Le Ménage ès Feuvres,
St. Ouën.
Lé 5 d'août, 1967.
Moussieu l'Rédacteu,
Quand j'tais en France dreinement, j'allis r'vaie des pliaiches qué j'avais dêjà veues d'vant, mais, comme ou' l'savez bein, y'en a tchi sont si întérêssantes qué nou n's'enn'yie janmais d'les r'vaie. La vielle ville dé Dinan, en Brétangne, en est ieune. Dédans, y'a deux fanmeuses églyises, ieune dêdiée à St. Malo, et l'autre à St. Sauveux.
Nou n'peut pon viagi bein liain dans l's envithons d'Dinan sans vaie des pliaiches historiques tchi font mention du fanmeux Bertrand du Guesclin, Comte de Longueville (1320-1380), nommé Connêtabl'ye d'France lé 2 d'octobre, 1370, par lé Rouai Charles dé chu pays-là. J'ai tréjous 'té întérêssi dans l'histouaithe dé chu dgèrryi-là. À c'menchi, j'm'èrsouveins d'aver liu tchiquechose entouor li dans un livre d'histouaithe dé France à l'êcole Wesleyenne dans j'tais mousse, et d'aver 'té frappé par la manièthe qué l'maître nouos dit tch'i' fallait prononcer chu drôle dé nom-là! Dans des temps des p'tites choses dé même vouos restent dans l'driéthe dé la tête pour la vie!
Pus tard, en 1921, quand jé d'meuthais à Ottawa au Canada, l'Avocat Edmund Toulmin Nicolle, Vicomte dé Jèrri et Ségrétaithe dé La Société Jersiaise, m'env'yit eune copie d'san livre sus l'Histouaithe du Vièr Châté (Mont Orgueil). Dédans, i' nouos raconte qué du Guesclin fit s'n appathence en mé dévant l'châté vèrs la fîn du mais d'juilet, 1373, auve des navithes chèrgis d'soudards et tch'avaient probabliément fait vaile dé St. Malo. I' n'perdit pon d'temps. I' s'mînt à ravagi l'Île en arrivant et pis il assiégit l'châté. I' pathait qu'les soudards tch'étaient à lé d'fendre n'étaient pon là en grand nombre, et i' n'pûdrent pon empêchi du Guesclin d'prendre les fortifications dé d'houors, mais i' n'put janmais prendre la tour dé haut, et i' s'en r'fut en Brétangne.
Ouaithe qué l'châté mème resistit l's êfforts des Français dé l'prendre, i' pathaît qué l's habitants d'Jèrri eûdrent à subithe lus attaques pour deux ans d'pus, 1374 et 1375, et tch'i' n'taient pon forts assez pour l's empêchi dé v'nîn à tèrre. I' finnîdrent par aver à payi eune rançon à du Guesclin pour les laîssi trantchiles, et tch'i' continnuit à la r'chéver jusqu'à 1376. L'Avocat Nicolle nouos dit dans san livre qué l'châté avait gangni l'honneu d'êt' lé seul qué l'grand dgèrryi et Connêtabl'ye avait assiégi sans pouver l'prendre!
J'reunminnais ch'la en r'gardant la statue dé du Guesclin à Dinan, et dans l'églyise dé St. Malo j'vis eune belle vèrrinne tchi l'montre à g'nouors à r'chéver l'ordre d'Chevalier dé Charles V. Quand i' mouothit en assiégeant Chateauneuf de Randon en 1380, lé rouai voulut tch'i' fûsse entèrré parmi les rouais d'France dans l'Abbaye d'St. Denis auprès d'Paris, où'est qu'j'allis vaie san tombé quand j'visitis l'abbaye y'a tchiques années. Mais l'tchoeu à du Guesclin restit en Brétangne. Il est préservé dans l'églyise dé St. Sauveux à Dinan, et j'allis vaie l'urne dans tchi tch'il est gardé.
I' sembl'ye qué j'tais destinné à suivre ses pas chu jour-là, car j'mé trouvis à mangi l'dêjeunner Français dans l'village dé Cocherel, où'est tch'i' battit les troupes dé Charles lé Mauvais en 1364. Et pis, auprés aver visité la belle vielle églyise des Iffs, bâtie aux quatorze et tchînzièmes siècl'yes auve l'aîgue et la largesse des De Laval, Seigneurs de Montmuran, j'allis vaie l'Châté d'Montmuran mème, tchi n'est pon bein liain d'là, et j'mé trouvis dans la chapelle du châté où'est tch'il avait 'té fait Chevalier.
J'ai veu a bein prés tout ch'tcht'i' y'a d'întérêssant à vaie d'li - grand dgèrryi d'èrnommée - tch'avait tant embêté et tout probabliément machacré un tas des Jèrriais tchi vivaient duthant l's années 1373 à 1376. Il avait d'meuthé d'temps en temps au Mont St. Michel entre les bordées tch'il 'tait auve ses soudards sus l'camp d'batâle, et la chambre tch'i' couochait d'dans est prêservée là auve san liet et les meubl'yes comme il' 'taient supposés avait 'té duthant san vivant. J'pense bein qu'un tas d'vouos lecteurs, Moussieu l'Rédacteu, ont ieux-mèmes veu chen'na quand il' ont visité l'fanmeux Mont.
Quand nou liait l'histouaithe du temps passé v'la tchi vouos donne eune idée du dangi qu'les Jèrriais d'y'a siex chents ans avaient à combattre. Il' 'taient si prés d'la France qué d's aventuthiers comme du Guesclin pouvaient v'nîn d'St. Malo ou d'aut' ports dans un d'mié jour et machacrer l's habitants d'vant qu'l'Angliétèrre pûsse env'yer d'l'aîgue. Et ouaithe qué l'Île n'est pon bein grande, lé Vièr Châté n'pouvait pon la protégi en entchi viyant tch'i' fallait tréjous garder assez d'soudards dédans pour sa protection mème. Dgieu mèrci qu'les temps on changi - du mains dans chu cas-là - car lé changement et l'passage du temps amènent bein des choses tchi n'sont pon tréjous pour lé mus. J'viyons assez d'preuves dé ch'là d'nouos jours!
George d'la Forge
Viyiz étout: