Quand j'tais mousse – pus ou mains à l'âge quand j'quémenchis à r'garder Top of the Pops à la télé – David Bowie eut un hit auve sa chanson “Life on Mars”. La chanson n'a pon vraînment hardi à faithe auve la Rouoge Plianète, mais tout l'monde est tréjous fascinné par la pôssibilité d'vie sus chu monde vaîsîn. Nou s'avait même creu vaie des cannieaux sus la plianète et înmaginné des grandes villes toutes plieinnes dé p'tits vèrts hommes.
H.G. Wells êcrivit un livre entouor “La Dgèrre des Mondes” – et quand Orson Welles en fit eune vèrsion sus l'radio en Améthique en 1938 y'avait un tas d'monde tchi c'menchîtent à pannitchi, criyant qu'des Martiens avaient d'sembèrtchi pouor dé vrai.
Mais ch't'année y'a eune pôssibilité qu'j'allons dêcouvri s'i' y'a ieu d'la vie sus Mars, quand la fîsée Ûropéenne “Mars Express” s'en va arriver en orbite et lanchi l'attèrrisseux “Beagle 2”. Ché s'sa un bouôn présent d'Noué pouor les Martiens, car l'attèrrisseux dév'thait d'sembèrtchi sus la surface d'la plianète lé vîngt-chînq dé Dézembre.
“Beagle 2”, tchi fut bâti par eune êtchipe Britannique, s'en va chèrchi pouor des sîngnes dé vie. S'i' trouve qu'i' y'avait des microbes y'a des millions d'ans, ch'est s'sa hardi întérêssant. Et s'i' y'a des microbes achteu, v'là tch'êmoûqu'tha eune vraie sensâtion.
Y'a-t-i' d'la vie sus Mars? Nou n'sait pon acouo - mais eune chose est seûse: lé Sieur Bowie s'en va r'chéver acouo un tas d'sou ch't'année d'ses rouoyautés sus sa chanson!
Geraint Jennings
2003
Viyiz étout: