À Londres, entre 1305 et 1660 nou soulait pitchi sus des pitchets sus l'Pont d'Londres les têtes copées dé traîtres. Les têtes copées 'taient exhibées ainchîn coumme des ouognons picliés sus eune froutchette pouor l'înstruction, l'amusement, et la moqu'sie du publyi. À chein tchi pathaît, les gens v'naient par mouochieaux vaie les dreines têtes - à chu temps-là les Londronnais n'avaient pon d'télévision et ch'tait sans doute l'êtchivalent d'un programme dé réalité auve des célébrités.
À ches drein l'Sieur Peter Walsh a proposé un grand pont pouor èrjouaindre Jèrri et la Grand' Tèrre. J'sis d'avis qu'un pont d'même éthait assez d'run pouor un tas d'pitchets sus tchi pitchi des têtes dé traîtres et reintchivâles. Nou pouôrrait ofûche y stitchi les philomies d'Membres des Êtats tch'avaient pèrdu nos sou ou haûchi nos taxes. Nou pouôrrait y haûlîndgi les huthes des minnistres tch'avaient approuvé des dêv'loppements qu'i' n'éthaient pon deu approuver, ou hister la cahueûle d'un Chef Minnistre tch'avait dit dé tchi à la télévision qu'i' n'éthait pon deu dithe.
Bein seu qu'nou n'peut d'aut' coper hors des têtes achteu; ché s'sait sans doute des grands photos d'affichis pouor l's abafouer. Ou acouo pus modèrne, des écrans digitaux. Assa, la technologie a avanchi d'pis 1305 et des compiuteurs pouôrraient annînmer la cop'thie d'têtes et les r'exhiber rédguliéthement. Quand l'Pont d'Londres 'tait acouo attînté d'têtes, nou pouvait coper les têtes raîque eune fais; achteu j'pouvons les coper virteullement dèrché et dèrché à seule fîn d'nos abuser.
Au temps pâssé, la mouôntréthie d'têtes copées attriotchait d'la pratique ès conmèrces êtablyis sus l'Pont d'Londres. Lé Pont 'tait couèrt d'boutiques et maîsons jusqu'en 1762 quand i' fut êlaîsi et les dreins bâtisses clièrgis. J'sis seu qu'i' y'éthait assez d'run sus l'grand pont du Sieur Walsh pouor un hardi long supèrmarchi bâti d'un bord avaû l'pont. Don nou pouôrrait admither les cabiches d'un but et acater des caboches et des patates d'l'aut'. Lé grand pont, ch'n'est pon nécessaithement du niolîn!
Geraint Jennings
Viyiz étout: