Tch'est qu'chest qu'un Limerick?
Nou m'a d'mandè chonna.
Eche une monièthe de trique?
Ou s'séche lé nom d'un gh'va?
P'têtre un nouviau cantique?
Ou l'nom lâtin d'tchic ma?
Une plièche en Améthique?
Tch'est qui nos l'exply'ietha?
...................................
N'en f'chin yun qu'tu peux vais
I t'apprendra tch'est qu'chest.
Lé v'chin:
Y'avait un fermi d'Saint Brelade
Qu'avait souvent ses vaques bain malades
Un jour i lus fis
Une bain bouanne bouillie...
??????????????
Chein qui faut faithe est d'fini la chinquième ligne de sorte qu'ou rime avec les deux prumièthes et qu'oul ait l'même nombre de syllabes. Par exempl'ye:
Y'avait un fermi d'Saint Brelade
Qu'avait souvent ses vaques bain malades
Un jour i lus fis
Une bain bouanne bouillie
Et l'z'agvi ov des fieilles de salade!
ou bain
Y'avait un fermi d'Saint Brelade
Qu'avait souvent ses vaques bain malades
Un jour i lus fis
Une bain bouanne bouillie
Et lus mins l'corps en capilotade!
ou
Y'avait un fermi d'Saint Brelade
Qu'avait souvent ses vaques bain malades
Un jour i lus fis
Une bain bouanne bouillie
I les tui, par y mettre trop d'muscade!
N'en fchin un autre:
Y'avait à la Nouvelle Chronique
Une boête à s'no pour toutes les pratiques
Un jour le Gérant
Dit: “Jamais j'n'en prends....
Finissiz lé (lé Limerick, pas l'Gérant) en y mettant la chinquième ligne; - pour rimer ov “pratiques”...
Pas rein de trop sérieux si vou' plaît!
Elie
Viyiz étout: