Les Pages Jèrriaises

La Nouvelle Année


Une autre annèe est horte,
Une autre annèe j'salue!
Mil-neu'-chents-d'ghix est morte;
Mil-neu'-chents-onze est v'nue!

Le bouan houmme Temps, avec sa faux,
A passè par ichin.
I' riait, le vi, dans sa barbiche,
Et sembliait s'dithe: "Pour mé, j'men fiche;
Va-t-en, mil neu' chents' d'ghix; i' faut
Que tu suives tan destin."

Tch'est qu'tu'as pour nous, nouvelle année,
D'la peine ou du pliaisi?
Si je l'savions, séthion-je contents?
Eche mus d'n'en saver rein d'vant l'temps?
Fortune est-alle, chutte fais, touannèe
Du côtè d'notr' foyi?

Je crai que j'voudrais pouver lièthe
Un mio dans les fliyets
De tan livre d'pus d'trais chents pages.
J'voudrais vais tchic-z'uns des présages
Au sujet d'mé, et d'mes affaithes.
- Oh! je n'sait tch'est qui y'est!

P't're du halître et des r'frédeuses?
Et, sus les jouaintes, des êcorcheuses?
P't'être des suèes d'fraid et des maux d'tête?
(I' disent que ch'est l'pus haut d'la bête!)
P't'être ètou, quand veindra l'êtè,
D's'indigestions, - car y'a d'itèt,
Quand nou-z'a trouvè l'fruit si bon
Qu'nou-z'en a yeu pus que d'raison?
Tchic mauvais cor' et des poulettes?
(Les bottes d'nos jours sont si mal faites!)
Un fichu stud de temps en temps
Qui nos f'tha faithe de laids serments?
Des taques de graisse sus braies et qu'minses
Dès la prumié fais qu'nou l's'a minses?
Tout plien d'travas quand j's'sai lassè
Et que j'voudrais bein être au lièt?
Pour ch'la: ch'est seux, - coumme dans l'passè:
Il est une heuthe oprès minnièt!!

Elie
2 Janvi 1911

 

Viyiz étout:

 

Les Pages Jèrriaises