Lé message dé Pâques nos pâle d'eune victouaithe. Ch'est vrai qué Vendrédi Saint avait 'té lé pus triste jour dé toute l'histouaithe du genre humain. Lé Rouai du Dînmanche des Rameaux, atcheilli auve tant d'enthousiasme, 'tait clioué à eune crouaix, souffrant la cruelle mort du malfaiteux lé pus crînminnel. Pouor ses discipl'yes et pouor la fanmil'ye dé Jésû-Christ, ch'tait difficile dé r'connaître la prophétie dans chein tchi s'pâssait. Même lé traîsième jour, lé dînmanche, ch'tait auve tristesse tch'il' appréchîtent la tombe. Saint Jean nos dit dans s'n Êvangile qué Mathie Mad'leine 'tait en lèrmes et ou ouït tchitch'un dithe “Pourtchi qu'tu plieuthes?” Tchiques s'gondes après les lèrmes avaient dispathu, rempliaichies par la jouaie dé vaie san Seigneu et san Sauveur èrsuscité. Véthe, lé d'sastre dé Vendrédi Saint avait 'té rempliaichi par la victouaithe du Dînmanche d'la Rêsurrection. Ch'tait la victouaithe d'la vie par-dessus la mort et d'la bouonté par-dessus lé mauvaîtchi.
Et lé grand mithacl'ye dé Pâques nos garantit lé pardon dé nos péchés quand j'les mettons sus l's êpaûles dé not' Sauveur sus la Crouaix dé Calvaire. Dans la priéthe, Notre Péthe, j'répétons si souvent les mots “pardonne nos offenses” et j'pouvons les dithe auve confianche sachant qué les promêsses dé not' Péthe Êtèrnel sont garanties et qué j'né sommes pus des pécheux condamnés. Mais chutte priéthe pouor lé pardon va côte à côte auve l'asseûthance qué “j'pardonnons les cheins tchi nos ont offensés”.
Dans not' monde d'aniet, où'est tch'i' y'a tant d'haine et dé r'venge, qué l'message dé Pâques et du pardon sait r'connu d'nouvé.
Brian Vibert
Viyiz étout: