de m'drotchi, sapresti!
Avec le temps je vins à dêcouvri qu'i' y'avait un appartement ouest qu'nou pouvait aver de sandwich, des gâches et des rafraîchissements et ch'était là que j'passi la pus grand' partie d'la séthée.
Il y faisait bouan là d'dans et comme la plyie ne cessait pas je n'tais pas une mie prêssi de m'en r'vénin.
Le temps s'passi si bain tréjous qu'il 'tait chinq heuthes quand je r'vins siez-nous.
Je criyais naturellement que Marie Hibou était couochie et dormait paisiblyement, mais dame nouffait!
Oulle 'tait jutchi sus le d'grét d'haut, à la porte d'not'e mansarde, comme une sentinelle à faithe la garde, et j'mantchi bain de choper par sus lyi.
Ou c'menchi à faithe un tintamarre de fé et à m'traiter d'touos les vices.
Ou vouli saver si j'avais dansé, et quand j'lis dis qu'nennin, ou m'raîponni que j'tais un menteux et que si j'm'en allais continuer comme ch'la,ou n'savait pas tch'est qui s'en allait dév'nin d'mé, et ainsi d'suite.
Ou m'en a voulu tout l'temps d'pis et comme d'habitude j'avais c'menchi la nouvelle année en hertchin.
Ch'est pourtchi, j'allons bain.
Mais n'y a pas d'soin, je m'en vais prendre des leçons d'danse mé, car savous-bain, je crai que j'y ai prins goût.
Caouain
Les Chroniques de Jersey 5/1/1924
Viyiz étout: