| 1500 | La tchaîse du Bailli d'Jèrri tchèrpentée. Oulle est à tchiques pouces pus haute qu'la cheinne du Gouvèrneux. |
| 1502 | Preunmié mention des Chent'nièrs dans les r'cords d'Jèrri. |
| 1505 | Les pus vièrs r'cords d'la Cour Rouoyale d'Jèrri date dé ch't' année. |
| 1510 | Eune Charte du Rouai Henri Huit, Duc dé Nouormandie, confirme les libèrtés d'l'Île d'Jèrri. |
| 1517 | L'drein prieux d'l'Islet appointé en Jèrri. |
| 1518 | Eune achie d'peste en Jèrri oblyige la Cour d'siégi dans eune maîson partitchuliéthe à Grouville. |
| 1519 | Lé Douoyen d'Jèrri, R'chard Mabon, èrvénu d'un pèlerinnage à Jérusalem, bâtit eune chapelle sus La Hougue Bie dans tchi qu'il înstâlle eune statue mécannique d'la Vièrge et d'aut's souô-disantes mithacl'yes (mais tout chenna pouôrrait êt' du niolîn raconté par des protestants). |
| 1524 | Lé preunmié Acte èrcordé d's Êtats d'Jèrri. |
| 1533 | L'export dé fronment d'la caûchie d'St. Aubîn en Jèrri attatchi par des batchieaux Brétons d'St. Mâlo. |
| 1537 | Messire Douard Seymour, bieau-fréthe du Rouai, appointé Gouvèrneux d'Jèrri. |
| 1541 | Deux Connêtabl'yes assèrmentés pouor la Pâraîsse dé St. Hélyi. Ch'est la seule fais qu'eune pâraisse en Jèrri en a deux. |
| 1542 | Lé Gouvèrneux d'mande qué L's Êtats d'Jèrri envyient deux habitants au Parlément d'Westminster. Rein n'est fait. |
| 1543 | Un Acte des Êtats d'Jèrri pèrmet ès Chent'nièrs d'porter des bâtons. |
| 1548 | Des c'mandes du Rouai Douard Six, Duc dé Nouormandie, à pitchi bas les crouaix ès c'mîns en Jèrri. Les statues et l'vèrre dé couleu dans l's églyises sont bûchis, et les muthâles sont blianchies. |
| 1549 | Jèrri est attatchi par des Français. |
| 1550 | Eune Litourgie en Français est înmprînmée à Londres et env'yée en Jèrri. |
| 1551 | La preunmié mention dans les r'cords d'la Ville d'St. Hélyi en Jèrri. |
| 1552 | Les clioches des églyises d'Jèrri vendues à seule fîn d'finnancyi des fortificâtions. Châque églyise n'en garde qu'ieune. |
| 1553 | La Reine Mathie Preunmiéthe, Duc dé Nouormandie, veint au trône. Lé Catholicisme est formellement rêtablyi, mais lé Calvinnisme né pèrd pon d'înfluence siez les gens d'Jèrri. |
| 1558 | L'arrivée en Jèrri d'un fliotchet d'Huguenots. |
| 1562 | Eune Charte d'la Reine Lîzabé Preunmiéthe, Duc dé Nouormandie, confirme les libèrtés d'l'Île d'Jèrri et dit qu'les îlemans n'éthont pon à compathaître d'vant les cours Angliaîches. |
| 1562 | Lé c'menchement des procès contre les chorchièrs. Des dgiêxaines dé gens s'posées êt' du grand sang es'sont exétchutés jusqu'en mil siêx chents souaixante |
| 1564 | Lé preunmié Synnode Calvinniste des Îles d'la Manche. |
| 1565 | Hélyi d'Cart'ret, Seigneu d'St. Ouën en Jèrri, autorisé par la Reine Lîzabé Preunmiéthe, Duc dé Nouormandie, à colonniser Sèr. |
| 1568 | Lé transfèrt formel des Îles d'la Manche du dgiocèse dé Coutanches au dgiocèse dé Winchester. Mais chenna n'a pon grand êffet viyant qu'les minnistres Calvinnistes n'acceptent pon l'autorité d's êvêques. |
| 1576 | L'adminnistration Calvinniste des églyises des Îles d'la Manche est accordée. |
| 1577 | L's entèrrements n'sont pus pèrmîns dans l's églyises en Jèrri. |
| 1580 | L'êvêque dé Coutanches rencontre un env'yé du Pape à seule fîn d'complioter eune învâsion d's Îles d'la Manche - mais sans rêsultat. |
| 1582 | La preunmié mention dans les r'cords dé Jèrriais à la pêque à Tèrre-Neuve. |
| 1583 | Les Paids du Rouai êtablyis au Vièr Marchi d'Jèrri. |
| 1584 | "Les Chroniques de Jersey", histouaithe en Français, êcrites. |
| 1586 | L'Angliais William Camden, dans san livre "Britannia", mentionne l'ouvrage dé cauches en Jèrri. Ch'est un grand export dé l'île. |
| 1587 | L'exétchution d'Mathie, Reine d'Êcosse, en Angliétèrre. Oulle est habilyie en blianches cauches dé Jèrri. |
| 1588 | La chant'tie et la cont'tie tchi n'sont pon respectabl'yes ès veilles en Jèrri sont dêcliathées contre la louai. |
| 1590 | Un înginnieux Angliais, Paul Ivy, est env'yé en Jèrri à seule fîn d'entreprendre la fortificâtion d'L'Islet dans la Baie d'la Ville. |
| 1591 | La Cour Rouoyale dé Jèrri dêcliathe qué touos les cheins tchi vont d'mander d'l'aîgue siez des chorchièrs es'sont bârrés dans l'Vièr Châté à mangi du pain sé et d'l'ieau pouor un mais. |
| 1593 | Lé Vièr Châté d'Jèrri est laîssi tchaie en d'lacres. Ch'n'est pus pôssibl'ye d'lé d'fendre contre la tith'thie d'canons. |
| 1594 | L'èrmueûthie du Gouvèrneux d'Jèrri du Vièr Châté au nouvieau Châté Lîzabé bâti sus L'Islet. |
| 1595 | Un Acte quémande qu'lé vîn sait gouôté par l'Bailli et les Juges avant qu'un aubèrgiste piêsse lé vendre en Jèrri. Les Connêtabl'yes et les Chent'nièrs, ieux, éthont à gouôter la biéthe. |
| 1596 | Louothains Baudains donne du bein ès Êtats d'Jèrri pouor la fondâtion d'un collège. Auprès tchiques années les sou sont faits sèrvi pouor env'yer des jannes Jèrriais ès Unnivèrsités d'Oxford et d'Cambridge en Angliétèrre. |
| 1597 | Un Acte dé l'Assembliée d'la Pâraîsse dé St. Hélyi en Jèrri mentionne lé maintchein d'eune hôlouoge publyique dans l'églyise. |
| 1598 | Ch'n'est pus alloué ès femmes d'Jèrri d'aller au lanchon sans lus hommes, lus péthes ou lus maît's. |
Viyiz étout: