Chier Moussieu.
J'ai lu dans vot' estimablye gazette de Sam'di passet, que les proprietaithes et fermyierts qui portent 'l'let en ville, sont priyets de s'rencontré au cafai d'Paris, sam'di t'chi-vain, le Vein'n'chinq, à daeux-heuthes de l'arlévaïe; et j'eim'thais bain savé tché-quest l'objet de lus réugnyion.
Ma feâmme, me dit qu'oull 'avet ouï dans l'marchi a pâisson Sam'di (oulle'tet respé d'l'hounneu a vendre des peurves), que d'pis qu'chutte nouvelle loué avé passet pour le let puhr, que plusyieurs fermyerts se plyiaignaient qui n'puorraient pas affâurdé de bâsyi l'let és marchands, a mains de douze sous l'po et qu'chés dergnierts ichin l'ervendraient seize.
D'eun âouthe côtet, les ervendeurs se plyiainnent, que si y l'paient dgiex sous pour l'ervendre à douze, y n'ont qu'deux sous par po pour yieux, et ont occuo à cuorre la risque d'âitres gaffêts. L'amende, le crédi. En âitet le let su, âitruêulet, ette céttéra, au l'yieu qu'sil énavaient quatre, ils le vendraient puhr, et qui s'set occuo milyieu marchi qu'édvans.
Enfein, p'têtre vrai y puorrot être, mais, si chest la l'bu d'lus rassemblyiement, il est à espéthé qu'y n'l'mettront pas hors portaïe de la bourse du pauvre, et privé sa p'tite fenmille de l'aliement le pus nuorrissant, ni en maîme temps empâichi chest puorres villais de faithe de chutte bouanne soupe d'andgiulle, quand mâime j'îthais la païtchi, et accuo lus aidghija en mangi.
En inserrant chés deus-trais leîgnes ichin sus vot gazette de Mâicredi t'chi vain, Moussieu, ou z'oblyigets
Votre anmin tout dévouët,
Eun Abounnet.
Octobre 1884
Viyiz étout: