Lé Sieur Le Gresley fit lé sèrmon en Jèrriais et san sujet était "Jean Baptiste", étant qué ch'tait la fête dé la naîssance dé St. Jean. I' fut chouaîsit pour prépather lé c'mîn pour nouotre Sauveur.
Y'a quatre êfants dans la Bibl'ye qu'étaient pas attendus par les pathents: Isaac - sa méthe étant vielle; Samuel - il' avaient grande envie; Jean Baptiste - par l'Esprit du Bouan Dgieu, et Jésûs Christ.
Lé péthe à Jean n'pouvait pas pâler et un jour i' 'tait dans lé templ'ye à brûler du parfum quand il eut lé message d'la naîssance et quand i' vînt l'temps dé dêcider tchi qui s'sait app'lé i' l'êcrivit "San nom est Jean" et dé d'là i' r'gâgnyit la pathole.
À trente ans lé temps 'tait v'nu pour li à prépather lé c'mîn. I' n'tait pas bein doux; i' criyait hardi et tchiquefais 'tait mal poli. I' fut mîns en prison quand i' dit la véthité à Hérode pour san mathiage à la femme à san fréthe Philippe qu'avait nom Hérodias.
Quand vînt lé jour dé naîssance à Hérode, la fille à Hérodias, Salomé, dansit pour li, et li dit dit qui li donn'thait autcheune chose qu'ou voulait et auvec l'înfluence dé sa méthe d'mandit pour la tête à Jean.
Jean Baptiste, mort dévant Jésûs, n'vit pas la crouaix et n'sut janmais les souffrances dé Christ.
Lé Sieur Le Gresley avait apporté eune corne qui soulait être soûffliée lé 24 dé juîn, étant lé jour dé quart d'an.
Viyiz étout: