Le Ménage ès Feuvres,
St. Ouën.
Lé 17 juilet, 1971.
Moussieu l'Rédacteu,
Jeanne Milne continnue à nous régaler atout ses bouannes articl'yes au sujet des monuments d'Jèrri, et en viyant l'portrait des restes d'la forêt dans la Baie d'St. Ouën, tch'était d'après M. de la Croix dans l's "Antiquités de Jersey", la Forêt de Sciscy, j'm'èrsouveins d'aver veu les raichinnes dans la baie y'a tchiques années quand eune grand' mathée, atout l'aîgue d'un rude temps, dégradit l'sablion. J'en ramissis un morcé, d'raichinne, tch'a 15 ou 18 pouces dé long, et j'l'ai prêsèrvé car ch'est rêellement un mio du tout vièr Jèrri.
M. de la Croix nouos dit qué d'vant l'année 701 nouos îles 'taient partie d'la tèrre fèrme dé la Nouormandie, et qu'au temps d'la mort dé St. Lô lé 21 septembre, 565, Jèrri n'était s'pathé du territouaithe dé Coutances qué par un p'tit canné, et qué l's habitants 'taient forchis d'fourni eune plianche à l'Archidiacre pour pâsser par dessus l'canné à faithe ses vîsites pastorales.
I' pathaît quch'tait dans l'année 709 qué la mé, dans eune tèrribl'ye tempête, englioutit la forêt. Un formidabl'ye vent du seur-vouêt soûffl'yit sans arrêt pour tchiques mais et renvèrsit les bouais dans l'sens d's direction, et atchumulit l's ieaux d'la mé et telle quantité sus nouos grèves qué la matée du mais d'mar franchit les lînmites ordinnaithes et englioutit eune grande êtendue d'pays. Mais, pathaît-i' (d'après M. de la Croix), ch'fut en l'année 860 qué la forêt fut totalement couvèrte par lé sabl'ye et la mé. Y'a eune affiche à côté du c'mîn tchi mène au Mont St. Miché, en Nouormandie, tchi dit qu'la Forêt d'Sciscy 'tait là, ch'est en tchi ou soulait couvri toute l'êtendue entre lé Mont et la Baie d'St. Ouën, et ch'tait en 860 qué Chausey d'vînt eune île, et L's Êcréhos étout, mais i' pathaît tch'i' couvraient eune bein pus grande êtendue qu'à ch't heu à ch't époque-là.
La lettre su Sieur Gould dans la gâzette du 12 juilet, 1971, nouos raconte la légende au sujet des veues pliaichis par des mauvais sujets pour faithe des navithes Espangnos s'êchouer sus la grève dans eune tempête, et voler lus cartchaisons, et comment qu'un an pus tard, en accomplyissement d'un voeu fait par un bouanhomme à bord dé iun des navithes naufragis, la mé englioutit la forêt et ches mauvais sujets-là en même temps. Eh bein, la légende est assez bein connue, mais Moussieu J. H. L'Amy, dans san livre "Jersey Folk Lore", nouos dit qué ch'tait en 1495 qué ch'la s'arrivit, et il est raisonnabl'ye dé craithe qué ch'tait pûtôt en 709 et 860 qué la mé envahit la baie et dêtruîsit la forêt.
Mais i s'arrivit un êvénement en 1495, raconté dans les pages 100 et 101 des "Tableaux Historiques" par John Patriarche Ahier, tch'est p't êt' la raison qu'Moussieu L'Amy avait l'anée 1495 dans l'idée quand i' racontit la légende dans san livre. Les mannuscrits en latîn du seigneur Philipe de Carteret pâlent d'eune grande île dé sablion dans la Baie dé St. Ouën, à l'ouest dans la mé endrait Les Tchennevais. Ou fut enlevée par les vents et couvrit Les Mielles et les campangnes à l'entou d'sablion. ch'tait l'jour dé la Saint Catherine en l'année 1495. Des tèrres tch'avaient 'té fèrtiles et labouothabl'yes fûdrent touannées en un désèrt sablionneux par lé vent d'ouest en forche d'ouragan d'eune violence extraordinnaithe. Quand j'tais mousse, l's anciens pâlaient dé ch't île-là d'sablion comme "Lé Banc du Port dé la Baie d'St. Ouën", et quand i' pâlaient d'la catastrophe tch'i' l'soûffl'yit sus la tèrre, i' dîsaient qué ch'tait "Quand lé Banc du Port rompit". Ou pouvez en vais l'allûsion, souos l'mot "rompre", dans l'Dictionnaithe Jèrriais-Français dé l'Académicien L'Maistre.
John Patriarche Ahier nouos dit, étout, qué d'après touos l's auteurs des divèrses histouaithes entouorre St. Magloire, i' bâtit, en 560, san couvent au bord d'eune grande forêt (tch'était sans doute la Forêt d'Sciscy), sus la hauteu ioù qu'l'Abbaye d'St. Hélyi fut bâtie pus tard, au mitan des belles prairies où'est tch'est l'Châté Êlizabeth à ch't heu. Ch'est acouo eune aut' preuve qué la forêt v'nait jusqu'ès côtes dé l'Île et qu'ou s'êtendait au sud d'la Baie d'St. Aubîn et d'la Baie d'St. Ouën. Les prairies, pathaît-i', 'taient entre lé couvent d'St. Magloire et la ville dé St. Hélyi, et l'îlet t'nait à la tèrre fèrme.
L'Abbaye d'St. Hélyi, bâtie sus l'empliaichement du vièr couvent, et encliavée dans les confîns du Châté Êlizabeth, dispathut en 1651 quand les troupes du gouvèrnément Parlémentaithe dé Cromwell mênagîdrent à mett' pid à tèrre et pliaichi des canons sus l'Mont d'La Ville. En bombardant l'Châté (tch'tait souos l'c'mandement d'Messire George de Carteret, louoya au Rouai Charles II), ieune des balles dé canon eut l'malheur dé tchaie sus chein tchi restait d'l'abbaye et la fît sauter.
George d'La Forge
Viyiz étout: