Iun d's'aut'es jours i'y eu oquo du hertchin entre Laïesse Ernon et sa belle-mèthe. Chute feis, ch'tait au sujet des patates pour le Gouvernement et l'affaithe était bain sérieuse car le pouore Laïesse, malgré le bouan bardgin qu'il avait fait avec Maîte Cliément d'Caen, avait 'té renvié d'la cauchie deux jours de siète, viyant qu'i' y avait trop d'vertes patates dans ses pouques, et pis au but du compte i viyait l'temps qu'i' n's'en allait pas erchever un sou pour les treis chents et tchiques satchies qu'i' lus avait porté! Et soi-disant, ch'tait tout par la faute à sa belle-mèthe, qu'avait 'té à l'office pour erchever les sous et s'en 'tait r'venue les mains vièdes, n'ayant ni sous, ni papi, ni auchun billet du Weighbridge comme garantie que les patates avaient 'té d'livrées!
Ou pouvez bain penser si ch'est qu'i'y en eu carillon!
Laïesse qu'avait caltchulé à peu près che qu'il avait à li r'venin, réalisi tout-d'suite qu'i' faisait une perte d'appréchant chent chinquante louis, et sa belle-mèthe avait biau li dithe que la jeune fille à l'office l'i'avait dit qu'i' l'i'envîthaient un tchèque dans l'couothant d'tchinze jours i' n'en criyait pas un mot, et i' s'mins à la traiter d'touos les vices.
La femme à Laïesse fit d'san mus pour les rappaîsi mais ou n'y gagnait rain, tant pus qu'ou cherchait à les calmer, tant piéthe i' v'naient.
A la fin i' li vint une inspithation.
“Ergardez,” ou' lus dis, “le Caouain est oquo siez Maît'e Cliément d'Caen, i' dait se r'connaître dans tout chenna, li, pourtchi qu'ou n'y allez pas touos les deux, pour vaie tchest qu'il en dit?”
Et vos v'lo v'nin! malgré qu'il 'tait passé djaix heuthes de sai!
J'étions, Maît'e Cliém et mé, à baithe une modgie d'cidre dans la tchuisine justement d'vant nouos couochi et Joseph Le Boutillyi v'nait d'sorti pour aller frumer l'hai d'la cotte sus les biches, quant le v'là qui rentre d'un embront comme si l'djâblye était souotre li et en aheuquetant piéthe que jamais, i'dis comme chenna, “Vev-vev-v'chin du m-m-monde qui s'en v-v-v-vainnent à à m-m-m-m-mont le co-co-co-co-co-côti! I' s-s-sont en d-d-d-dispute!”
Maît'e Cliément, li, qui v'nait d'oui qu'i' y avait d's Allemands abannon, gaffi s'n arme à deux coups qu'était pendue à la poutre, et s'en fut dans la carre de la tchuisine s'assiéthe sus san côffre-fort avec s'n arme pointée du côté d'la porte. Et comme i' s'fit “Qu'ils entrent, acheteu!!”
Joseph se fouôrri souos' la tablye, li, et mé - eh bain, je l'suivi. Ch'n'est pas qu'j'avais si peux d'autchuns qui pouvaient entrer comme j'avais de l'arme à Mess de Caen!
Enfin, j'ouï mes des pas dans l'bel et je fûmes tout d'suite rasseûthés par une vouaix qui dit en pliat jerrais: “Es-tu là, Caouain?”
“Eh bain, sé-m'n'âge!” s'fit Maît'e Cliém, “v'chin t-i' pas Laïesse Ernon!”
Et i' fouôrri bain vite s'n arme dans la côniéthe pour que l'autre ne la vîsse pas. Laïesse entri, mais quand j'vîmes tch'est qu'il amenait avec li' je fâillîmes d'en tchaîe à la renverse. Et pis il 'tait bain facile de vaie par lus mîne qu'i' y avait tchiquechose en allant qui n'tait pas ordinaithe.
Ch'tait Laïesse qui rompit l'silence.
“J'ai r'gret de v'nin vos disteurber à l'heuthe qu'il est, mais j'voudrais pâler au Caouain pour deux minutes.”
“Démi' euthe, s'ou voulez, Mess Ernon,” j'li dis, “tch'est que j'peux faithe pour vous?”
