Lé solé brillait sus lîngne auprès lîngne dé vîngnes dé vèrjus des sîl'yes des monts jusqu'ès les vallées. Les tèrres des pentes sont nommées 'Les Blianches Tèrres' à cause d'la couleu des rotchièrs ardgilleux en d'ssous. Lé vèrjus s'appelle Blianc Sauvîngnon et il est fait sèrvi pouor les fanmeux vîns dé Sancèrre et dé Pouilly Feunmé.
J'fînmes un spécial viage pouor chèrchi l'excellent Sancèrre qué j'avions ieu à nos neuches, et étout, en mémouaithe d'not' 'garçon d'honneu', un anmîn Australien et not' visite auve li entouor Lé Morbihan, quand j'gouôtînmes plusieurs supèrbes Sancèrres. Mais malheutheusement, lé restaurant siez nous n'vend pas chu Sancèrre-là à ch't heu.
Dans la région, i' y'avait un nouvieau clios d'vîngnes au d'là d'châque carre et nou 'tait tenté à gouôter châque vîn, mais ch'tait împossibl'ye, bein seux.
Rouoge, Blianc et Rôsé, tchi 'tait l'mus? Qui peut dithe? Châtchun à san goût.
Heutheusement, j'r'app'lînmes l'nom auprès tous ches ans, Neveu, Péthe et Fis, et enfîn j'trouvînmes lé domaine, pas à côté du vièr village fortifié d'Sancèrre, mais au Clios du Colombyi au d'ssus d' Verdigny. J'rencontrînmes Moussieu Roger Neveu, Péthe, et lî racontînmes not' histouaithe duthant eune gouôt'tie. Auprès 'eune santé' en mémouaithe dé nos neuches et à not' anmîn, Roger Neveu nos dit qué ch' n'tait pas nécessaithe à visiter san domaine pa'ce qu'i' avait 'té env'yer ses Sancèrres à Randall's Vaûtchi en Jèrri d'pis vîngt chînq ans!
Ralph Nichols, auve l'aîgue dé Laurie Huëlin
Viyiz étout: