Lé Sèrvice Annuel 1976
Dînmanche, lé 27 dé juîn, lé Sèrvice Annuel eut lieu dans la Chapelle Méthodiste dé St. Aubin à trais heuthes l'arlévée, et dans les 150 membres lus y rêunîtent.
Lé Sieur P. C. Le Ruez prînt l'sèrvice. D'vant c'menchi, lé Rév. G. Stoddern fit la beinv'nue, tchiques patholes en Jèrriais, et auprès lé sèrvice continuit sans arrêt. Lé preunmié cantique, “ Je chanterai Ta céleste puissance”, fut chanté et auprès la preunmié priéthe lé tchoeu chantit “Notre Père”. Lé deuxième cantique 'tait eune întèrprétation en Jèrriais d'St. Ouën par lé Dr. F. Le Maistre dé “The Lord's my Shepherd” – “Le Seigneur man berger j'sis bein” – et pis lé Président, lé Connêtabl'ye W. J. Tomes, liut la preunmié léçon, lé Psaume 145. Lé traisième cantique, “Heureux le temps qu'on passe”, fut chanté et pis la deuxième léçon, l'Êvangile sélon St. Matthieu, chapitre 25, vèrsets 14 à 29, fut liue par lé Sieur F. A. Le Maistre, les deux léçons ayant 'té traduites par la Dlle. Lucille Picot.
Lé Sieur Le Ruez fit l'annonce pour la rêunion, lé 15 dé juillet, et èrmércyit lé Rév. Stoddern et sa fanmille, qu'étaient auvec les membres et tchiques anmîns dé St. Aubîn, et fit la beinv'nue à des visiteurs dé Cherbourg et Rouën.
La collecte fut prînse en faveur dé la chapelle et lé Connêtabl'ye G. A. Le Breton jouit l'orgue dans l'entrétemps. Lé préchain cantique était eune întèrprétation en Jèrriais d'St. Ouën par Moussieu George Le Feuvre dé “Oh Jesus I have promised” – “J'ai promîns Seigneur Jésû”. Auprès la deuxième priéthe lé cantique “Oh qu'il m'est doux” fut chanté, et pis lé Sieur Le Ruez fit lé sèrmon en Jèrriais en prennant san texte dé St. Paul ès Corînthiens, chapitre 19, et eune partie du 31 ième vèrset, “I' faut faithe tout à la glouaithe dé Dgieu”.
Lé Sieur Lé Ruez pâlit du travas et coumment qué ch'est eune partie dé la vie à hardi d'gens. Lé travas bein fait est pliaîsant à Dgieu, pas seulement lé travas r'ligieux, mais autchun travas. Jésû était un tchèrpentchi, un travas bein ordinnaithe. Lé Sieur Le Ruez pâlit d'eune fanmille. Y'avait trais garçons, deux étant hardi capabl'yes et l'autre pas si bein dêhalé, mais lus péthe les appréciait êgaux. Quand nou pense à la parabole des talents, qu'était la deuxième léçon, des gens sont pus capabl'yes qué d'autres, mais lé Bouân Dgieu apprécie les pus hauts et les pus bas. Lé Sieur Le Ruez, dit qu'i' 'tait encouothagi quand i' pense au pâssé, car y'avait hardi d'gens qu'ont laîssi eune bouanne împression driéthe ieux. J'avons tous eune opporteunité d'donner, des gens auvec des talents à les faithe sèrvi pour rendre glouaithe au nom dé Dgieu et d'autres par la vie qu'i' mènent. Lé Sieur Le Ruez finit auvec san texte.
Lé dèrnyi cantique. “Chaque jour de ma vie je veux dire au Seigneur, apprends-moi, je Te prie à Te donner mon coeur” était un bouân finnissement au sèrvice et lé sèrmon si bein rendu par lé Sieur Le Ruez. Auprès la Bénédiction tout sortîtent au son dé l'orgue, au solé brilliant et ardent.
1976
Viyiz étout: