à Portînfé,
Saint Ou.
Moussieu l'Editeu,
Tchi dommage qu'les bouonnes vielles couotumes dispathaissent. Quand j'tais mousse, lé preumié jour d'Avri était l'jour pour jouer des farces à ses amîns, ses vaisins et à des gens qu'nou n'aimait pas. J'me r'souveins qu'une bordée, quand j'avais chînq ou siez ans, que ma mèthe mé donnit une p'tite boutelle et m'dit d'aller à la boutique pour du lait d'pigeon. Quand, à la boutique, j'présentis la boutelle et d'mandis pour du lait d'pigeon, la femme drièthe lé compteux souôrit et m'dit de faithe ses complyiments à ma mèthe, et d'li dithe qu'oulle avait pas une goutte parsqu'oulle en avait yeu tant de d'mander chu matîn-là. Quand je r'vîns siez-mé, ma mèthe, mes frèthes et mes soeurs se mîntent à rithe, et chein tchi m'fit mârri l'pûs ch'tait que quand man pèthe r'vînt pour e tais, i' rit pûs haut et pûs longtemps que tout l'restant. À ch'teu j'peux vos dithe que y'a une trentaine d'années ou d'même je jouis une farce à la Merrienne, mais j'éthais deu saver mûs, car, pour mé puni, j'en eus pour une bouonne tchînzaine dans la câsse à tchan. La Merrienne ne pouvait apprécier l'humeur d'la farce que j'li avais joué, et j'prins bouon soin de ne r'quémenchi pas. Comme j'vos l'ai dit pûs d'une fais, Moussieu, les femmes sont drôles!
La grande nouvelle chais jours ch'est qu'en Angliétêrre y'étha une grande demande pour nos nouvelles patates jusqu'au mais d'Juîn, et même pus tard. Ch'est une chance que nos fermiers n'avaient jamais yeu, et il est à espéther tch'i' s'en vont en profiter, et que tout l'profit n'îtha pas pour péyi les frais des marchands. avec le temps pûs doux chais jours, ma bordeuse a miyeu mine toute les vîngt-quatre heuthes, et j'm'attends de pouver la dêfoui d'vant la fîn d'Mai. J'vais fouôlli ichîn et là trais ou quatre fais par jour, pour m'asseûther que y'étha une bouonne récolte, et chein que j'vais est tout à fait satisfaisant. La Merrienne dit que j'pouôrraimes ocquo aver une aube-gelée ou deux, mais quant à mé, j'crais que la fraid est finie, et que j'allons aver un bel êté. Quant ès vîsiteurs, la bouonnefemme a 'té bein contente d'lièthe que prèsque tous les nouvieaux-mathiés ont fichi lûs camp. Mais comme ou dit, les gens dans la Campagne tch'ont un mio d'avis dév'thaient s'apprivisionner contre l'învâsion de touristes tchi s'en vont nos tchais sûs l'co bein vite.
Quant ès Etats, Moussieu, comme dé couôtume nou n'sait pas ouèsque nou-s-en est. La grande tchestchion du Code de djais-sept chent septante-yunne fut souol'vée mardi, mais i' y'avait yeu tant d'autres choses à distchuter que quand vînt l'heuthe du diné, quand un nombre de membres avaient laîssi la Chambre, lé Président dêcidit contre la suggestion de siégi dans l'arlévée, dîsant, avec raison, qu'la tchestchion du Code était trop împortante pour un d'mié-jour. Et, donc, ou fut laissie d'côté, au grand desappointement d'un certain membre, tchi criyait, sans doute, qu'avec une Chambre à maintchi viède, i' pouôrrait gagni san point. Dans l'pâssé, Moussieu, nou-s-a veu des sujets d'une grande împortance décidés à la dernié minute, sans donner l'temps ès membres tchi restaient de réfliéchi à tête reposée. Lé fameux 'Douard Lé Tchesne, tchi savait comment s'prendre, était tréjous là pour prendre avantage d'la situâtion, et trouvait assez d'supporteurs pour li aidgi à faithe des bêtises.
"Mais," s'fit la Merrienne, après aver resté trantchille pour tchiques minutes, "en liêsant la gâzette, j'ai veu que y'eut hardi d'sous votés ès difféthents comités, et chein tchi m'êtonnit pûs que tout l'restant, ch'tait d'vaie que man couôsîn, l'Ernest Lé Cornu, fut donné une somme pour continuer lé fameux tunnel souôs l'Fort Regent. Veur-tu m'dithe que l'travas s'en va continuer?"
"Chein tch'i' donnîtent au Comité des Travaux Publics," j'li dis, "était une p'tite somme pour continuer à creuser pour vaie tchèsqu'i' s'en vont trouver, mais chonna n'veur pas dithe qu'le tunnel s'sa fini. Oulle est à peine qu'menchi, et, en autchun cas, i' n'faut pas bliaumer lé président agissant, car j'doute hardi s'il 'tait jamais en faveur du tunnel. Ne t'gène pas, Merrienne, oulle est un bieau but d'être finie, lé fichu tunnel, comme étout d'autres projets sanctionnés quand l's Etats avaient lûs moments dé folie."
"Eh bein," ou s'fit, "j'espèthe que tu as raison, man Ph'lip, mais à ch'teu tchèsqu'en est pour lé Sénateur Farley, et chutte salop'thie tch'il appèle du 'sludge'? Est'che décidé tchi s'en va être apporté dans la Baie pour înfecter tout l'vaisiné?"
"Nennin, Merrienne," j'li dis, "mais il est évident que l'Sieur Farley n'a pas oquo abandonné l'idée. I' veur dithe que n'y étha pas d'odeur, et qu'après que sa saleté étha 'té exposée à l'air frais et sain d'la Baie d'Saint Ou, les fermiers ne s'sont que trop contents de v'nîn la cherchi pour mettre sûs lûs têrres. I' n'faut pas oublier que quand l'Sieur Farley a tchiquechose dans la tête, i' n'est pas l'homme pour perdre couothage. Quand i' s'mînt sûs les rangs pour Sénateur, nou li donnait pas une chance, mais il y vînt quand même."
"Vèthe," ou s'accordit, "et sûs bein des sens ch'est un homme que nou peut admither, mais, avec chonna, je n'comprends pas pourtchi que ch'est les mielles dans la Baie d'Saint Ou tch'il a chouaisi."
"Et ouèsque tu voudrais l'envier chu 'sludge'?", j'li d'mandis.
"Autchun bord sinon ichîn," ou raîponnit "Par exemplye, pourtchi n'le dépôser tchiques milles dans la mé, pûs près d'Djernézi?"
"Lé Sénateur, sans doute, ne voudrait empouaîsonner le bieau paisson tchi s'trouve le long des côtes de Djernézi," j'li dis, "et sans autchune doute i' lév'thaient la Cliame dé Haro. Nou n'peut pas faithe chonna, Merrienne, et après tout les Djernésiais né nos ont pas fait d'ma."
"Y'a ma vielle souôsine tchi d'meuthe au Tortévâ," ou dit. "J't'en ai pâslé tchiquefais d'la vielle biche. Je n'li veur pas d'mâ, mais j't'asseuthe que si j'entendais yun d'chais jours qu'oulle avait crevé, j'n'îthais pas à s'n entêrrement."
"Y'a d'bein drôles dé gens en Jêrri étout," j'li dis.
"Sans doute," ou raîponnit, "mais i' n'y a pas s'n êgale ichîn. Quand tu pense que la dernié fais que j'fus la vaie, ou n'me donnit pas même une tâsse dé tais, et mé tchi 'tait si lâssée que j'avais d'la peine à me t'nîn d'but."
"Ah!" je m'fis, "nos y v'là. Ch'tait la tâsse dé tais que tu n'eus pas tchi t'fit si mârrie!"
Ph'lip
Viyiz étout: