Lectuthe - Livre des Juges, Ch 7, vv 2-22
 L'églyise dé St. George |
J'veurs èrgarder auve vous lé conte d'la victouaithe dé Gédéon sus les Madianites. Les siens parmi vous tchi connaissent l'Ancien Testament savent comment qué les Israélites abandonnîtent Dgieu fais sus fais, touonnîtent envèrs d'autres dgieux et souffrîtent souos la tyrannie dé lus ennemîns. En grand dangi et en souffranche, en bésoin d'aîgue, il' èrtouonnîtent à not' Dgieu Tout-Puissant et chaque fais Dgieu dans sa grâce lus donnit tchitch' un pour les dirigi et les sauver.
Dans l'êpoque dé la lectuthe dans l'chapitre 7 du livre des Juges, les Madianites sont les ennemîns et il' ont attachi lé pays pour eune période dé sept ans et les Israélites vivent en peux et en pauvreté. Dans l'histouaithe d'vant nous les Madianites sont v'nus auve eune armée dé 135,000 soudards et Dgieu chouaîsit Gédéon, pus ou mains lâche et iun tchi s'accorde à contre-tchoeu, dé condithe les Israélites en batâle.
Dé temps en temps nou mé d'mande dé fourni des réféthences pour tchitch'un tch'ont applyitchi pour travailli dans eune banque ou eune office ou ailleurs. Tchiquefais j'doute qué la pèrsonne et la tâche vont d'ensembl'ye, et je n'crais pon qué j'éthais supporté Gédéon auve fort d'enthousiasme. Et vous, tchi qu'ous en pensez?
Dans l'chapitre 6, Gédéon fait toutes les extchuses pour êviter la responsabilité. En èrgardant dé pus près, i' m' sembl'ye qué ch'est les extchuses qué vous et mé, qué j' f'thêmes dans la même situâtion.
6 12 "Fort et brave homme, l' Êtèrnel est auve té!" "Oh, est-i' ?" rêpond Gédéon. "Et bein, pourtchi qué j' sommes tous dans chu pité ichîn, souos la tyrannie des Madianites?"
6 14 "Mais ch'est mé tchi t'chouaîsis et t'envyie," "Oh, mais" continnue Gédéon, "ma fanmil'ye est la pus faibl'ye et mé, j'sis lé pus p'tit."
6 16 Et pis Dgieu lé rasseûthe auve sa promêsse "J' m'en vais être auve té et tu batt'thas les Madianites."
Pouortant Gédéon d'mande pour un sîngne et dans l'couothant du reste du chapitre 6 j'viyons chutte êtrange mêlange dé doute et d' confianche, dé crainte et d'obéissance dans not' héros. Dans l'vèrset 34 l'esprit dé l'Êtèrnel d'scendit sus Gédéon mais il est acouo remplyi d'doute et i' continnue à d'mander à Dgieu pour d'autres sîngnes. Gédéon savait bein qué Dgieu avait sauvé les Israélites dé lus escliavitude en Égypte et i' les avait condits à la tèrre promînse. Dgieu n'avait janmais mantchi à lus aidgi, mais dans chutte nouvelle crise, Gédéon, comme vous et mé si souvent, n'pouvait pas s' fier compliétement sus la fidélité dé Dgieu. Qué j' séyons tous ramémouaithés à ces sé qué quand Dgieu nos appelle et nos appointe, ch'est li tchi fournit lé pouver et tout tch'est nécessaithe pour accomplyi la tâche. Mais ch'est li tchi chouaîsit comment nos êtchiper et ch'n'est pon tréjous d'la faîchon qué j'voudrêmes.
Quand Gédéon sonnit la trompette i' fut sans doute bein èrconnaissant qué 32,000 hommes arrivîtent. Ch'tait un encouothageant c'mmenchement même si i' y'en avait quat' fais autant dans l'opposition, Jé n'savons pas s'il' 'taient tous volontaithes ou si i' y'en avait tchi vîntent car i' lus trouvîtent forchis dé faithe lus d'vé. Mais chenna tchi nos intéthesse ch' est qué Dgieu avait des plians pour réduithe lé nombre dé soudards, pas les augmenter. En Deutéronome, quand Dgieu c'mmande les siens tchi s'en vont en dgèrre i' lus dit "Si i' y'en a parmi vous tchi sont timides ou tâches, tchi s'en r'vont siez ieux!"
La même chose ichîn et 22,000 sont êffrités et i' dispathaîssent dans un clyîn dg'yi. Sans doute les siens tchi s'en allaient payi 'taient heutheux tch'il' allaient sauver tant d' sou! Mais Dgieu n'tait pon satisfait - les soudards 'taient acouô trop nombreux - i' fallait en perdre 9,700, les siens tchi n'taient pon sus l'tchi-vive. Les siens tchi lus mettent à g'nouors rentrent siez ieux; les 300 tchi amnîtent ieau à lus bouoche auve lus mains restent. À ch't heu Gédéon avait un chentième dé l'armée qu'il avait au début. Les 300 'taient les touos miyeurs, mais ch'n'tait pon pour chutte raîson qué Dgieu les avait chouaîsis - i' 'tait sus l'point dé montrer san întention, sa présence, san pouver, I' n'voulait pas qué les Israélites pussent sé vanter dé la grandeu d'lus armée, d'lus technique ou d'lus organisâtion. Si lus èrsources n'taient pon nombreuses, i' faudrait s'fier compliétement sus Dgieu.
Èv-chîn acouô eune leçon pour chatchun d'nous à apprendre. I' y'a un grand dangi dé mettre toute sa fouai en sé-même car il' est si aîsi dé craithe qué nou peut faithe absolument tout sans Dgieu et pis agit sans autchun êgard pour li. J'habitons eune île où' est qué les sou et lé nivé d'la vie, et l'attitude dé la majorité nos encouothagent d'être indépendants. La puspart n'ont pas d'fouai ou d'confianche en Dgieu. Pour Gédéon et ses 300 hommes i' n'y avait pas d'chouaix - s'il' voulaient réussi i' fallait s'fier sus l'Êtèrnel.
Et p'tit à p'tit chenna tchi sembl'ye être eune mission impossibl'ye avanche, et auve Dgieu d'veint eune mission inévitabl'ye.
v. 9 "Jé donn'thai, et j' t'asseûthe, la victouaithe".
Dgieu dit à Gédéon et pour l' encouothagi acouo pus il envyie Gédéon et Purah pour êcouter eune convérsâtion privée dans l'tèrrain des Madianites, Et j' sis seux qu'il avait bésoin d'encouothagement si j'prannons lé vèrset 12 séthieusement. v.12 "Les Madianites, les Hamalécites et les fis dé l' Orient 'taient êtablyis tout l'travers d'la vallée comme des critchets d'l'Orient et il' avaient autant d'chameaux comme i' y'a d'graines dé sablion sus eune grève."
J'crais qui s'peut qu'il exagéthit un mio ichîn!
Mais ayant ouï entouor lé rêve il est seux cèrtain à ch't heu qui s'en va gângni et dans l'vèrset 15 la priorité est d'adouother Dgieu. I' li a prîns longtemps pour mettre toute sa fouai en Dgieu. Comme nous tchiquefais, i' n' apprend pas vite mais quand i' réalise qué Dgieu est si fidèle i' lî donne toute la glouaithe.
Et après l'adouothâtion, ch'est la dgèrre! Asseûthé et convaintchu, Gédéon condit ses hommes auve un pouver susnaturel. Il est si cèrtain d'la victouaithe qu' i' pâle dé l'av'nîn dans l'temps pâssé.
v.15 "Lé Seigneu nos a donné la victouaithe au d'ssus d'l'armée des Madianites."
"V'nez garçons! Lèv'-ous! Trais groupes dé chent hommes! Un groupe en d'vant et les deux autres dé chaque côté! Ergardez-mé! Suivez-mé!" Gédéon va en d'vant auve lé cri d'la bâtale "Lé sabre pour lé Bouon Dgieu et pour Gédéon." Gédéon est l'chef sus la tèrre mais ch'est Dgieu tch'est en chèrge. Acouo eune fais, a lî la glouaithe.
Et en cas qu'i' pens'thaient s'vanter dé lus succès i' vont en dgèrre pas comme soudards mais comme trompetteux. Il' avanchent pas auve des armes mais auve trompettes, pots et torches. I' s'en allaient s'battre par la fouai ou pas du tout. Dgieu les avait embauchis pas commes soudards d'eune armée mais comme discipl'yes d'la fouai.
J'connaîssons tous la fin d'l'histouaithe. Dans l'Êpitre aux Hébreux j'liésons "Gédéon par la fouai s'battit contre des pays entchièrs et i' gângnit."
Dans livre dé Samuël (1 Sam 17 47) d'vant la rencontre entré David et Goliath "Ch'n'est pon auve sabre et lance qué Dgieu sauve car la bâtale appartcheint à Dgieu." Chu jour-là David battit Goliath et Gédéon battit les Madianites d'la même faîchon.
Dans l'couothant d'la vie j'rencontrons tous tchique forme d'opposition, pas nécessaithement un Goliath ou des Madianites mais des obstacl'yes tchi nos donnent d'la peine - problèmes, d' sappointements, mauvaises habitudes, maladie, par exempl'ye. Tchiquefais lé fardé est p'sant à porter et j'voudrêmes nos en dêbarasser et i' s'peut qué j'èrnonchons à l'êffort à cause d'aver oublié qué Dgieu est là pour nos aidgi. Et i' y'a là acouo eune autre leçon à apprendre, Dgieu peut accomplyi dé grandes victouaithes dans la vie dé châtchun quand j'sommes prépathés d'admettre notre fouaiblièche. J'sais bein qué l'monde considèthe la fouaiblièche tchiquechose dé pitchiabl'ye, même honteux. Mais Dgieu n'peut pon accomplyi sa tâche si j'continnuons à oeuvrer dans notre propre pouver. Ch' est la grâce dé Dgieu tch'est la vraie source dé pouver et d'victouaithe. Quand j'savons qué j'avons bésoin d'aîgue, qué faichons la beinv'nue à Dgieu tch'a tréjous envie dé prouver sa fidélité et sa grâce.
St Paul êcrivit "Ch'est pour chutte raîson qué j'mé pliaîs dans la fouaiblièche, dans l's însultes, dans la minsèthe et dans la pérsétchûsion. Ch'est quand j'sis faibl'ye qué j'd'vins fort." Ailleurs St Paul nos dit qué Dgieu chouaisit les faibl'yes choses du monde pour faithe honte ès siens tchi sont forts,
Ch'est vrai qué quand j'sommes forts i' sembl'ye qué j'pouvons mênagi sans Dgieu. Ch'est dans ches moments qué not' fouai est inactive et peut aller en r'tchulant. Ch'est quand j'sommes faibl'yes qué not' fouai craît à grands pas.
J'espéthe qué j'sommes tous renforchis et encouothagis par Gédéon à ces sé; i' n'faut janmais aver peux d' admettre nos doutes, être tréjous braves assez dé d' mander à Dgieu dé nos rasseûther et être tréjous prépathés d'èrconnaître not' fouaiblièche et d'permettre à Dgieu d'agi auve san pouver susnaturel dans nous et à travers dé nous pour accomplyi sa volanté.
Par la fouai Gédéon accomplyit.............. par la fouai Thomas, Richard, Mathie, Jeanne accomplyithont............... Tch'est qu'on est?
Viyiz étout: