I' fut longtemps a je-n'sai quand Piteur dit qu'il avait des titchets pour le Show. Pour de mé, un show d'bètes n'a pon d'grands attraits. Des vaques, nous en vét touos les jours, dans les clios, a la térrée, et qu'y'en ai ieunne pus belle que l'autre, pourvu qu'ou dounne du lait crémeux ch'l'a m'est èsgale. Sans doute, ès Shows, nou vét des gens qu'nous a counnus, et nous a des chances d'èschangi un brin d'conversation, et de d'visé du temps qu'nous allait ensemblye a l'Escole du dinmanche, a la Pratique et des prédicateurs tchi, dans chu temps la, vos faisaient d'si bieau sermons sus l'Enfé. Ch'tait la l'bouan temps! Nou nos pâsli d'l'Enfé et du Djiabye et d'la Colèthe, que tout en trembliait: et nou s'en r'venait siez sé, bin èsfrittée et toute trembliants; et nou s'couochait bin vite pour plieuthé et gemi toute la niét. Ch'tait la l'bouan temps!
Mais l'affaithe a changi d'pis. Je n'sait pas tchès qu'est v'nu sus les prédicateurs, mais i' n'vos font pon tremblié du tout, du tout, ach't'heu! Jommais n'pâslent de feu, ni d'souffres, ni d'gehènne - j'aimmais hardi oui pâslé d'la gehènne qui n's'èsteint point - et les gens d'a ch't'heu n'ont pon l'air d'avé eunne mie d'peux de ch'qui l's attend pus tard. Car, a en jugi par ch'qui s'passe a l'entou d'nous, j'né s'ons pas nombreurs dans l'sein d'Abrahame; tandi que, s'lon toute appathence, y'étha a peine "standing room" la ou-ès que tant d'nos véisins sont déjà horts.
Mais j'tais a vos pâslé du show d'vaques. Faut i' ou n'faut i' pas y proum'né Lonore? D'un coté, l'docteu a dit qui fallait la proum'né a l'air, mais, d'l'aut' bors, ès-che seuthtabye d'emné ma fille parmi tant d'monde que nou n'counnait pon! J'en avons pâslé et r'pâslé, Piteur et mé, et ch'n'est qu'a la dernié minute que nou s'décida. Et si j'y'allons, il est conv'nu que j'la tchindrons touos les deux, tout l'temps, par les bras. Piteur a promins de n'pon mé laissi toute seule avec Lonore sinon offuche que tchiq'un éthait affaithe a lis dithe tchiq' chose souos la tente.
En pâslant d'tente: j'ai idée d'met' sus l'beurre! J'ai oui que l'beurre du test s'a vendu a la fin du show; et nou m'a dit qu'il est probabye que che s'a Samuel qui f'tha la vendue. Dans chu cas la, je n'manq'thait pon d'en acaté un lot ou deux; Samuel me laira couore a bouon marchi - j'm'en servithai pour lis fricachi du maq'thé.
Mais tout ch'la depend du temps qui f'tha et d'la santé de m'n'èsfant.
Laizé Pain
Viyiz étout: