Les Pages Jèrriaises

Pas d'autre "Chronique."

Ah, ça! chute fais ichin, en v'la assez,
Crouaisiz man nom dé d'sus vos livres,
Pas d'autre "Chronique" pour mé opprès ch't'annaie,
Vot' gâzette n'est pus digne de vivre.

Ou voulez sans doute saver mes raisons;
J'm'en vais vos donner tout d'suite,
En faisant tchiques compathaisons,
(S'ous imprimez chennechin, "vot' poule est tchuite"!)

Dépis l'Education Obligatouaithe,
Je comprenons un mio l'Angliais,
La pus grande de mes filles peut même le liaithe,
Et j'trouvons ch'la bain c'mode tchiquefais.

Ils apportent l'Evening Boast dans not' canton,
Nos gens l'accattent de temps en temps,
Et siais yun d'nos vaisins ouais qu'je hantons,
Y prennent le Chimes dépis deux ans.

V'la des gâzettes, au mains, qu'ont des nouvelles.
Nous est au couothant de ch'qui s'passe,
Y vos disent t'chest qui prêche dans les chapelles,
Et l'prix des mouaithes quand ya d'la passe.

Quand les pavés d'la ville sont êcriyants,
Les bidets n'manquent pas d'lus gaveler,
Chest une chose qui s'arrive assez souvent,
Mais jamais ou nouos l'faites à saver.

Si un lieutentant s'decide à sorti l'ile,
Ch'la change not' forche militaithe,
De nouos djerni y vos s'sait bain facile,
Pourtchi qu'chest l'Boast qu'a tout à faithe?

Pour vos montrer combain qu'ous êtes l'arrièthe
Liaisiz dans l'Chimes les biaux sermons
Par Samuel Valle et John Dory san frèthe.
V'la ch'qui faudrait dans vos colonnes!

Selon vous, les Squanderers n'existent pas,
Les Squeezers vous sont inconnus,
Vot' reporter trouvethait trop d'embarras
De grapiner l'Mont-ès-Pendus.

Le Boast et l'Chimes sont bain pus up-to-date
Y peuvent nouos dithe dans deux colonnes,
Que Fox tappit la balle avec sa tête,
Et l'envyi par sus l'Pavillon.

Ya une autre chose, dé tchi qu'jé veur me pliaindre
Jamais n'donnez d'publicitai
Ais At Homes de l'élite, pas même la moindre
Accompte de not' belle sociêtai.

Les autres papiers y'envient lus r'presantants,
Qui vont lus faufiler partout.
J'aime bain qu'nou m'vaie tchiquefais parmi les grands,
Et qu'les gâzettes en pâlent, surtout.

Et pis les dames, ou n'en faites auchune note,
Qui saient bain habyllies ou pas,
Pour vous la robe de Madame Bergamotte
Vaut pas la peine d'en faithe de cas.

Ch'qui m'fait mârri oquo pus qu'auchune chose
Chest vot' "Caouan." Ah! si j'lé t'nais,
Je gage que j'le f'thais avaler une "dose"
Qui l'settléthait à tout jamais!

J'm'en vais vos dithe sa derniéthe escapade;
J'étions siez man couôsin l'aut'e sai,
Sa jeune femme nouos offri - d'la limonade,
Et s'en fut vaie si l'iau cauffait.

Je ouîmes un brai! Ou tchi sans connaissance,
Et quand ou r'vint à yi, chennetait qu'des plieurs,
Ou nouos dit, "Mes garçons, j'ai mauvaise chance,"
"Le dgueux d''Caouan' 'tait jutchi sus l'dampeur."

J'allons vos envier des réclamations,
Oulle a 'tait malade un mais tout entchi,
Y s'en est suivi des complications
Et oulle a - eh bain, y faut erkémenchi!

Monte Cristo
1908
 

Viyiz étout:

 

Les Pages Jèrriaises