à Portinfé, Saint-Ou,
Vendredi au sé.
Moussieu l'Editeu,
Il est sept heuthes et d'mie et l'vent tch'a gâté tout l'jour ne semblye pas aver molli. Ch'est minséthablye que l'jour tchi d'vait être si mémorabllye pour tant d'personnes aie té ruiné par une fichue tempête. Ch'tait bein difféthent y'a quarante ans quand le Rouai George et sa Reine vintent nos visiter. Chu jour là la chaleu 'tait si excessive que la pouôre Reine se trouvit mal, et le Rouai en n'tait si gêné que le chauffeur d'la vouaituthe royale avait l's ordres de faithe la touônée des pâraisses dans aussi p'tit d'temps que pôssiblye. Les gens le long d'la route ne vitent que d'la poussièthe, et y'avait grand désappointement partout l'Ile. Mais le Rouai avait raison, car le jour de d'vant li et sa Dame avaient 'té en Djernézi, et ou n'avait pas yeu l'temps de se r'faithe de sa fatigue. Mais chutte fais i' n'y a yeu ni solé, ni poussièthe, mais un vent tch'a cru tout l'jou et tchi continue au moment.
Ch'est du bein drôle de temps pour le mais d'mai, mais la Merrienne a ocquo dans l'idée que y'a des grandes chaleurs à v'nîn. Pâslant d'chonna, Moussieu, j'attrapis un coup d'solé y'a un couplye d'jours tchi me mint si faillyi que quand vint l'sé je n'pus pas me deshabillyi sans aide. Ch'est tchiquechose de bein drôle et bein traitre qu'un coup d'solé. La Merrienne, après m'aver aidgi à ramonter les d'grès pour me couochi, eut l'affront de m'dithe que yun d'ses onclyes, un vrai riboteur, se pliaignait tréjous d'un coup d'solé quand i' souffrait de yunne de ses ribots. eh bein, Moussieu, tout ch'que j'espèthe ch'est qu'oulle en attraptha yun tchique jour, pour li apprendre à ne fichi pas de san bouonhomme quand il est souffrant comme j'si a ch'teu'.
I' pathait que deux ou trais d'nos grands mêssieux eûtent bein d'la peine à trouver lus liet le jour d'la Libéthâtion. Y'a même une histouaithe scandaleuse concernant yun de chais braves hommes, tchi s'trouvit, en s'révillant l'préchain matin, dans un liet êtrange, et auve d'la compagnie êtrange étout. Mais, comme ou savez, Moussieu, y'a souvent pûs d'scandale que d'véthité dans d'pathelles histouaithes.
Si chein qu'la gâzette nos a dit est véthitablye, y'a d'bouonnes nouvelles pour nos fermiers, car lûs patates se vont être transportées ch't' année à miyeu marchi que l'année pâssée. Ch'est tréjous tchiquechose Moussieu. Dans l'marchi en Ville chutte semaine, y'avait des patates nouvelles à quatre ch'lins la livre, et i' m'semblye que ch'est un mio fort. Partout l'Ile a ch'teu' les patates s'en veinnent à grands pas, et j'm'attends qu'à un mais ou siez s'maines d'ichin nou pouôrra l's accater à un prix raisonablye. Autrement i' faudra que j'arrête ocquo une pôse pour man fricot d'nouvelles patates avec tchiques tranches de gras lard.
Sûs un autre sujet, la gâzette nos dit que jusqu'ichin j'n'avons pas yeu le nombre d'visiteurs tchi 'tait v'nus à chutte saison l'année pâssée. Quant à la Merrienne, Moussieu, ou dit que ch'est tant mûs et que y'en étha tréjous assez, et même trop. Mais i' faut considéther que les visiteurs dêpensent un tâs d'sous dans l'Ile, et que, franchement, j'n'pouvons pas nos en pâsser. La pièthe en est qu'en Angliétêrre à ch'teu' les gens ont tout plien d'sous, et peuvent aller en Espagne, en France ou même pûs lyien. I' faut nos accouôtumer à chonna, et réaliser que les grands jours du tourisme sont bétôt finis. I' faut que nos hôteliers réduisent lûs tarifs et les pensions étout, autrement notre p'tit Jêrri pouôrrait s'trouver dans d'mauvais draps. Si nos visiteurs ch't' année dêpensent accordant à lûs moyen, et accatent des articles de valeur tout pouôrrait aller bein, mais s'i' s'contentent avec tchiquechose à bouon marchi comme nou vait dans tant d'boutiques, Jêrri ne profit'ta pas hardi à lûs visites. Ch'est des dêpenseurs tchi nos faut, pas des touristes comme les deux couplyes tchi vintent tapper à la porte l'année pâssée et d'mander si j'pouvions lûs donner des chambres et d'la nouôrrituthe pour un tchinzejours. Quand la Merrienne lûs d'mandit s'i' taient mathiés, yunne des hardelles voulit saver tchi difféthence que chonna pouvait faithe, sûs tchi ou lûs freumit la porte au nèz.
Le vent soufflye ocquo, Moussieu, et j'crais, la Merrienne étout, tch'il est temps d'nos couochi.
Ph'lip
Gâzette du Sé, 15/5/1963
Viyiz étout: