Le Ménage ès Feuvres,
St. Ouën.

Lé 19 d'octobre, 1974.

Moussieu l'Rédacteu,

Si les muthâles du Vièr Châté pouvaient pâler, en éthaient-i', man bouanhomme, des histouaithes à nouos raconter! Dans les Chroniques de Jersey par George S. Syvret, j'tais à en liéthe ieune tchi s'pâssit dans l'temps qué Sire Hugh Poulet, Chévalier, Capitaine dé Jèrri, avait l'châté comme san siège. Hélier de Carteret, Seigneur du Fief Haûbert et Seigneurie dé St. Ouën, 'tait Bailli.

Auprès qué Sire Hugh Poulet avait 'té un coupl'ye d'années Capitaine dé l'Île (il avait 'té nommé en 1550), et tch'il 'tait houors en Angliétèrre, ayant laîssi san fis Âmice en chèrge du châté, lé Bailli d'Carteret y'allit, au châté, lé Jour dé l'An pour souhaiter bouanne année au Sieur Âmice. En r'sortant, i' donnit un êtchu au maître-portchi pour convier les soudards dé la garde.

I' s'adonnait qu'un individu nommé Thomas Cook 'tait à la porte dans l'temps, et i' dit au Bailli qu'un êtchu n'tait pon assez et tch'i' n'allait pon li donner tchittance pour autant. Lé Bailli n'y print pon d'avis dans l'temps, mais il eut cause dé lé r'gretter pus tard. Cook 'tait un mauvais sujet. Dans l'temps qué Henry Corniche 'tait Lieut'nant Capitaine dé l'Île souos l'Comte dé Hertford, il aidgait Corniche à confistchi beins et bestchieaux d'la population pour les r'vendre à profit, et quand Corniche fut rempliaichi par Sire Hugh Poulet, Cook restit comme soudard au châté.

Chutte séthée-là, Cook et quat' ou chînq aut' soudards tchittîdrent lus poste et lus en fûdrent tout drait siez un nommé Nicolas Remon tchi gardait aubèrge à Ste. Mathie, et dé là siez un Sieur Nicolas Hue, tch'était riche, et i' l'assautîdrent quand i' lus ouvrit la porte. Lé bouanhomme, tch'avait huiptante ans, sé d'fendit et en tchulbutit deux d'ieux, mais san fis Jean, sachant tch'i' n'pouvait pon en gagni contre chînq, lus montrit où'est tch'i' gardaient lus sou, et i' lus en allîdrent atout touos lus sou et argent'tie.

Lé préchain arrêt fut à Handois, siez l'Bailli d'Carteret, tch'était couochi, lî disant tch'il' apportaient des lettres d'împortance du Sieur Âmice Poulet, et san domestique les laissi entrer. Dans sa chambre i' m'nichîdrent dé l'tuer li et toute sa fanmile, s'i' n'lus donnait pon touos les sou et argent'tie tch'il avait dans la maison. Lé Bailli lus dit tch'i' n'tait pon nécessaithe dé faithe d'ité, car il avait assez d'richesses pour les chârer auve ieux. I' li prîntent sa chaine en or, tchi p'sait deux livres, et i' lus donnit chîn tasses en argent, deux douzaines dé tchulièrs et 500 êtchus. Auve des belles patholes i' fit la minne tch'il' 'tait content d'lus donner tout chu trésor, et i' lus donnit du bel et du bouan à mangi, et v'la tchi l'empêchit d'êt' assâsinné sus l'coup. Quand i' fûdrent prêts à lus en aller, il eûdrent eune distchussion à part pour décider tchi faithe du Bailli, et il' taient tous d'avis dé l'tuer, sénon iun. Ch'ti-là dit ès aut' qué l'Bailli l's avait enrichis et tch'i' méthitait d'êt' laîssi vivre. En fin d'compte v'la tchi li sauvit la vie.

Les malfaiteurs lus en fûdrent au havre du Bouôlay. Là, i' forchîdrent un pêtcheux nommé Thomas Patron à les porter en Nouormandie dans san baté. I' les d's'embèrtchi à Porbas. Dans l'entrétemps, lé Bailli avait avèrti la police, et la nouvelle du vol fut patrufliée par toute l'Île. Un nommé Gille Monchet, tchi connaîssait Cook, allait souvent à Porbas vendre des marchandises. Ayant ouï la nouvelle, il eut la surprînse dé vaie Cook et ses lârrons pâsser par dévant la Cohue dé Coutanches quand il 'tait dans chutte ville-là, et i' s'en allit tout d'suite lé dithe au Bailli du Contentîn tch'était sus l'siège dé Justice dans la Cohue. Lé Bailli arrêtit les voleurs et les mînt en prison à Coutanche et saîsit la chaîne en or et les beins au Bailli d'Jèrri tch'étaient dans lus possession au moment d'arrêt.

Quand la nouvelle dé lus arrêt fut connue dans l'Île, Sire Âmice Poulet et l'Bailli d'Carteret env'yîdrent lus agents à Coutanche pour démander au Bailli du Cotentîn dé les renv'yer en Jèrri pour êt' peunis. Comme i' fallait l'autorisâtion du Rouai d'France pour chenna, i' prînt eune volée dévant tch'il' y r'vînssent, mais eune fais r'vénus et présentés d'vant l' Maréchal du châté i' fûdrent condâmnés à mort, à l'exception du chein tch'avait pliaidgi ès aut' dé sauver la vie du Bailli d'Carteret quand i' y'avait ieut tchestchion d'l'assâsinner.

Thomas Cook fut pendu en une potence auprez dudit château sur la garande nouos dit l'histouaithe, et la corde fut copée dévant tch'i' fûsse mort et i' tchit à tèrre tout vif et pis il eut la tête copée et san corps quartelle, et tête et morcieaux fûdrent exhibés sus les tours du châté. L's aut' fûdrent pendus au gibet sus l'Mont ès Pendus à St. Hélyi. Mais l'Bailli d'Carteret n'put janmais faithe lé Bailli du Contentîn lî r'donner sa chaine en or et s'n argent'tie!

George d'La Forge
 

Viyiz étout: