Dans l'vaîsinné pêtcheux d'La Rocque aut'fais y'avait eune bein aimabl'ye et bein bouonne janne fil'ye, du nom d'Marguérite. Oulle 'tait grâcieuse et belle étout, et oulle avait un galant tchi s'appelait Hébert, un fort et brave janne homme.

Mais malheutheusement Hébert n'était pon satisfait dé m'ner sa vie trantchilement, mais 'tait hardi emporté pouor les histouaithes dé faîtchieaux et même les ségrets d'la chorchell'lie. I' s'prom'nait souvent tout seu dans l'mitan d'la niet et chèrchait étout les lieux hantés.

Eune niet, étant lâssé, i' s'assiévit au pid du Rotchi d''Rocque Bèr et pus tard s'endormit. Quand i' s'rêvilyit i' restit tout êbahi d'chein tch'i' vit. Par eune lueu brillante i' viyait des faîtelles ravissantes voltilyant à l'entout d'li, et ieune sustout, ses bieaux longs g'veux à banon au gré d'la brise, les ièrs plieins d'amour et d'eune bieauté séduisante, lé fit oublier sa Marguérite. Il en tchit en amour et lî tendit les bras. Ou lî promînt dé r'vénîn là la préchaine niet, li disant qu'oulle 'tait en amour dé li étout. Là-d'ssus les fantômes dispathûdrent, et Hébert s'en r'fut siez li, sé d'mandant si chein tch'i' v'nait d'vaie n'était pon auprès tout un bieau rêve.

Quand, lé lendemain au matin, les gens du vaîsinné ouîdrent pâler d'l'aventuthe à Hébert du sé dé d'vant, Marguérite en eut l'vent étout. Ou s'en fut trouver san galant et l'suppliyit dé n'y'aller pon, à Rocque Bèr, lé préchain sé. Mais i' s'mârrit et dit qu' rein n'l'en empêch'chait, et i' s'sauvit en faîthant des juthements.

La niet v'nue, Marguérite lé vit s'n aller et, toute triste et les lèrmes ès yeux, ou s'mînt à genouors à prier l'Bouôn Dgieu. Et pis ou s'en fut trouver l'Minnistre. "As-tu la fouai, m'n êfant? Et as-tu l'couothage d'aller toute seule pouor lé sauver?", lî d'mande lé Minnistre. "Oui, j'ai la fouai, et l'Bouôn Dgieu m'n donn'na l'couothage", ou lî réponds. "Va, don, et prend chutte Crouaix auve té.... Tu l'sauv'thas", dit l'Minnistre.

A travèrs la niet néthe et eune tèrribl'ye tempête Marguérite s'en fut. Arrivée à Rocque Bèr, ou vit chutte même lueu êbliouissante, mais san chièr Hébert entouré d'laies criatuthes èrpugnantes faîthant lus sabbat en dansant et heurlant sans cêsse.... Les belles et ravissantes faîtelles dé la niet dé d'vant étaient changies en vielles et âffreuses chorchiéthes. Lé feu lus sortait des ièrs, et lus grîns m'nichaient dé dêchither l'mînséthabl'ye Hébert !

Mais, comme un êpart, tout ch'la s'en fut! Dans la présence dé la Crouaix touos ches dgiâbl'yes fichîdrent l'camp d'un ambrôn, en faithant des cris tchi n'avaient qué d'touônner les sens à Marguérite, laîssant Hébert êtendu par tèrre, êvanni mais sauvé par lé pouver d'la fouai et d'l'amour.

Et nou dit qué acouo d'nouos jours nou peut vaie à cèrtaine pliaiche sus l'Rotchi d'Rocque Bèr la forme d'un chabot du Satan, chein tchi rappelle la victouaithe dé chutte niet-là y'a trais ou quat' chents ans.

Françot