Fort Lauderdale, Florida,
U.S.A.

Lé 23 d'mar, 1974.

Moussieu l'Rédacteu,

La gâzette dé Jèrri du 24 janvyi, tchi veint d'arriver ichîn, m'apporte la nouvelle qué l'apotitchi H. H. Le Tchène a rempliaichi l'Juge Lloyd sus l'Banc d'Justice. Mes félicitâtions! Ch'est seux qu' Moussieu l'Tchène s'en va géther sa chèrge auve împartialité et porter la rouoge robe auve dîngnité, et j'sis content d'vaie un aut' moussieu auve un bouan vièr nom Jèrriais au côté d'Moussieu l'Bailli. Lé privilège dé porter la robe et d'assiéthe sus l'Banc d'Justice 'tait l'pus grand honneu qu' les Jèrriais pouvaient accorder à iun d'lus compatriotes dévant qué l'drouait d'l'êlithe lus fusse êrachi par la souô-disante réforme.

Lé Juge Le Tchène a tréjous 'té av'nant dans s'n apotiqu'sie, et dé chein qu' j'en ai veu d'san fis y'a tout lieu d'craithe tch'i' s'en va continnuer à vendre des boulets auve lé charme et l'souôri tch'encouothage les malades à penser tch'il ont bouan goût comme des chucrîns et qu' ch'est un pliaîsi dé l's avaler!

J'ai liu tout l'alibéle dans la gâzette entouorre lé rapport du conmité Policy Advisory mais j'n'en sis pon fort pus d'l'avant. J'sis v'nu à la conclûsion qu' vouot' articl'ye d'fonds, Moussieu l'Rédacteu, est bein à point. Jé n'peux sénon admither la capacité du moussieu tch'a êcrit les rêponses ès longues tchestchions au sujet du rapport, eune mangnifique capacité dé trouver eune g'vil'ye pour touos les creux. La grand' tchestchion pathaît être tch'est tch'i' faut faithe pour garanti qu' l'Île es'sa eune milieu pliaiche à d'meuther d'dans. Eh bein, à m'n idée il est un mio tard pour êprouver à décider eune affaithe dé mème auprès qué l'ma a 'té fait. Les vièrs comme mé tch'ont vêtchu en Jèrri dans l'temps jadis n'ont autcheune doute qué la vie d'chu temps-là dans l'Île 'tait bein pus pliaîsante qu'ou n'l'est à ch't heu. Mais il est trop tard pour y r'tchuler.

Affaithe dé charme et d'bieauté, eune lettre êcrite par eune danme dé Taunton, en Angliétèrre, est tout à fait à point et întérêssante. Ou nouos dit qu' la bieauté naturelle dé l'Île est absolûment avraûnée par l'empiètement d'chînment dans la campagne (l's Améthitchains ont un bouan nom pour ch'là - i' l'appellent A concrete jungle), et par les gratte-ciels et laies maîsons et vilains bâtisses qué nou vait partout, et partitchulièthement l'long des mangnifiques baies et d'la côté en général. Mais chein tch'est l'pus à r'gretter est qué l'charme d'la ville dé St. Hélyi a 'té gâté par la tendance d'abattre les p'tites boutiques et les rempliaichi par des grands babaines de bâtisses tch'ont fait la ville èrsemblier à autcheune ville modèrne et ordinnaithe. Quand j'tais mousse oulle avait la sorte d'charme qué nou trouve, mème au jour d'aniet, quand nou marche dans la rue êtraite et pittoresque du Mont St. Miché en Nouormandie. Et la tendance d'êlaizi les rues n'aîgue pon n'tout.

Quant à la tchestchion d'continnuer et mème d'agrandi la qualité d'la vie ("Standard of living en Angliais), i' m'sembl'ye qué ch't' affaithe-là en est ieune dé goût et d'opinnion. Chein tch'est satisfaîsant pour iun n'pliaît pon tréjous à l'autre. Lé temps pâssé ch'tait un pliaîsi d'marchi à l'églyise lé Dînmanche au sé et d'marchi des milles auprès l'sêrvice quand nou-s-allait r'condithe les filles. À ch't heu les gens ont peux d'marchi deux pas, et la grand' partie n'va pus au tchulte.

L'temps pâssé les jannes prannaient soin d'lus anciens dans lus vieillèche. À ch't heu l's anciens vont mouothi à l'hôpita ou dans eune pension d'vieillards. Sans doute i' y'a des pensions d'Êtat pour les subventionner à ch't heu, les vièrs, et né v'là iun d's avantages du nouvieau standard dé vie tch'i' y'a tchestchion d'continnuer et mème d'amender. Mais l's anciens pâssaient lus vieillêche pus heutheusement souos l'vièr système et avaient l'bonheu d'mouothi dans les bras d'lus êfants quand v'nait l'drein soupi. Des vièrs comme mé tch'ont dêpassé la huiptantaine sé r'souveinnent d'aver veu l'bonheu et l'souôri sus la fache des touos anciens assis dans lus grand' tchaises au pid d'l'âtre dans la salle du vièr mènage quand nou-s-allait là auve P'pèe d'mander au fis s'i' pouôrrait arrangi san travas d'sorte dé pouver v'nîn atout san j'va à la grand' tchéthue siez nous mardi tchi veint. À ch't heu, quand nous va vaie l's anciens à l'hôpita où'est tch'il' ont touos les soins et bénéfices dé la méd'cinne modèrne, i' sont mînsethabl'ye et n'font qu' vouos d'mander d'les r'enm'ner siez ieux.

Tch'est tchi s'en va décider si la qualité d'la vie est tellement miyeuthe à ch't heu? Ichîn, en Améthique, étant à court dé pétrole a encouothagi un tas d'monde dé marchi à lus travas et i' s'en trouvent en miyeuthe santé. La réduction d'vitesse des motos a ieu pour rêsultat mains d'morts par accident dans les grand' routes. Sus un sens, l'progrès a don fait du bein d'aller à r'tchulons!

George d'La Forge
 

Viyiz étout: