J'avions pensè d'être bel et bein r'venus au bas du Vièr Marchi pour le prumi d'Août, mais j'avions, coumme disent les Angliais, “comptè sans notre hôte.” Notre hôte, à nous, malheutheusement pour le moment, ch'est l'vièr Cliément d'Caen, le pus groumâcheux, le pus stègrin, le pus rouâblieux, le pus malcontent, le pus grincheux, le pus difficile à pliaithe, le pus malenduthant de tous les vièrs avares que la terre ait jamais portè.
A la plièche de dêfoui ses patates, en temps, coumme d'autres, ne s'était-i' pas mins dans la tête que l'prix continuethait d'monter jusqu'à la fin de Juillet? Tch'est qu'en a 'tè la conséquence? Il est l'arriéthe ach't'heuthe de tous les bords; occouo huit vrégies d'patates à dêfoui, une cliôsèe d'rye grass qu'est à sitchi sus bu, trente pèrques d'avaine en gavelles dans l'bas d'un côti, un camp d'froment à maintchi dghèrbé et des raves en prumié récolte qui sont à avair une bataille avec les tchèrdons et l'verjus au djabl'ye à tchi êtouff'tha l'autre le pus vite - et les raves n'ont pas l'air bein digantes, ch'est mai, tout Caouain que j'sis, qui vos en dounne ma patholle.
Nou n'est pon fort hètchis d'aller s'proum'ner tandis que nou travaille coumme je sis forchi de l'faithe tout chu temps, mais je n'pu pas m'empêchi d'êcapper un p'tit brin l'autr' sai' pour aller dans la pâraisse du bouan berger, ou savez-bein, la sienne ouèst qu'y'a un canon au bas d'un mont et deux auberges oprès d'l'égl'yise.
Quand j'appréchi du Parish Hall, je vit un fliotchet d'monde dans l's'envithons et je m'muchi dans les verts bouais à John de Saint-Elmo, jusqu'à que j'visse ma chance de m'faufiler par dédans, sans être aperchu. Accliutchi sur la carre du graie, j'pouvais ouï sans être veu. J'pensais que nou verrait p't'être du feu d'satchi, mais, au contraithe, tout alli coumme sounette.
I' s'agissait d'saver si Frainque et Winneteur restethaient à lus plièche et l'Boss env'yi deux messieux que j'ne r'connut pas mais qu'avaient la marche de Principaux d'paraisse à les cherchi pour lus d'mander la tchestion.
Ils 'taient à peine entrès que ne v'lo l'Boss qui s'met à les louangi en as-tu, en veurs-tu, et à lus dithe toutes les bouannes qualités et coumment qu'ils avaient bein gardè lus plièche et qu'i' l'y'avaient tréjous baill'yi un coup d'main au besoin, et que la pâraisse ne pouvait pon faithe sans lus aide.
Les deux pouorres médjans 'taient déjà pas mal confus de tant d'compliments mais tch'est qu'i' pensirent quand le bouan berger se l'vit à san tou' et s'mins à lus en dithe occouo tout autant!
Frainque ergardait ses bottes et changeait ses pids d'plièche en plièche tant v'la qui l'ênervait, et Winneteur, li, était rouoge coumme une petite fille quand oulle est happée à faithe du minchèt.
Mais tout fut bein à la fin. Frainque et Winneteur fidrent chatchun lus speech et dirent qu'i' continuethait à faithe les job de lus mus et quand i' vidrent tout l'monde applaudi, i' l's'invitidrent à aller baithe une fais.
Mai, qu'avais veu qu'la porte à Charlie 'tait frumèe, et la sienne à san vaisin ètou, j'me d'mandais si ch'tait siez Winneteur ou au bas du mont que nou s'n'allait quand ne v'la un tas d'rêmouage dans la salle et d'la sounnenie d'verres, et d'bouteilles, et dans bein mains de temps que je n'mets à vos êcrithe chonnechin (et pourtant je sis à êcrithe ben vite pour être fini en temps pour que l'valet emporte ma lettre avec le lait) les verres 'taient chergis et tout l'monde 'taient à baithe à la santé de ches deux Jolly Good Fellows là.
Coumme touos les Caouains, je sis d'une sobretè exempliaithe mai-même, mais dans l'espéthance de trouver tchic mie d'galette je sauticotti par souos la tabl'ye et j'trouvi le note-book d'un rapporteur d'une gazette angliaiche, qui v'nait d'tchaie d'sa paute.
Je m'mins à examiner chein qu'il avait êcrit d'dans et craithait-ous que ch't'individu là avait mins le nom à Winneteur le prumi, toutes les fais?
J'voudrais bein savair, mai, si ch'est Winneteur ou si ch'est Frainque qu'est prumié chantgni! Allons, don!
Ah, si che'n'tait pon pour le pouorre Caouain, té qu'il est, la Presse de Jerry es'sait bein tristement renseignie, allez.
Caouain
1917
Viyiz étout:
