J'fumes en vacanses l'année passée les deux d'nous,
J'allîmes à Londres pouor tchinze jours au mais d'Aôut.
J'embertchîmes don sus 'l'Ile de Serc',
Ch'tait not' preunmie fait et j'taimes touos fiers
Et j'taimes jaie coumme des pincheons.
Auprès que l'baté fut en Route pas bein liain
J'c'menchîmes à senti l'dèjeuner et j'eumes fain
J'mangîmes d's oues et du jambon,
Des beurrées d'Glèe, man bouanhoumme ch'tait bon,
Pour tchi qu'temps j'nos trouvîmes bein.
D'vant être arrivées en Dguèrnésey, Oh man doue,
I'ventait du et j'nos viyaimes hors à fonde,
J'taimes verte coumme des chours touos les deux
J'taimes si malade qui j'en avaimes pieux
Bein sieux j'soignimes les paissons.
En arrivant, j'passîmes la douanne j'fumes fouailles,
I'voulaient saver tchi qu'j'avaimes de muches.
J'lus dîmes pas rein mais d'gâtre sait
I'vites que ch'te pas la véthité
Fallit lus payi quatre louis.
Je n'pûmes pas trouver not' Hotel
V'la tchi s'fait
Qué j'couochîmes dans un fichu parc toute la niet
Les deux sus un banc ètravlées
Auvec la Rôsés sus l'but d'not nez
D'gâtre qu'il y faisait fraid.
L's affaithes fûtent bein pour nous ma fingre,
Deux trais jours
Mais j'prîmment un train qui couorre souos terre
Oh secours
Il allait vite et j'nos perdîmes
Et savous bein que quand j'nos r'trouvîmes
J'avaimes 'té la bas tout l'jour.
J'fumes au Zoo vaie les marmousets,
Salle p'tites bêtes
I'taient la à lus êpinotchi
Pas qu'la tête.
Man doue j'sommes pas d'cendus d'dité
L's achocres qui l'disent sont ti bête valet
I'dev'thaient être mins en bouaite.
Quand j'fumes don dans Trafalgar Square
J'fumes ravis
Dé vaie les bieaux pigeons partout
Tout jutchis
J'taimes contents d'aver nos chapieaux
N'on n'sait janmais tchi qui tchait d'en haut
J'n'voulaimes pas être batises.
J'fumes au Theâtre et Ooh la la
Les Hardelles
J'n'avaimes janmais veut ditet d'vant
Qui taient belles
J'fumes en driéthe les vaie sorti
J'en crochtîmes deux pour en fini
Dgâtre qui nos couati chi.
J'ethaimes bein voulu y rester pus longtemps
Mais j'n'avaimes rein que nos billets de restant
Nos sou taient hors j'taimes a la nacque
Mais j'avons vendu un couplye de vacques
Pour payi touos les dêpens.
Howard Cabot
|
