|
A MONSIEU L'EDITEU. Veth' ma fé, le mertcheux nos en a fait de belles! Chest la faute à not' femme et ès hardelles, Et chest que j'ai payi pour; Ah vère ! Je m'en vais vos en conté l'histoire, Espérant qu'ou vos servira un p'tit, Car pour mé, v'la qui ma cuoutai ben chi ! L'aut' jour pour le vraic, nos gens faisaient la galette, Mé, j'ervenais justement de graissi la cherette, Quand l'cuousin PH'LIP arrive ov vot' Gazette. Nou pouvait ben creire, seulement à le vais Que quicque chose l'avait catuouilli de près. Y mé dis :—Cousin JEAN, n'en vechin du churieux: Et y s'mins à lière, pour chu nouviau mertcheux ! Et tout buounnement PH'LIP nos conti Qué du beurre pareillement mertchi Se vendrait tréjous de deux sous pus chi. Y pensait (en pâlant dé beurre) que sus le sien La Jersey Flag y paraîtrai tout-à-fait ben Ou, unne green-house, avec unne grappe, De biau verjue Ou même peut être unne Tamate, Stampaie dessus! Ma femme dit :— PH'LIP mets y pustôt quicque fleur Car la loie nos défend d'y mettre la couleur ;— Pour nous, man buoun homme, et ben qu'est tu en dis, Si j'en êprouvons yieun avec les armeuries ? (J'men grattais la tête, j'faisais des greingnes, Et j'rounnais, qué l'orghi vein devant la ruine.) Les hardelles se minrent a crié tout haut : Ouest un neu mertcheux coumme chounna qui nos faut! Je n'y gangni rein dutout d'têté contre hieux, Par bé ou ben par laid, 'y l'éraient lus merteheux. Quand j'érais gronnu, tout un jour de temps Je n'en érais pon dêtuonai nos gens. (Car mé, j'en sis pon pour les changements) Y pâlirent du mertcheux tout l'arlevaie Y'né soignirent pas Dutout à lus travas La galette au fou, mantchi d'être brûlaie! Ah dame! pour un homme ch'nest ma fé, pas c'mode Quand femme et filles veulent sière les modes ! Eh bien pour ervenin à nos gens Y n'perdirent pas dutout de temps; Ys'en furent en ville le préchain matin Et en rapportirent yieun, tout bé et tout fin; (Man nom était dessus bien dêcoppai J'nai pon peu savé chen qu'il a cuôtai.) Le Vendredi, le beurre fut livré et mertchi Et mins douchement dans not' pus bian pangni Et, chest qué nos gens en avaient un diver orghi Et dirent que les Villais allaient escalé les yieirs Eu viant ditai beurre, et en s'raient bien fieirs, (Y n'y 'érait rein de pareil. dans d'autres pangniers) Rapporte m'en les sous! la buounne femme me criyi Coumme je m'en allais, le Sam'di avec man pangni. Enfin j'arrivi en ville coumme y faut, Et j'ergardi au beurre, il 'tai sain et sauf Pas une seule livre n'avait buougi Et à la boutique de suite je l'portit. (Là ouest qu'y mé le 'prennent tréjous le Sam'di). Le maître de la boutique est un fier moqueux Chest-là sen pière vice, et j'eus un moi peux! Qui ne bail'rait d'sa goule entuoure not' mertcheux!! Ne v'la justement chen qui s'arrivi Quand men beurre y dêcouvrit Et s'apperchu coum'il 'tai mertchi : Y quemanchi à en faire un tas de rîslaie! Et se fichi de mé, et de toute ma pan'naie ! (Chetai bien nâvrant de le vais mé rire au nais,) Et le sang m'en gélit quasi dans les veines J'en avais quasiment la courte haleine ; Je n'avais pas seulement un p'tit mot à dire, Tous dans la boutique s'êgouffaient à rire; Pis le maître boutiqué me fit un sermon Sus de tchi qu'il appelait "men ambition ;" "Mait JEAN, Mait JEAN, avous perdu votre buoun sens? Savons pon tchi n'y 'a que les toutes grand gens, Des Connêtables, ou de puissant Seigneurs Qui ont droit d'avé de pareils mertcheurs, Ou ben cheux qu' ont d's'Armeuries sus l'portico Qui saient faits en chiment ou ben en stuco. Remportais mé chu beurre-là siez vous Pour ditai je ne vos dounnerai pas de sous; Ermertchis-lé coumme le temps passai Et je vos en prie en grâce n'er faites pon ditai! Je m'en fut, mais chétai, just coumme un tchan fuoutai,. Quand j'fut ervenu siez nous, chest qui fallait en oui! Dans le mitan de l'aire, ma pan'naie je flieantchi Et j'men fut vite cherchi le maudit mertcheux Et d'un seul coup de hâche jé l'fendit en deux. Et auprès cliounna j'en eumes unne scêne! Je n'en dirai mot, che serait trop de peine. Enfin aussitôt que tout erfut tranquille J'en conti long à ma femme et ès filles. Et dépis chu temps-là, not' beurre r'est stampai Avec le vier mertcheux, coumme le temps passai. Ne vla, Mousieu, chen que j'ai gangni Pour unne fais, avé fait servi Le mertcheux qui porte les Armeuries de Jerri. J'espère ben de n'être pon trop tard, Pour dans votre nuouriche à hoummards Coulé si j'peux, ches deusse trais mots Pour vot' Gazette ès Ecréhos. Je sinne Maître Jean car achteu J'en veurs pus être applai MOUSIEU. |
Viyiz étout: