Le Chef m'avait dit i'y a tchique temps que les Directeurs avaient pâlé de m'donner un mais de “holidays” comme rêcompense pour services rendus ès Chroniques, et comme j'aithais voulu profiter d'la saison, et du biau temps qu'i' fait tout chu temps ilo, je lis dis que j'aithais 'té bain content de sorti chute semaine pour passer mes vacances en Sercq, ou à Portbail, ou d'tchique carre par là.
“Non pâlela de ch'la pus tard,” qu'i' m'raîponni, “pour le moment j'ai une job importante pour té, qui faut qui s'sait faite immédiatement tandis que l'affaithe est d'un intethêt public.”
“Et mon doux,” j'li dis, “de tch'est qu'i' s'agit? de la Louai sus l's Elections?”
“Oh, nouffait, ch'est de tchi bain pus important qu'chenna! Ch'est sus la tchestion du lait. I' faut que tu ailles prendre des renseignements d'une carre et d'l'autre pour saver tch'est qu'on est. Quand tu aithas collecté toute l'information nécessaithe i' faudra êcrithe un articlye afin que nos lecteurs aient un exposé authentique sus la situation, qui, pour le moment me pathaîtrait assez complitchie.”
“Ch'est bain,” j'li dis “mais je n'sais pas trop bain par iou c'menchi.”
“C'menche ouest qu'tu voudras, mais ramasse nous toute l'information possiblye.”
Je m'en fus m'promener alentou du Weighbridge et j'rencontri Tom Gratte-Pid qui m'inviti à aller baithe une feis. Par sus un verre de limonade je li dis comme chenna, “Eh bain, tch'est qu'en est pour le lait?”
“Oh! n'm'en pâles pas,” qu'i' m'dit, “j'en sis dêgouoté! J'eûmes un grand meetin' au Lyric Hall l'aut'e jour et i' fut décidé à l'unanimité que je ne laissethions pas not'e lait aller à mains de seize sous l'pot. Le Conseil de l'Union fit imprimer une dêcliathation à ch't êffet-là qui fut cirtchulée dans toutes les pâraisses afin d'obtenin la signatuthe de châque fermi. I' y en eu des chents qui signithent et une partie d'ieux exprimithent lus dêtermination que pus acco que d'céder i' viéd'daient lus cannées d'lait dans l'gutter. Bon! v'là-t-i pas que le lendemain une partie des marchands d'lait lus envyithent un papi lis disant qu'i' n'paiethaient pas pus de quatorze sous et que si i' n'voulaient pas lus y accorder i' pouvaient l'garder.
Tu as tréjous oui, Caouain, que jamais i' n'y a ieu d'union parmi les fermiers et qu'i' sont jaloux les uns des autres et n'ont pas d'confiance dans lus vaisins; eh bain, ils en ont fait la preuve chute feis. Une grande partie d'ieux, malgré lus signatuthe, au prumié signe de dangi touânithent câsaque et vendithent lus lait ès marchands au prix qu'i' voulithent lus donner. Appelles-tu chenna d's hommes, té?”
“Tch'est qu'on fîtes vous?” j'li demandi.
“Mé? J'tins bon, et l'Union des Fermiers vint cherchi man lait et l'porti à la Don Street à seize sous l'pot.”
“Mais, Mess Gratte-Pid, je n'comprends pas comment que l'Union peut s'y r'faithe. Au prix qu'est l'beurre la Don Street ne peut pas vos r'touâner seize sous du pot!”
“Nan, je l'sais bain, mais la difféthence est pour être payie hors des fonds de l'Union! Une partie des membres sont à grommâchi la d'sus, mais che n'est pas ma faute à mé, je sis iun des siens qu'a resté “staunch,” et j'ai suivi l's instructions, ch'est pourtchi j'méthite d'être rêcompensé.”
“Mais combain longtemps que les fonds de l'Union peuvent supporter chu biznesse-là?”
“Je n'sais pas, mais tandis qu'la mathée s'donne j'ai idée d'en r'tither ma shâre.”
Opprès chenna je m'en fus trouver l'Secrétaithe du Syndicat.
“Tch'est qu'en est pour le lait?” je li d'mandi.
I' vint comme un fo.
“Combain d'feis par jour qu'i' faut que j'raîponne ch'tte êternelle tchestion-là” qu'i' fit. “Ch'n'est dêjà pas mal d'aver à raîpondre les fermiers qui vainnent à toutes heuthes me d'mander chenna, mais quand i' faut être tchestionné par un maudit Caouain, ch'est un mio trop fort!”
Je li explitchi que ch'tait en qualité de journaliste que j'tais v'nu, et par les ordres du Chef, dans l'intéthêt public et v'li tchi le r'calmi un mio.
Je li d'mandi d'vaie les listes d'signatuthes à seize sous l'pot et i' m'les montri.
I' y en avait des chents.
Je r'connu les signatuthes de Ph'lippe Crasset, Joe Touôlle-bouse, Edouard Râpe-Cône, Tom Couaîpé, Jim Grapin, Fraînque Halledoque et une chentaine d'autres fermiers bain connus de dans toutes les pâraisses de l'île.
“Absolument,” ji dis au Secrétaithe, “tu n'veurs pas m'dithe que ches gens-là ont mantchi d'pathole et n'ont pas honoré lus signatuthe?”
“Si fait dja!” qu'i' m'dit, “ils ont ieu peux qu'lus lait s'en allait être laissi sus bras et qu'lus vaisins s'en allaient vendre souos prix, et i' lus sont laissis intimider par lus marchands d'lait.”
Là-dessus, je d'mandi au Secrétaithe si ch'tait vrai que toutes les noms de ches fermiers-là s'en allaient être publiés dans les gazettes, mais i' n'voulit pas se prononcer définitivement là-d'sus.
“Il en a 'té tchestion,” i' m'dit, “et tout dêpend sus chein qu'nos messieux s'en vont decider au prechain meetin.”
En sortant du bureau je rencontri Addwater, le marchand d'lait.
“Eh tch'est qu'en est?” j'li d'mandi.
“Oh!” i' m'raîponni, tout s'arrange à merveille, je pouvons trouver tout l'lait qu'i' nos faut à quatorze sous, ch'est pourtchi je chouaîssissons les miyeurs êchatillons et je laissons les restants et tout le r'fur à l'Union des Fermiers pour en disposer comme bouan lus semblye. Nous a êprouvé à nos faithe contchuthence et mettre des obstaclyes à not'e commerce, mais chenna a ieu un êffet tout contraithe, car acheteu je n'sommes pas badrés par le surplus, ch'est l'Union qui s'en otchupe.”
Je r'vins à la boutique pus pozzlé qu'jamais et j'fis man rapport au Chef, ch'est pourtchi, avec sa capacité supérieure i' pouorra, si bouan li semblye, vos êcliaithi sus la situation.
Pour de mé j' n'y comprends pus rain!
Caouain
1930
Viyiz étout: