San Antonio, Texas,
USA.
Lé jour dé l'An, 1977.
Moussieu l'Rédacteu,
Nouos v'la arrivés au preunmié jour dé mil neu chent septante-sept, et j'espéthe qué chu Jour dé l'An s'en va êt' lé c'menchemént dé trais chent souoxante-chîn bouans jours touos vous en Jèrri. Et j'lé souhaite étout à tous m's anmîns n'împorte dans tchi partie du monde tch'i' s'trouvent. J'mé r'souveins du temps qué quand nou souhaitait eune bouanne année à un anmîn i' rêponnait tchiquefais, en riant, “Véthe, man vyi, eune bouanne année d'canard!" Y'avait d'l'extension au but dé ch't' expression-là tchi n'tait pon d'ûsage parmi les pus raffinés, mais j'm'en vais vouos laîssi la d'vinner ou la trouver dans l'dictionnaithe! I' faut aver vêtchu dans l'pâssé pour saver les vielles expressions. I' n'taient pon tréjous d'la sorte qué nou faîsait sérvi à l'Êcole du Dînmanche ou en compangnie des danmes et des d'mouaîselles, mais nou savait garder sa pliaiche dans les vièrs temps et nou s'comportait accordamment en lus présence.
Hélas! I' y'a d's anmîns tchi n'ont pon veu l'Noué tchi veint dé s'pâsser, ni chu Jour dé l'An. L's années s'entre siévent vite à m'suthe qué nou vieillit, et y'en a tréjous ieune tch'est la dreine sus tèrre pour tchitchun. Ch'est un sort tchi nouos est rêsèrvé à tous, et ch'est eune bouanne chose qué jé n'savons pon l'heuthe dé s'n arrivée. Comme nouos l'dit La Litourgie d'l'Églyise et l'nénantième sieaume, en pâlant d's années. “Elles sont comme un songe, au matin, comme une hèrbe qui se change; Laquelle fleurit au matin, et reverdit. Le soir on la coupe et elle se fane!” J'veins d'êrchéver la triste nouvelle, dans une lettre, qué Moussieu Arthur Harrison n'est pas. Un vrais moussieu Jèrrais d'belle présence et souos touos rapports ouaithe tch'il eûsse un nom Angliais. Janmais j'n oubliethai sa bouanté, sén encouothagement et sa généthosité quand L'Assemblée d'Jèrriais, dé tchi j'fus l'preunmié ségrétaithe, fut fondée y'a vingt-chînq ans. I' nouos ouffrit eune pliaiche gratis dans les colonnes dé la “Jersey Evening Post” pour èrcorder les rapports mensuels dé nouos rêunions. J'lé rencontrais souvent dans chu temps-là car jé d'meuthais dans la Rue Phillips, tout près d's offices dé la gâzette, et i' mé d'mandait tréjous pour des nouvelles au sujet du progrès d'L'Assembliée. Nou peut mème dithe tch'i' méthite d'êt' considéthé iun d'ses beinfaiteurs.
Un aut' décès qu' j'èrgret d'aver ouï la nouvelle est l'chein d'Madanme veuve Betchet, la m'mèe à m'n homme d'affaithes, Moussieu Edgar John Betchet, Êcrivain, à l'âge dé nénante ans. Tchi bel âge! Et tchi charmante et dîngne danme tch'a pâssé l'pas. Ou pathaîssait acouo en bouanne santé, et bein allante, l'êté pâssé quand j'la viyais tchiquefais auve iun d'ses fis à L'Êta au Dînmanche auve lé gracieux souôri qu' oulle avait pour tout l'monde. Acouo un aut' mio d'Jèrri dispathu. Ch'est une lettre du Docteu Fraînque Le Maistre, OBE, tchi m'a donné les tristes nouvelles dé ches deux décès, car la dreine gâzette èrchue d'Jèrri est du c'menchement d'novembre. Ch'est auve un sîncéthe sentiment qué j'fais part dé mes r'grets à Madanme Harrison et à Moussieu et Madanme Edgar Betchet.
Tch'est qu'la Nouvelle Année nouos apporte? Bouân Dgieu seul lé sait. Nou n'sait janmais tch'est tchi nouos pend sus la tête, comme nouos l'dit l'vièr diton. Mais i' faut tréjous vivre en espéthance. V'la tchi m'ramémouaithe qué quand l's anciens pâlaient d'un mousse tch'apprannait bein à l'êcole, ou d'un janne homme tchi faîthait san c'mîn comme i' faut dans sa vocâtion et tchi s'comportait bein, i' disaient: “Nou bâtithait un châté sus s'n espéthance!” Eh bein, j'espéthe qué j'pouvons bâti des châtchieaux sus l'espéthance dé bouannes récoltes et d'eune bouanne année pour touos les Jèrriais tch'ont à gangni lus vie dans les clios à la sueu d'lus front et à l'înjuthé du temps, et qu'oulle en s'sa ieune dé bouanne chance dé prospéthité et d'bonheu pour toute l'Île.
Ichîn en Améthique, jé c'menchons la Nouvelle Année atout un nouvieau Président à Washington. Un tas d'nous, consèrvateurs dans l'âme, èrgrettons d'vaie l'Président Gerald Ford, homme juste, întégre et solide, aver à abandonner l'siége présidentiel, mais j'soutaitons quand-même eune gestion heutheuse pour lé nouvieau Président, “Jimmy” Carter, et profitabl'ye pour les États-Unis.
Espéthons, étout, qué l'année 1977 s'en va apporter la paix du Bouân Dgieu, “laquelle surpasse tout entendement” - comme nouos l'dit La Litourgie - partout l'monde. Nouos anciens disaient: “I' vaudrait mus n'aver qu' un r'pas par jeu et vivre en paix!” Eh bein, ch'est bein seux qué si toutes les nations décidaient d'vivre en paix l's eunes auve les autres, i' pouorraient toutes en profiter et mangi trais r'pas par jour en mème temps!
George d'La Forge
Viyiz étout: