|
Jé m'en vais faithe tout chein qué j'peux Pouor m'amender ch't' année. Et châque matîn d'vant man mitheux Jé m'en vais l'èrpéter. Jé m'en vais pratitchi bein dû; Jé m'en vais pèrdre du paids; Et liéthe des livres qué j'n'ai pon liu Et l's èrliéthe deux'trais fais. Jé m'en vais r'nonchi la feunm'thie (Excepté tchiques cigares) - La viande, jé n'm'en vais pus mangi, (Sauf l'angné et lé lard). Jé m'en vais prendre acouo du frit Tchi m'donne mes vitaminnes. Et pis r'nonchi la bouaissonn'nie (Sauf tchiques vèrrées dé dginne). Man travas, i' faut qu'j'lé finnîsse Sans êt' haut et ouaîthif. J'm'en vais tchitter lé cannabis; Adgi à touos ches splyiffes! Man marchand d'drogues - lé pouôrre baloque - Plieuth'tha mén amendement. I'n's'en va pon vendre autant d'coc- aïne ou trantchilisants. Ma bouonnefemme es'sa bein heutheuse: J'l'aim'thai pus fort qu'janmais. (Toutes ches hardelles dé vie douteuse Es'sont bein hortes d'la vaie) Pouor des guénipes, jé n'm'en vais pus Les vîsiter souvent. Ou, au mains, quand j'tap'thai à l'us, J'lé f'thai assez s'grètement. J'm'en vais cêssi ma filméthie D'vidgos pornographiques - Mes tantes achteu d'mandent d'êt' payies Avant d'mouontrer lus triques. Jé n'm'en vais pon tuer les vaîsîns Coumme jé soulais dévant. V'là tchi causait bein trop d'hèrtchîn - Et trop dé taques dé sang. Et châque matîn d'vant man mitheux Jé m'en vais l'èrpéter: “Jé m'en vais faithe tout chein qué j'peux Pouor m'amender ch't' année.” Geraint Jennings Novembre 2002
|
Viyiz étout: