Les Pages Jèrriaises

La méthe, mâtée en malheu

Stabat Mater dolorosa

La méthe, mâtée en malheu
au pid d'la crouaix, en nièr deu,
où'est qu'i' 'tait clioué, san fis.

Lé travèrs d'san tchoeu sâbrée,
atout san deu dêlabrée;
v'là tchi lî pèrchit l'esprit.

'Tait-alle hardi afflyigie
la cheinne qué nou dait béni:
du Fis Eunique, v'là la méthe!

Tchi lamentait en frémeu
et plieuthait raide à la veue
du torment d'san Fis dé glouaithe.

Tchi qu'est l'chein tchi n'plieuth'thait pon
viyant chutte lamentâtion
d'la méthe dé not' Jésû Chri?

Tchi qui n'es'sait pon grévé
en r'gardant chutte méthe dé fouai
à enhanner auve san Fis?

Pouor les péchés dé ses gens
ou vit Jésû en torment
atout un fouet fouôté dû.

Et ou vit san chièr êfant
dêdgèrpi et en mouothant,
sén êfant tchi 'tait sus l'pus.

Oh Méthe, dé l'amour un pits,
laîsse-mé dans tan deu puchi
pouor qué j'piêsse plieuther auve té.

Saque un feu dédans man tchoeu
tchi brûl'la pouor Christ man Dgieu
Pouor li'offri sus s'n auté.

Oh Sainte Méthe, s'i' t'pliaît, agi
qué sa cliouethie sait cachie
dédans man tchoeu bein avant.

J'voudrais pouor tan Fis bliessé,
tch'accordit d'souffri pouor mé,
souffri auve li êgalement.

Qué j'plieuthe acanté té dé vrai
pouor l'chein clioué à la crouaix,
acanté té toute ma vie.

Té, mé, souos la crouaix mâtés;
chârant tes plieurs à man gré,
et né v'là tch'est tout man d'si.

Vièrge dé toutes les vièrges chouaîsie
n'sai pon auve mé amièrtie
mais acanté té qué j'plieuthe.

Qu'j'atchil'ye la mort d'Jésû Chri
et tout chein qu'i' suffâtchit
commémothant ses bliêsseûthes.

Qu'j'atchil'ye étout ses bliesseûthes
et qu'sa crouaix tréjous m'asseûthe
pouor l'amour dé tan saint Fis

Quand j'brûl'lai à feu, ma Vièrge,
allige même un mio ma chèrge
quand veindra la dreine jug'gie.

Par la Crouaix, qué j'sai gardé,
par la mort du Christ èrgrée,
épis par sa grâce chiéthi.

Et quand man corps s'sa ag'vé
fai qu'mén âme piêsse èrchéver
toute la glouaithe du paradis.

Amen.
À tout janmais.

L'Églyise Catholique dé St. Matchi  

La Chapelle dé l'Hôpita  

L'Églyise Pârouaîssiale dé St. Brélade

 

Viyiz étout:

 

Les Pages Jèrriaises