Les Pages Jèrriaises

Crufts 1909

A Moussieu l'Editeu.

Man chier Mess Bisson.

J'sis un brin ammateu' de t'chens et coumme mé v'là à Londres pour tchique petit'temps, j'pensi qué j'dévrais aller vaie "Crufts" Dog Show; - je veur vaie autant des "sights" ichin tandi' qu'j'y sis.

Mé v'là dont hor' Vendredi l'arlevée en route pour Islington: j'arrive au Agricultural Hall, j'paie man chelin et j'y entre. Ah! tchi bri! Sûs l'catalogue je vai qu'y avait trais mille chinq chents entrés. 'Ou p'vez don y's'imaginer lé tinet que ches tchens là faisaient. Y'en avait dé tout' les sortes: tout' sorte de gens avaient améné lus tchens là, - dans'pis Sa Majesté la Reinne, jusqu'au "bank-clerk." Y'avait dont dé tchi vaie, - tchens et gens: et j'vos prommets qui y'avait dé t'chi oui' étout: les bêtes ouassaient et hurlaient dé tous bords: ichin et là tchicun criiais "Be quiet!" à un tchen,- et i faisait pus d'bri qu'l'anima; d's'hoummes braillaient qu'y s'avaient des catalogues à vendre.

En m'proum'nant l'long des rangies d'cages jé dis à mé-maîme: "Né v'là ti pas des bêtes tchi ont 'té nés sous ses êtelles dé chance." Dans l'fond des cages nou' vyiait des morciaux dé viande - des boutelles dé lait, et imaginous - jé vis unn' boutelle à champagne dans dans y'un des compartiments. Je n'vos di pon qué ch'tait du champagne qu'y y'avait dans la boutelle, ni qué chè qu'y y'avait dans la boutelle 'tait pour lé tchen; - mais v'là cha què j'vi'. Dans unn' aut' cage sé trouvait lé "muff" dé la dame à tchi qu'était l'tchen; l'anima, qui n'tait pas for' pus gros qu'man poieng, 'tait à dormi d'dans, et nou' l'y vyiait la t'cheue en d'hors du "muff." La paourre bête ristchait de happer fré dans la t'cheue, chûte chierre bête. Un mio pus y'inn' y'strouvait un tchen qu'avait unn' belle drette raie touô l'long l'mitan d'son dos, justément coumme la sienne qué j'ai au bord dé ma tête: Son poiël avait 'té brossé des deux bords ov hardi d'goût, ch'tait certain. J'm'apprêche dé li en grugeant unn' galette. (J'en avais acaté avant d'entrer - je n'l'avais pas prinse d'dans yunne des cages). I' m'ergarde y' chatchi sa tcheue deux 'trais fais, - j'compris bin. Tout bouonnement j'li offre la mintchi de ma galette. I' 'tait content: mais y'n tenait pas oquo la galette. Unne grande hardelle se piante vite ent' mé et la cage et m'saisis par lé bras et en tappant lé plianchais ov san p'tit pi ou'm m'dit: "No, Sir, you shall NOT feed Mac."

J'pourrais presque empyi la Nouvelle Chronique ov lé restant dé cha qu'oumm' dit. J'la r'gardi de haout en bas, et j'pensis à mémaîme - je n'osis pas li dire "Si t'es mariée qu'je pyiains t'n'houmme," - et tout paigneux je m'es fus deviers unn' aut' cage ouaique je tâchi d'oublié man malheu en catouillant ov un brin d'pâlle, un terrier pierrt'cheux qui dormait.

Après chounna, je m'mêts à examiner les gens tchi 'taient lâ alentou' d'mé. Y'avait un houmme t'chi explitchait à unne jeunne "Miss" la biauté qui vyiait dans la fache d'un bull-dog. Pus y'in jé vis unne personne sus un 'scabelle: J'me fis "Tchest qué je vé là?" Oulle avait unne robe, les g'veurs copés ras coumme unn' houmme, un col au co coumme mé, un chapé - jommais je n'verrai d'ité de ma vie; et unne brosse à peindre dans la bouoche, coumme si ch'tait un long cigare. J'la regardi longtemps et j'dis à mémaîme que chlà dévait être unne femme, pourtant. Oulle 'tait à faire le portrait d'un t'chen. Je cré, sav'ous, qué ch'tait là unne Suffragette. Oui, j'lé cré. Ou' voudrait être coumme unn' houmme: ou' port'ra betôt des t'chulottes.

Jé m'en vas deviers lé but du Hall ouêque je vé deux trais "nurses" mâtées d'bu auprès d'un "Stand." Ch'tait des "nurses" à tchens. Si vot' tchen, Mess Bisson, kiopinne à cause des rheumatisses enviez pour y'unne d'elles pour li frotter d'l'embrocation autou' d'la hanque et du d'jerret: ou bin, s'i toux, ou' li dounna les seoins et la médecine qu'lé vétérinaire li arr'commendra. Je vos asseure qu'ê sont bin utilles: nièt è jou' les v'là prêtes à donner les pus p'tits seoins à vot' tchen malade.

J'ai veu tout: j'men vais à la porte, au d'hors des brèques, je vé unn' d'jinque d'aviers de touos âges: unne botte à un pi, unne chavette à l'aut'; lus bottes sont sans semelles: lus bas perchis tchaient sus lus bottes; leurs braies sont en chiques: y' gêle, et y' n'ont rin au co: - Hélà, dé pensé que les tchens en d'dans mangent et bèvent tant qui veulent: viande, galettes, chocola, lait et champagne: des couoissins môs à s'couchi d'sus et des "muffs" à dormi d'dans. Des "nurses" à les seoigni quand les maîtres et maîtresses craient qui n'sont pas bin: et de vaie ches mousses là à mintchi nus, qui cherchent unn' bouochie d'pain, qui sont p'têt' maîme sans "home."

D.A.E.C.
Londres
18/II/09

La Nouvelle Chronique de Jersey 20/2/1909


 

Viyiz étout:

 

Les Pages Jèrriaises