Les Pages Jèrriaises

Du Beurre


 

A Mousieu l'Editeu de la Nouvelle Chronique

Escoutaiz mé un p'tit si vouos pliait



D'pis qui fait si caoud, j'avais tréjous yieu l'idais de vouos envié un mot, ch'n'était pon pour vouos pâlai du vote, dont vot Gazette en a dit de toutes les sortes; car, quant à mé, le vote secret ou aoutrement, chonna mé fait ni fraid ni caoud, je n'sis pon voteux d'pis qu'j'avons dans not Jèrri tant de couleurs roses, j'aimons le vert siès nous, parce qué nouos anchêtres étais touos des louorièrs, les roses véyious chonna n'dure pon assaiz, ch'n'est pon la paine d'en pâlai.

Mais ch'qué j'voulais vouos dithe, ch'tait d'pâlé un p'tit du beure, car nouos satannais fammes de fermiairs mette pus d'sèt qui n'yian faout, et pus i fait caoud, pus i z'yan mette, si craie qu'v'la qui l'conserve, i s'trompe, le sèt en s'dêcomposant d'avec le lait d'beurre qui n'ès pon tréjous èsgoutai; nou vé l'beurre qui se fond et qui touone amé coumme du fi, i s';en perd la mainqui en yiau, l'aoute mainqui se perd en s'appliatissant sus le viaide qué les gouttes d'jiaux laisse et qué nou za dans l'zassiettes. Et pis ch'n'est pon chonna seulement, le beurre au prix qu'il ès v'la qui couôte hardi ès Villais qui n'ont pon de vaques; yia des fermiaires qui n'sont pon gênaiz d'mettre deux livres d'sèt sus p'têtre sièz livres de beurre, et nou l'paie trop chi quant i faout l'acatai; et l'sèt qui s'vend tout au pus un sou la livre, comptais ch'qué gangnent cheux qui font du beurre toutes les s'maines, et quand i fait caoud, v'la qui fait ma à la gorge et qui nouos fait sortir le sang sus la piaux, donne ès èsfants des boutons sus lus tendre shai, pis i faout allé cherchi l'docteu qui n'pense même pon. le pus souvent, qué chest l'sèt quiest dans l'beurre qui fait tout chonna dans les fammilles qui n'mangent que ditai. Le sèt, tout l'monde sait chonna, donne des zirritations qu'affaiblissent le sang. Jé s'rai biaucoup mus, créyis mé, d'empêchi les fermièrs, si nou peut, de mettre du sèt dans l'beurre, nous zéra bain l'esprit d'y mettre sé-même ch'qué nou voudra et la quantitai qui nouos pliaira, la même chose qué nou pouorai mettre de l'yiau dans le lait si chonna nouos pliait, ès-t'y pas vrai?

S'ou créyis qu'j'avons raison, faites savé chonna ès fermièrs, et nou vêrra chen qui z'en pensent. Le sèt n'èst pon du beurre, et quand nou zacate du beurre, cheux-là qui l'vende ne devraient pon vendre du sèt à la pliaiche, v'la ch'qué j'crai en pensant à cheux qui mangent du beurre d'pis l'matin jusqu'au sé.

Eun Villais

 

Nouvelle Chronique de Jersey 17/9/1884
 

Viyiz étout:

 

Les Pages Jèrriaises