Visite à la Cour Rouoyale
Passant nonante membres lus rêunîtent vendredi, l'27 dé mai 1960, pour la rêunion mensuelle et, pus important, pour eune occasion spéciale, quand les membres fûtent hardi favorisés d'aver Moussieu lé Bailli, Messire A. M. Coutanche, à lus montrer la Cour Rouoyale et la Chambre d's Etats.
Un coup tous assis dans la Cour, Moussieu lé Bailli, fit la beinv'nue ès membres et dit tchi pliaisi qué v'la tchi lî faisait d'lus faithe un discours entouor la Constitution d'Jèrri.
L'histouaithe c'menchait en 912 A.D., quand des navigants v'naient des pays Scandinaves lé long des riviéthes pour envayi les difféthentes pliaiches et, dans nout' cas, avaux la Seine jusqu'en Nouormandie souos l'c'mand'ment dé Rollo, dé tchi qu'à la fin lé Rouai Charles Chinq dé France cédit ès attaques à Rollo, qui d'vint maître dé Nouormandie, ouestqu' bein d'nos anchestres démeuthaient.
En 1066
La préchaine date importante fut 1066, quand Dguilleaume lé Conquérant d'vint siexième Duc dé Nouormandie dépis Rollo et sans doute en c'mand'ment d'Jèrri ouestqu'i' n'y eut pon grand chang'ments, car les gens 'taient pauvres et vivaient bein simplyément. Dans chu temps 'chîn, Rouën 'tait la capitale du Duché dé Nouormandie. Dans chutte scarmouche, lé Bailli dit qué l'Député d'St. Ouén disait, et avec raison, comme il a souvent, que "J'tions du bord des gagnants".
En 1205, Jean, lé Rouai d'Anglyétèrre, tchi perdit la dgerre contre la France et d'vint nout' Duc, dit qu'i' s'en allait protègi l's Iles dé la Manche contre la France et fit bâtti l'Chàté d'Mont Orgueil. Chu rouai nos donnit eune constitution - nos louais - et l'drouait d'êlithe dé parmi nous douze "Juratos" (Juges) et un Bailli pour couorre l's affaithes en général. Pus tard lé Bailli et les Juges app'litent les douze Recteurs et les douze Connêtablyes, et dévièrs 1448 ches 36 méssieux, auve lé Bailli en tête, d'vîntent lé preunmié Parlément dé l'Ile, jusqu'à l'année 1771, quand l'publique ont voulu saver la difféthence entre faithe les louais ou les jugi, et ont formé l'Code et s'pathé l'pouver dé iun ou d'l'autre.
En 1860 des Députés ont 'té ajouaints, iun par pàraisse dé campagne et trais pour St. Hélyi, et pus tard six pour St. Hélyi. Rein né r'changi sinon auprès la Libéthation, quand bein du monde qu'avaient 'té hors pays criyaient qué la constitution 'té à la vielle mode et avait besoin d'être changie. Les Etats fûdrent r'rormés pus tard auve la permission dé la Commission Rouoyale. Dans chu cas ichîn les Recteurs n'étaient pus part d's Etats, sinon l'Doyen, et les Juges 'taient rempliaichis par des Sénateux, qui 'taient élus pour neuf ans, quatre à changi touos les trais ans, et douze Députés pour St. Hélyi. trais pour St. Sauveux, deux pour St. Brélade, St. Cliément et St. Louothains, et iun par pàraisse autrement, êlus pour trais ans.
Lé Bailli nos explyitchit comment qué les difféthents conmités sont r'formés auprès chaque êlection.
La Chambre d's Etats
Un coup chu bouan discours fini les gens ergardidrent les portraits dans la Cour et filidrent lé travers des offices du Bailli et pis dans la Chambre d's Etats. Ichin étout Moussieu lé Bailli nos fit un p'tit discours et nos montrit la Masse. I' nos en donnit touos les détails et dit comment qué, en 1662, lé Rouai Charles avait donner l'ordre qué fallait tréjous qu'ou feusse portée l'avant au Bailli ; lé janne Jean Le Maistre eut l'honneur dé la r'porter hors dé la Chambre des Etats et la r'mettre à sa pliaiche.
Eune chose bein intérrêssante 'tai l'urne qu'est faite servi pour haller les noms des membres du Jury pour les Assises.
Ermerciernents
Lé Président, l'Sieur H. M. Gibaut, ermercyit Moussieu l'Bailli bein sincéth'ment pour nos aver fait l'honneur dé nos avei si bein èrchus et pour un discours si intérrêssant, qué ch'est bein seux les membres lus en rappel'lont pour longtemps.
Les affaithes
De vièrs neuf heuthes et d'mie les membres erfilitent pour la Salle d'Agritchultuthe pour les affaithes dé la séthée, qui fudrent courtes.
Pour c'menchi, lé Président fit le beinv'nue à Mme. E. J. Luce, qui 'tait auve nous pour la séthée et dit comment qué j'étions tous si rédévablye à s'n homme pour toutes les poésies et chansons qu'il avait composer sous l'nom d' "Elie". Mme. Luce ermercyit l'Sieur Gibaut et dit qué v'la tchi l'avait fait grand pliaisi d'passer eune séthée auve L'Assembliée.
Lé rapport du mais d'avri fut liu et accepté et deux nouvieaux membres d'êlus.
Lé Président annoncit qué la préchaine rêunion essait l'service annuel, à la Chapelle Méthodiste dé St. Ouën, dinmanche. lé 26 d'juin, à 3 heuthes l'arlévée.
Evening Post
11/6/1960
Viyiz étout: