Le Chef me dit comme chenna l'aut'e jour, “Caouain, i' faut que je nos gardions au nivet des aut'es gâzettes, ou bain j'allons perdre une partie d'nos abonnés et d'nos clients.”

Quand je l'oui pâler d'même, je pensais qu'i' s'en allait m'proposer d'aller deux feis la semaine en automobile porter not'e gâzette dans les campagnes, et j'li dis que j'tais tout-à-fait volontaithe à condition qu'i' m'fournîsse un conducteur sobre et prudent, mais i'm'raîponni tout-d'-suite quequoique v'là tchi pourrait s'arriver pus tard, che n'tait pas là ch'qu'il avait dans l'idée pour le moment.

“De tch'est qu'i' s'agit don?” j'li d'mandi.

“Eh bain ch'est chennechin. Not'e confrère “Evening Post” vaint de t'nin une série d'interviews avec les gens les plus notablyes du pays, sus la tchestion de la crise Agricole et j'ai pensé que nos lecteurs s'attendront que j'en faichions autant.”

“Ch'est bain vrai,” j'li raîponni, “i'y en a plusieurs qui m'en ont dêjà pâlé.”

“Bon! alors es-tu de m'n avis sus chu point-là.”

“Absolument,” j'li dis.

“Eh bain, je n'crai pas que j'pouvons faithe mus que de c'menchi par Maît'e d'Caen, ch'est un vier fermi d'expérience et i'dev'thait pouver êcliaithi nos lecteurs sus la position, ou du mains, san têmoignage dev'tha être bain interêssant. Va-t-en l'trouver et condis une entrevue sus les mêmes lignes comme a fait “l'Evening Post.”

Une démieuthe opprès j'étais dans l'prinseu au bouonhomme à gouôter san cidre, et je vos asseuthe qu'il en a du bon.

“Eh bain Maît'e Cliém,” je li dis, “avous lu dans la “Post” toutes ches conversations-là avec des illustres agritchulteurs?”

“Oh oui,” i' m'raîponni, “ch'est-à-dithe, ma nièche m'a lu chenna.”

“Et tch'est qu'ous en criyiz?”

“Un tas d'imbéciles!” s'êcriyi Maît'e Cliém.

“Ou n'partagiy pas lus opinions don?”

“Oh nan dja! Et pis, quand-même, à tchi qu'i' faut s'en t'nin? Iun dit “Faut craître des brocolis!” Un autre dit qu'i' n'faut pas en craître. D'autre disent, “couvrez vos fermes avec du verre, et votre fortune est faite! Gâsdemmin, y a Laiesse Ernon, mon vaisin qu'avait mins deux chents louis à bâti une serre qui n'li rapporti pas même assez pour la garder en peintuthe! Il avait plianté des vignes et touos l's ans il avait bain d'la peine à vendre san verjus et quand vint un temps oulle tait si remplyie de mildew et d'mealy bug qu'i' fut oblige d'airaichi tout. Opprès chenna il êprouvi des tomates mais chenna n'réussi pas ninnetou! Les St. Cliémentais en tchillaient en plain clios aussi heuthy comme li et par le temps qu'i' l's avait patchies et payi l'fret et la commission i' n'li restait rain pour les frais de l's aver souognies.

Il est vrai que sa serre li a 'té bain utile pour êlever ses pliantes et pour les femmes à êtendre lus linge dans l'hiver et quand i' tchèt d'la plyie mais en dehors de chenna ou n'li rapporte rain, et je l'ai oui dithe bain des feis qu'i' s'sait bain content de s'en dêbarrasser pour la maintchi de chein qu'ou li a couôté.

“Mais,” poursuivie l'bouonhomme, chein qui m'fait le pus enragi ch'est de oui des imbéciles nos dithe que la raison du bas prix des patates est car i'vaint trop d'Bretons en Jerri! Et sapresti i' n'y en avait pas assez!

J'ai oquo djaix vrégies d'patates sus les bras qu'aithaient deu sorti i' y a tchinze jours. J'avais dit au maudit Secrétaithe de l'Union de m'en amener une bouanne djaingue et i' r'vint sans m'en avèr embauchi iun.

Sinon pour Moussieu Hâcquou de l'Etacq qui m'prêti iune de ses frouques quand i' fut fini toutes mes patates m'aithaient resté. Comme ch'est j'ai perdu pus d'chent louis su ma saison. Et pis, nou permet ès gâzettes de publier patheilles théories?

J'admets bain qu'i' y a trop d'patates tchutivées mais quand i' sont là, i' faut qu'i' saient dêfouies dans un temps limité et je n'sommes jamais finis devant que les angliaiches vainnent sus l'marchi, ch'est pourtchi il est bain êvident que si ch'est qu'i' v'nait mains d'Brétons, la saison es'sait ocquo pus rallouognie et je séthions oquo dans un pus triste pité.

“Eh bain, Maît'e Cliém, ou admettrez que la cause peut être chein qu'nou voudra, la position est bain critique, et not'e Chef es'sait bain content d'aver tchiques suggestions de votre part pour y trouver un r'miède.”

“Dites au Chef qu'i' faiche comme la “Post,” qu'i' s'adresse à des gens pus experts là-d'dans que Cliément d'Caen. I' n'y en manque pas en ville. Que che sont des Majeurs, des Colonels, des marchands d'cigares, des quincailliers ou des barbiers, ou pouvez trouver une foule de gens intellectuels qui sont prêts à vos dithe tch'est qu'i' f'thaient s'ils 'taient fermiers. Eh bain ch'est-là les gens qu'i' faut interviewer, mais pas des gens du calibre à Cliément d'Caen. J'ai 'té fermi toute ma vie, et je sis oquo qu'un apprenti.

Là en aithas-tu oquo une modgie d'vant t'en aller?”

Je ne le r'fusi pas, et comme le vi voulait s'dêfaithe de mé, je n'me fit pas prier une deuxième feis, mais je r'prins le c'min pour la ville.

Si l'Chef veurt publier des “interviews” qu'i' s'en otchupe li-même, pour de mé j'en ai ieu assez.

Caouain
1930
 

Viyiz étout: