à Portinfé. Saint Ou.
Vendredi au sé.
Moussieu l'Editeu,
Je n'crais pas que j'peux qu'menchi mûs agniet que d'mentionner les élections pour Sénateur et pour les Députés. Quant ès Sénateurs, je n'peux pas vaie que la situâtion a hardi changi dépis la s'maine pâssée: ch'est á dithe y'a ocquo chinq candidats pour les quatre vacances, mais personne n'pathait saver pour seux tchesqu'i' s'en va tchais de d'sous. La Merrienne a s'n idée là-d'sûs et mé j'ai la menne, et je n'sommes pas d'accord, mais quand j'ai offert de li gagi une pièche d'étchu que man candidat étha pûs d'vouaix que l'sien, ou n'a pas voulu m'prendre. Nou-s-éthait espéthé que tchiques autres candidats se présent'taient mais jusqu'ichîn j'avons 'té desappointés. I' n'est pas ocquo trop tard, et si j'tais un mio pûs jeune j'crais que je m'métt'rais sûs les rangs. Si j'n'y v'nais pas, tant piéthe, mais si j'y v'nais, j'pouôrrais tréjous résigner par cause de mal santé. La Merrienne, tchi n'est pas de trop bouonne humeur chais jours, m'asseuthe que sans autchune diffitchulté, j'pouôrrais trouver un docteur à certifier que je n'sis pas trop bein dans ma tête. Je n'crais pas que ch'est un bieau complyiment!
A ch'teu' pour les Députés. Y'en a chinq, la gâzette dit, tchi n's'en vont pas r'prendre, mais je n'crais pas que dans la Campagne y'étha hardi d'élections contestées, sinon à Saint Sauveux, ouèsque la Missis Green est oppôsée par une Missis Perkins, tch'est une Communiste tchi m'semblye d'aver pûs d'couothage que d'bouon-sens. Je n'li donnons pas hardi d'vouaix. ma bouonnefemme et mé.
Y'étha, sans doute, pûs d'rêmouage dans les trais districts de Saint Hélyi, et nou-s-entend que le Norman Le Brocq s'en va r'êprouver pour la traisième ou quatrième fais. Il a appréchi un mio pûs près chaque coup, mais, avec chonna, j'crais que méme à ch'teu' i' n'trouv'tha pas assez d'support. Comme je l'ai dit d'vant, il a toute la capacité nêcessaithe et ch'n'est pas l'couothage tchi li manque. Mais il est un Communiste et les Jêrriais n'veulent aver rein à faithe avec chais gens-là. Nou-s-entend que l'Sieur Cronshaw pouôrrait prendre et si ch'est vrai, j'li souhaitons tout succès, la Merrienne et mé.
Nou-s-a yeu grand r'gret d'entendre de la mort de Paul de Villiers du sud d'l'Afrique. De touos l's ach'teurs que Jêrri a connu, i' n'y en a pas yeu san supérieur. Ch'est bouonne nouvelle qu'i' laisse un fils tchi' s'en va continuer l'commerce.
Les deux jeunes filles tch'avaient mantchi sont r'venues saines et sauves et tout est bein, mais la Merrienne dit que si ch'tait à li - mais nouffé, Moussieu, je n'ôse pas vos dithe tchèsqu'ou f'thait, car j'comprends que dans la Prîson les femmes ne sont pas tréjous bein confortablyes, même avec de bouons r'pas et l'privilège de sonner la clioche toutes les fais tch'i' veulent se l'ver dans la niet.
Le sujet du tunnel souos l'Fort Régent, que nou pensait aver 'té abandonné, a 'te résuscité dans l's Etats et s'en va être décidé, d'un bord ou d'l'autre, le préchain mais. Il a 'té suggéthé que touos chais vacabonds tchi donnent tant d'peine au public et à la police, s'saient mîns à creûser au lien d'être enfreumés dans la Prîson et s'saient bein pûs utiles là. Si, par malchance, i' s'en trouvait tchiques doûzaines êcrasés par chein tchi pouôrrait tchais d'sûs, j'crais que Jêrri n'les manq'thait pas fort.
A ch'teu', pour nos fermiers et tchultivateurs, car ch'est ocquo sûs yeux que la prospéthité de l'Ile dépend en grande m'suthe. Jêrri a vêtchu sans les visiteurs d'vant agniet, et quand i' n'en r'veindrait pas yun, ou pouôrrait ocquo subsister sûs les produits d'la têrre. Nou peut s'faithe seux que l'idée n'pliaîthait pas á nos hôteliers, mais s'ils avaient à s'mettre à défoui des patates ou haller sûs un griffon, i n'en s'saient que d'mûs en santé. Et ch'est tout ch'que j'ai à dithe agniet. Ch'est pourtchi, Moussieu, jusqu'à la s'maine tchi veint.
Ph'lip
Jersey Weekly Post 9/11/1963
Viyiz étout: