Par les côtis j'avons couoru,
De belles flleurs cuillant;
Mais j'avons travailli bein du
Depis l'vier temps.
Pour l'amour du vier temps, allons,
Pour l'amour du vier temps,
J'bérons ensemblle ocouo, j'bérons,
Pour l'amour du vier temps.

Nouos deux j'avons jouè l'long des doûts
D'solèi l'vant à couochant;
La mer a ronnè entre nous
Depis l'vier temps,
Pour l'amour du vier temps, allons,
Pour l'amour du vier temps,
J'bérons ensemblle ocouo, j'bérons,
Pour l'amour du vier temps.

Ne v'là ma main, man vier garçon,
Et la tqienne je prends;
De bouan coeu j'nouos divertirons
Pour l'amour du vier temps.
Pour l'amour du vier temps, allons,
Pour l'amour du vier temps,
J'bérons ensemblle ocouo, j'bérons,
Pour l'amour du vier temps.

De convier tu ne r'fus'ras pon,
Bein seux j'en f'rai autant;
J'bérons ensemblle ocouo, j'bérons,
Pour l'amour du vier temps,
Pour l'amour du vier temps, allons,
Pour l'amour du vier temps,
J'bérons ensemblle ocouo, j'bérons,
Pour l'amour du vier temps.

Ph'lippe Langliais  

(vèrsion datée 2/2/1872 dé Ph'lippe Langliais, s'lon l'mannuscrit)
 

Oubllierait-nou ses viers accoints
Ses anmins, ses parens?
Oubllierait-nou ses viers accoints
Les jours du vier temps?

Pour l'amour du vier temps, allons,
Pour l'amour du vier temps,
J'bérons ensemblle ocouo, j'bérons,
Pour l'amour du vier temps.

De convier tu ne r'fus'ras pon,
Bein seux j'en f'rai autant ;
J'bérons ensemblle ocouo j'bérons,
Pour l'amour du vier temps.

Nouos deux j'avons fait des touffiaux
Et couoru par les camps,
Mais j'avons fait bein d'aut' travaux
Dépies l'vier temps.

Nouos deux j'avons le long des douts
Jouè quand j'éqtions êfants,
La mer a rouabllè entre nous
Dépies l'vier temps.

Ne v'là ma main, man vier anmin,
Et la qtienne je prends ;
Amusons-nous jusqu'au matin
Pour l'amour du vier temps.

Pour l'amour du vier temps, allons,
Pour l'amour du vier temps,
J'bérons ensemblle ocouo, j'bérons,
Pour l'amour du vier temps.