“Eh bain,” i' dit, en pointant à sa belle-méthe, “v'là une vieille rain-tchi-vaille qui vaint de m'faithe perdre passant chent-chinquante louis.”
“Cré mâtin!” s'fit Mess de Caen, “et comment chenna?”
Mais l'pouore Laïesse ne put pas l'raîpondre. I' s'laissi tchaîe sus une scabelle et s'mins à plieuther comme un êfant.
“Avous jamais veu patheil imbécile?” s'êcriyi la bouannefemme Lesbithé, “je n'criyais pas qu'ma fille avait mathié de tchi aussi bête! Je m'en vais vos explitchi la chose.”
“Un moment, Missis,” se fit Maît'e Cliém, “i' n's'agit pas de distchuter d's affaithes de famille en d'vant d'ses domestiques. Joe, va-t-en t'couochi!”
Quand Joe fut hors, Missis Lesbithé c'menchi à nos raconter une longue histouaithe entouor les patates pour le Gouvernement, comment que ch'tait lyi qui l's avait chouaîsies, que quand Laïesse fut renvié par deux feis avec sa vannée d'pouques, qu'ou' s'décidi, lyi, d'aller les cachi lyi-même pour vaie si ch'est qu'une poignie d'soudards Irlandais aithaient l'couothage de la renvier, lyi. Comment qu'oulle avait dit à chu p'tit nâdgeux-là qu'était sus la Vieille Cauchie, que jamais i' n'avait veu d'patates dévant que de v'nin en Jêrri et qu'i' f'thait bain mus d'aller dans les tranchies que d's'en v'nin ichin abafouer la marchandise ès fermiers, comment qu'oulle l's avait faits prendre tout san lot jusqu'à la dernié poutchie et comment qu'oulle avait 'té lyi-même à l'office avec san billet pour en touchi les sous...
Que la hardelle qui prins l'papi li d'mandi de signer une forme et li dit que ch'tait “all right” et que Laïesse erchev'thait l'tchèque par poste pus tard. Qu'ou' n'tait pas d'même mêfiante, lyi, et qu'ou s'en r'vint à la maison pliaine de confiance dans l'Gouvernement Britannique, mais que Laïesse était aussi dêraisonabl'ye comme il 'tait înouothant et qu'il 'tait v'nu comme un satan quand i' sut qu'ou n'avait pas rapporté l'papi et qu'i' criyait qu'ses sous étaient autant vaut perdus.”
Mess de Caen, li, qui v'nait de r'chever san tchèque chu jour-là et qui l'avait à chu moment-là dans san côffre-fort, s'en allait justement li dithe que tout était bain, qu'i' n'y avait pas d'dangi, mais je lis fis un clyin et un signe de n'dithe pas un mot, car je voulais faithe accraithe à la bouanne femme qu'oulle avait fait une bêtise.
“Mais ma pouore Missis,” je li dis, “je sis êtonné d'vous à votre âge et avec votre expérience, de vos en aller lâtchi comme chenna la seule garantie qu'ous aviez d'aver fourni les patates. Ou n'pouvez pas ercliâmer rain acheteu! Ou n'avez rain à montrer! Un ex-Député que j'counais, mé, n'a pas 'té si bête, i' r'fusi d'rendre san certificat dévant que d'vaie la couleur des sous. V'là au mains un homme qu'est biznesse!”
Chute feis dja, ou changi d'couleur et s'en r'fu siez lyi dans un drôle d'êtat d'esprit. Maît'e Cliément d'Caen, tandis qu'j'étions à pâler, avait 'té à Laïesse lis dithe à l'ouotheille de n'se gêner pas, que ses sous arrivethaient tout comme les siens. Au moment d'êcrithe chennechin, Laïesse a r'chu san tchèque et est tout-à-fait satisfait, ayant 'té payi un pus haut montant que san propre caltchul.
Quant à sa belle-mèthe, ou n'en a pas dormi pour deus-trais nyits, mais sus tchique sens oulle a dêcouvert que l'Caouain, chutte séthée-là, était à s'fichi d'lyi, et dame, sapresti! ch'est qu'oulle en a contre li!
Caouain
1917
Viyiz étout: