Lé coup d'cannon veint dé tither,
les cos s'mettent à s'rêpondre,
les ouaîsieaux c'menchent à chanter
bein qu'tout pathaîsse acouo sombre.

I' faut s'en aller vite au pré
pouor donner eune tèrrée ès bêtes;
auprès aver pâssé la niet
à mangi, sans doute, i' sont prêtes.

Lé solé êpié par sus l'mont,
comme est qu'i' r'lit sus la roûsée!
Nou vait les ithangnies sus l'fond.
Ch'est sîngne d'eune belle journée.

La feunmée, tchi drait monte en haut,
mouontre qué l'dêjeuner s'apprête;
Nou-s'aime à trouver dé tchi caud
et qu'nou faiche étout la fête.

Les poules né font qué gratter.
Les quétots gronnent pouor lus baithe.
Les vieaux dé jouaie sont à giber,
et les fil'yes èrveinnent dé traithe.

L's ains sortent dêjà pouor du myi.
Y'en a tout pliein sus les fielles.
Les bibets né font qu'voltilyi.
Nou n'vait pas un nouage au ciel.

I' fait un divèrs bieau solé.
La roûsée s'sa bétôt l'vée.
Jé sauv'thons tout not' fain aniet
si chonna tcheint toute la journée.