M'n'ambition a tréjous été d'avèr une job souos l's'Etats car pouor seur ch'est la millieur mannièthe d'gagner hardi d'sous sans s'tuer d'travas.
J'criyais que chutte fais j'avais buanne chance viyant que j'avais oui que les siens du Coumité d'Agritchulture avaient décidé d'plianter chinquante vrégies de patates aux frais des Etats. J'savais que les siens qui avaient mâté ch'est patates avaient été bein payis. Donc, j'attendais qu'nous décide de la date d'la planterie pouor que mé et l'Sieur Caouain nous ait partie de chutte job.
Mais encouore une fais, nous v'la touos les deux désappointés d'pis que les autres Messieurs des Etats se sont mâris et n'veulent pon entendre raison au sujet de chutte planterie.
Quand j'apprins chunna l'autre sé, viyant que j'avais l's'esprits bas, j'décidi d'm'n'aller faithe une petite touornée dans les paraisses d'amont. Couomme ch'tait un Dimanche et que j'm'trouvais dans la paraisse de St. Ou, j'pensis su j'tais jutchie sus ieun des bouais oprès la chapelle j'aurais grand plaisi à ouir l'orgue jouer et le choir chanter. Donc, m'v'la hors et sus mon jutcheux j'attendis que l'service couommence.
J'vit un tas de grands d'la paraisse lus amener et j'fut bein surprins en les viyant s'arrêter à ergarder sus la board à l'entrée.
J'pensi à mé même, ch'est p't-être un poster pouor annoncer tchique anniversaire ou bein tchique prédication par un missionnaire des Indes ou d'la Chine mais touot d'même pouortchi que nos gens qui lisent chu poster font si longue fache?
Et couomme j'sis un miot tchutieuse d'ma sorte, viyant quele service était couommenchi et que les siens qu'ont tréjous l'temps d'arriver en r'tard étaient éttouot entrés, bé vite j m'apprêchi et sus chutte board j'lut:
Service pour demain Dimanche.
Morning, 10.30, Rév. Jas. Vasselin
Afternoon, 3.30, Mrs. F. Le Feuvre,
Evening, 6.30, Pastor Ph. Bauche
J'n'y comprenais mot car j'crais connaitre quassiment touos les prédicateurs en Jerri et plusieurs d'entre ieux sont de mes amins, mais jamais j'avais oui pasler de chest noms là et encore bé moins j'n'savais pon qu'il y avait une dame prédicateur.
Mais ch'n'estpon touot car je r'tourni me jutchi dans ieun des bouais de chutte chapelle, l'préchain Dimanche. Ch'est qe viyous, j'pensais que jen apprendrais un p'tit pus long et que que p't'être bein que l'poster voulait dithe que ch'tait l'préchain Dimanche que chès nouviaux prédicateurs lus f'raient entendre.
Donc, m'v'la ès écoutes quant touot à coup j'entendais des rires d'hardèlles!
Bon, que j'pensi à mé même tchi qui lus prend pouor rithe d'même dans un lieu de tchulte! Ch'est honteux que de s'comporter d'même pendant que Moussieu l'prédicateur est à lus faithe sa prédication. Moussieu l'prédicateur ly même fut bein surprins et couommenchi à r'garder pouor saver chein que chunna voulait dithe. Ch'est alors qu'il s'aperchu qu'il y avait touote une nichée d'oisiaux qui voltigeaient dans touos les sens!
Les pouores oisiaux n'savaient pon coumment lus sauver. Encouore heureux qu'ils n'allites pon lus muchi dans les tuyaux d'l'orgue!
Eh bein, savous buannes gens que couomme pouor l'poster que nous avait clieuthé sus la board en dehors la chapelle, ch'tait une farche d'pus par une djingue de jeune corps qui lus pliaisent à inventer touotes sortes de tricks! Fouai de Marie Hibou, chunna est la pure, pleine et entièthe vérithèt. Ch'tait par une fenêtre buchie qu'ils avaient envié dans la chapelle, au moment du service, une demi douzaine d'oisiaux!!
Tout d'mèmech'n'est pon de tchi faithe sinon pouor donner du travas ès chantgniers pouor tâchi d'happer les oisiaux et les avaient envièth à voltigi d'même dans la chapelle.
Mais v'la qui n'est pon touot car l'affaithe continue et si dans touot chunna il y a tchi risible pour quant à mé ch'n'est pon dans une chapelle qu'nous devrait jouor dithèt farces.
Nos gars savent bein qu'ordinairement ch'est l'chantgni qu'est l'prumi à sorti d'la chapelle oprès le service mais chutte fais ce n'fut pon ly mais une jeune hardelle, qui fut fort effritée! Et il y avait de tchi car savous chein qu'oulle vit? Une gambe coupée!! Et l'pid dans un soulier!!!
Ch'tait une cauche en soie couleur de chair de sièz Woolworth, faut craithe, qu'nous avait stuffé! Tout couomme un épeutha! Et nos gards l'avais minse à laporte de la chapelle!
J'sais bein qu'il y a ieut d'autres tricks de jouées dans chutte paraisse et j'en sais hardi long sus l'affaithe d'une pathe d'leunettes qui mins sus pid ieun des grands de chutte paraisse, mais touot chunna s'ra pouor la préchaine bordée viyant, couomme s'fait l'boss “Que c'est faute d'espace disponible”dans la gazette d'annièth.
Ch'est d'antchi, à bétôt,si j'sis encouore de chu monde de minsèthe.
Marie Hibou
Les Chroniques de Jersey 8/3/1930
Viyiz étout: