Ch't' année, j'allis au Palais d'Buckingham. Ah, nou-fait, ché n'tait pon pouor ouï les patholes “Lév'-ous, Messire Geraint”, car ma vîsite fut à la Gal'lie d'la Reine dans l'driéthe du palais pouor vaie l'exhibition d'Fabergé. Tchi trésôr'rie d'or et d'argent et d'pièrres précieuses stchulptées!
Jé n'dithais pon qu'ch'est tout du miyeu goût - dé couôteunme j'aime mus les p'tites flieurs des clios qu'des flieurs artificielles faites en dgiamants et en améthystes et en saphirs et en éméraudes et en rubis. R'gardez don comme tchi qu' les lis des prés craîssent; i' n'travâlent pon, mais y'avait ieu un tas d'travas pouor fabritchi les flieurs à Fabergé. Et en viyant les câssées d'boêtes à cigarettes en méta précieux latchies et taqu'tées d'jouéyaux, v'là tchi m'fît penser qu'nou dév'thait autant aver des sérîngues en or pouor les aristocrates drodgis d'aujourd'aniet.
Mais tout coumme, chein qu'j'admithais l'pus 'tait la grande attraction d'l'exhibition: l's oeufs d'Pâques Împériaux. La Reine, not' Duc, en possède trais. Châque année lé Tsar c'mandit un oeu d'siez l'bijoutchi pouor donner à la Tsarinne. Ch'est en tchi les Russes mèrquent Pâques pus jouaiyeusément qu'Noué, et ch'est la tradition à la campangne d'peindre des oeufs dans des belles couleurs. Coumme dé raîson, nou faîthait sèrvi les richesses des minnes du pays pouor les oeufs à la fanmil'ye Împériale.
Mais quand j'pense à tchi qu'la manniéthe dé vivre des grôsses têtes en Russie m'nit à la fîn, j'sis bein content dé m'satisfaithe atout un oeu bouoilli ou ofûche iun en chocolat fouôrré d'crème.
Geraint Jennings
Viyiz étout: