Quand vint siex heuthes Samedi au sé, je c'menchais à aver mal-à-tête.
Ou viyiz, i'y'a telle chose comme d'aver trop d'anmins, et ch'qui y a de bain sindghuyi, ch'est que hardi d'gens ne peuvent pas t'nin une distchussion comme i' faut à mains qu'che sait dans le p'tit parleux de tchique auberge pardessus un verre de “grog” et dans une atmosphère si empreignie du fumée de p'tun que nou pouorrait quâsi y fumer du jambon. Et bain, comme je n'sis pas accouôtumé à tout chenna, quand je vins à en sorti pour m'en aller siez-nous je m'sentais tout êtourdi et la tête n'avait qu'de m'ouvri.
“Caouain,” je dis à mé-même, “ch'qui t'faut acheteu pour te r'mettre à t'n aise, ch'est une bouanne tassée d'thée!”
Et là-d'sus je prins le plus court c'min pour not'e mansarde.
Mais i' n'y avait corps-d'âme siez-nous; Marie Hibou était horte à baîlli d'sa bécque siez tchique vaisine, comme d'habitude, le feu 'tait dêteint et l'pot-à-thée était à sa pliaiche sus l'aie-du-foyi.
“Eh bain,” j'dis, “i' n'y a qu'une chose à faithe!” Et cache me v'là aller siez Mrs. Cooms, dans Library Place.
Dès qu' j'entri, j'aperchu un journaliste de mes collégues qui m'fit un signe d'aller li pâler.
“Caouain,” qu'i' m'dit à l'ouotheille, "si ch'est qu'tu veurs de la copie, faufile-té driéthe chute tablye-là ouest qu' tu vai Dod et deustrais d'ses anmins, à même des “steaks.”
Je m'y en fu à l'instant et v'chin à peu près tch'est que j'oui.
Comme se faisant Dod, “Oui, je sis un homme patriotique, mé, et j'ai toute sympathie pour les hommes publics qu'ont les intéthêts d'la nation à tchoeu, et je sis enorfanté quand j'vai qu'i' n'ont pas pus d'souôtchein. L'aut'e jour dans les Etats, par exemple, des messieux qu'aithaient deu aver ieu pus d'avis, cherchaient à s'motchi du “Labour Bureau” au Connaîtablye. Le sieur Buttfield voudrait mettre touos les Parcs en patates, - une raide bouanne idée, ma fé, eh bain, tch'est qu'en a 'té fait? Rain du tout! Tout l'monde est patriotique, mais ch'est raique avec lus langue! Quand i' s'agit de faithe tchiquechose, ch'est un autre histouaithe! Ah ça, pour montrer l'exempl'ye je m'en vais faithe une offre ès villais, mé! Et ch'est chennechin! Je sis prêt à m'en v'nin jusque d'St. Cliément avec ma tchéthue et siex ch'vaux, fourni balanchi, câgnons, bêques, et même du cidre, autant qu'il en faut, sapresti! et mettre tout entre les mains du Connaîtablye pour touâner touos les parcs iou qu'i' peut v'nin des patates. Tout ch'qu'il aitha à fourni es'sa la main d'oeuvre.”
“Mais,” dit iun d'ses anmins, iou qu'i' la trouvetha? Tu sais bain que ch'n'est pas les hardelles qu'ont lus nom sus sa liste qui sont capablyes de ramasser une tchéthue ni de cachi siex ch'vaux!”
“Eh bain, nan, p't-être bain, mais l'Connaîtablye li-même peut cachi, li; il a tréjous ieu du goût pour les ch'vaux et si ch'est qu'i' li faut un t'neux, il a un homme tout trouvé dans l'Député Henderson!”
L'autre se mins à rithe; “Et l'djantre, s'fit-i', nou n'le verrait pon dans les manchots! Comment qu'il crai qu'i' s'en dêpôquethait dans une pliaiche comme le “Triangle Park,” par exemplye, ouest qu'ch'est tout courts tours? Jamais i'n' pouorrait swîndgi sa tchéthue! Et s'il allait houtchi une rachine d'orme dans l'People's Park, tch'est qu'en s'sait?”
Mais Dod n'voulait pas être dêcouothagi par toutes ches objections-là, s'n'opinion est que la chose peut s'faithe bain facilement, qu'i' faudra les patates, que ch'est péché d'laissi d'bouanne terre à paître ès coucous et que nou peut craithe assez de patates dans les Parcs pour nouorri une partie des villais. Ch'est pour tchi, i' veurt que l'affaithe se faiche.
Acheteu, une feis la terre touânée, tch'est qu'est l'fermi qui vaindra en avant avec de la s'menche pour la plianter? Quant au guano, i' y en a tout pliain d'restant dans les stores et je sis certains que les marchands ne s'saient que trop contents d'y contribuer lus part pour la chose publique. Mess Terry a fait san d'vé en dounnant un sac de “Nonpareil” ès gens de l'églyise de St.-Luc; ch'est ès autres ach'teu à en faithe autant pour les parcs. Quant à mé, Caouain, je sais bain que je ne s'sais d'autchune utilité à la tchéthue ni à la pliant'tie, mais i'ne s'sa pas dit que j'ai laissi ma carre driéthe, quand i' s'agit du bain du pays. Ch'est pour tchi j'offre mes services et les siens de toute ma famille, sans rémunération, grâtis et pour rain, à faithe une bésogne dans latchelle je n'avons pas d'êgal. Je m'cherge de visiter les pliantations toutes les nyits et de dêtruithe les taupes et les mulots qui pouorraient saccagi les patates. Ah ça, je peux-t'i' dithe mus qu'chenna?
Caouain
1917
Viyiz étout: