Les Pages Jèrriaises

Aux armes, citoyens!

Ah ça, garçons, chute semaine, je m'en vais vos pâler sérieusement.

Ch'la vos veindra probablyément comme une surprinse que l'bête de Caouain, opprès avé niolliné toutes ches années ilo, se mette à pâler sérieusement, et i' y-en aitha parmi vous qui pens'sont p't-être bein qu'i' faut qu'je s'sais malade ou bein que je qu'menche à v'nin en êfanche.

Mais nouffait, ch'n'est pas chenna du tout, jamais j'n'au 'tai en miyeu santé, mais je sis d'opinion que l'moment actuel est tout-à-fait inopportun pour se livrer à des êcrituthes frivoles.

* * * *


Le cri a rétenti par toute l'île: 'Aux armes! citoyens,' et j'ai grand r'gret de constater qu'à l'heuthe que j'êcris ches lignes ichin, la raîponse qu'ou z-avez donné à 'tai diversément tchède et médjocre. Quant à mé, j'en ai 'tai péniblyément surprins et je m'sis êpaîgni auchun êffort pour tâchi de dêcouvri tch'est qu'i' peut en être la cause. Je crai bein que je sis en risque d'en offenser tchiqu'uns d'vous si je pâle ouvertement, mais n'importe, je connais man d'vé, et avec mé v'là tchi veint d'vant toutes choses.

Si je n'vos connaissais pas comme je fais, i' me s'sai bein facile de m'rangi avec, et d'partagi les voeux de touos es êtrangiers qui, au temps qu'il est, contemplyent avec intéthêt votre attitude et je pouorrais, comme ieux, vos condamner en un seul mot et vos dithe - "Ou z-êtes des cowards!"

Mais che s'sait vos faithe une injustice.

I' n'y-a rain de ch'la dans votre constitution, ou z-êtes les d'cendant de ches vaillants Jêrriais-là qui en 1781 défendirent notre île contre les maraudeurs qui voulaient s'en empather. Ch'est l'même sang qui coule dans vos veines et personne ne doute pour un moment que souos les mêmes circonstances ou vos jetéthiez avec le même enthousiasme et avec le même élan contre auchun ennemin qui ose'sait êprouver à mettre le pid en Jêrri.

Nennin, nou n'peut pas vos appeler des poltrons.

Ch'est un vice, ch'tis-là, qui n'est pas dans la race. Nou z-en vait la preuve touos les jours, L'armée et la marine angliaise contiennent appréchant de mille garçons jêrriais qui sont presque tous au combat et i' n'se passe pas un jour que nou n'constate tchique actes de bravoure et d'héroïsme de la part de tchiqu'un d'ieux. Mais ils ont besoin d'aide et de temps en temps i' tendent les bras presqu'êpuisés, du bord de Jêrri et vos crient en vain: Quand est-che qu'ou z-allez v'nin?

Ou z-avez tous ouï chu cri-là et oquo ou n'bougiz pon!

Tch'est don qui vos tcheint? Ou n'savez pas? Eh bein, j'm'en vais vos l'dithe, mé!

Ou z-êtes des êfants gâtés! Je sommes à vos souogni trop bein, si bein qu'ou z-êtes venus à en prendre avantage et en compathant votre sort avec le sort des soudards qui sont dans les tranchies, ou dites à vous-mêmes: Oquo au but d'tout, je sommes à faithe not'e dévé et je sommes bein péyis pour; ch'est pourtchi aussi bein rester ichin.

Mes pouores garçons, criyiz-mé et n'entretenez pas de patheils sentiments.

Si ch'est qu'ou z-êtes bein péyis, pensez que ch'est car un gouvernement généreux le veur bein. Liaisiz l'article 1er de la Louai sus la Milice et ou verrez qu'i' dit: "Ce service est gratuit, personnel et obligatoire." I' n'est pas tchestion d'être péyis tant la s'maine avec des allouanches pour vos femmes et vos êfants. Si i' n'y avait pas rain de tout chenna, je sis seux que i' y-en des chent d'entre vous qui dithaient: I' m'ennyie ichin mé, je m'en vais volunteerer, aussi bein être là-bas comme ichin.

Allons, garçons, attendez pas que che s'sait des intéthêts personnels qui vos poussent à y-aller, montrez un mio d'patriotisme et envisagiz la chose d'un point d'veue un mio pus noblye. La patrie est en dangi et l'résultat d'chute djerre ichin essa ressenti par vos d'cendants pour pus d'un siécle.

* * * *


Une autre cause - et la principale, peut-être - pourtchi que l'recrutement traîne comme chenna, est l'opposition de la part des méthes de nos garçons.

Je sis dans la position de pouver affirmer que i' y-a des chents de nos jeunes soudards qui brûlent d'envie de lus enrôler parmi les volontaithes, mais 'memmée' lus a d'fendu de faithe patheille chose. "Jamais je ne f'thais un d'gout d'bouan sang, man garçon!" "Che s'sait m'donner l'coup d'la mort! As-tu idée de tuer ta pouore méthe?" et ainsi d'suite.

Je voudrais adresshi deustreîs patholes à ches estimablyes méthes-là.

Mes chiéthes femmes, je comprends exactement les sentiments qu'ou z-êprouvez et j'admithe l'amour filiale que toute bouanne méthe ressent pour les siens, mais réfléchissez don pour un moment que le p'tit sacrifice qu'ou faites en vos s'pathant de votre garçon pour tchique temps n'est rain à compathaître ès souffrances qu'ont souffert vos soeurs belges en viyant lus pathents et lus êfants êgorgis devant lus ieux et dans bein des cas violées ieux-mêmes par les monstres inhumains du Kaiser.

Séyiz bein erconnaissantes que ch'était votre destin d'être à d'meuther ichin en Jèrri, en pliaine seutheté, grâce à notre position insulaithe et à la puissante protection de la fliotte angliaiche. Av'ous pensé que les méthes de garçons sus l'continent ne sont pas consultée quand au service militaithe de lus fils, mais sont obligies de lus contenter?

A la pliaiche d'y mettre empêchement, ou devethiez être ordgilleuses de pouver contribuer à l'anéantissement de l'ennemin par encouothagi vos garçons à lus ruer contre li.

Pensez don, chelles d'entre vous qu'allez les garder à l'abri d'vos cotillions, dans tchil êtat d'esprit qu'ou vos trouvethez quand la djerre es'sa finie et qu'ou verrez vos vaizinnes aver la jouaie de r'vaie lus héros ervénin couverts de glouaithe et d'médailles, ordgilleuses du fait que ch'est lus garçons qu'ont aidji à cliergi la terre de la vermine basbare qui l'obsédait.

Votre conscienche ne vos êpaîgn'na pas, mais vos forchetha à compather ches braves garçons-là avec le gros poupèt qu'ou z-éthez gardé siez-vous à vos aidgi à acchumuler d'la rente et les conforts de tchi ou z-éthez êtudié en lis mettant ses souliers à caouffer dans l'fender et en lis rôtissant des châtaignes au sé, tandi que l's autres étaient dans les tranchies à pataugi dans du mortchi jusqu'au genou et à ristchi lus vie pour vos prêserver votre liberté!

Le prospé n'en est pas joli, est-che pas? Eh bein, don, faites vot'e dévé! Enviez-y touos vos garçons, et ch'est vous qu'en récoltéthez l'honneur et la jouaie.

Et vous, garçons, raîponnez comme les braves qu'ou z-êtes, à l'appel -
"Aux armes, citoyens!!"

Caouain
12/12/1914
 

Viyiz étout:

 

Les Pages Jèrriaises